މުހައްމަދު ޝިހާބް މިރޭ ރާއްޖޭގެ ދެކުނާއި މެދުރާއްޖެތެރޭގެ ބައެއް ރަށްތަކަށް ވިއްސާވެ ގުގުރައި، ބޯކޮށް ވާރޭ ވެހޭނެ ކަމަށް މޫސުމް ލަފާކުރާ އިދާރާ، މޯލްޑިވްސް މީޓިއޮރޮލޮޖިކަލް ސާވިސްއިން ހަމަކުރައްވައެވެ.
އެއާއެކު ފުވައްމުލައް ސިޓީގައި ފެންބޮޑު ވެދާނެތީ ސަމާލުވުމަށް އެސިޓީގެ ކައުންސިލުން ވަނީ ރައްޔިތުންގެ ސަމަލުކަމަށް ގެނައުމަށް ނޯޓިސްއެއް ނެރެފައެވެ.
ބޯކޮށް ވާރޭވެހި ފެންބޮޑުވާ ހާލަތެއް މެދުވެރިވެއްޖެ ނަމަ ފުވައްމުލަކު ފަޔަރ ސްޓޭޝަންގެ ނަމްބަރު 6869118 އަށް ގުޅުއްވުމަށް އެދިފައިވެއެވެ. އަދި ފުވައްމުލަކު ފުލުންނަށް ގުޅުއްވުމަށް (6865013) ވެސް އެދިފައިވެއެވެ.
މިރޭގެ ވިއްސާރައާއެކު ދެކުނުގެ އަތޮޅުތަކަށް އިރުދެކުނާއި ދެކުނުން ގަޑިއަކު 5 މޭލާއި 15 މޭލާ ދެމެދުގެ ބާރު މިނުގައި ވައި ޖެހޭނެކަަމަށް ލަފާ ކުރެއެވެ. އެހެން ހިސާބުތަކަށް ވައި ޖެހޭނީ ހުޅަނގާއި ހުޅަނގު-އުތުރުން ގަޑިއަކު 10 މޭލާއި 20 މޭލާ ދެމެދުގެ ބާރު މިނުގައެވެ.
ވިލާގަނޑުގައި ގަޑިއަކު ގާތްގަނޑަކަށް 45 މޭލަށް ވައި ގަަދަވުން އެކަށީގެން ވެއެވެ.
ދެކުނުގެ އަތޮޅުތަކުގެ ކަނޑުތައް އާދައިގެ ވަރަކަށް މަޑުވި ނަމަވެސް ވިލާގަނޑުގައި އާދައިގެ ވަރަކަށް ގަދަ ވާނެކަމަށް ބެލެވެއެވެ.
ދިޔަވަރު ބޮޑުވާ ގަޑިތަކުގައި ބައެއް ރަށްތަކަށް އުދައިގެ އަސަރު ކުރުމަކީ އެކަށީގެންވާ ކަމެއްކަމަށް މެޓް އޮފީހުން ހާމަކުރެއެވެ.
ޚިޔާލުތައް