މުހައްމަދު ރަޝީދު (ދޮންބެ) މި ލިއުމުގެ ސުރުޚީ އެވަނީ ފުވައްމުލަކު ބަހުރަވައިންނެވެ. އެއީ ފުވައްމުލަކު މީހުން ބޭނުންކުރާ މިސާލު ބަހެކެވެ. ނަމަވެސް އެބަސް ބޭނުންކުރެވޭގޮތަށް އެވަނީ ކުޑަ ބަދަލެއް ގެނެވިފައެވެ. ފުވައްމުލަކު މީހުން އެބަސް ބޭނުންކުރާއިރު ޢާންމު ގޮތެއްގައި ބުނާނީ “ހުޅަންމަހުށަ ވީ ރައްކަލަސް ނިވި” މިގޮތަށެވެ. ނަމަވެސް ޙާލަތާއި، ކަމަކާއި ގުޅުވައިގެން ބައެއްފަހަރު މި ބުނުމަށް އިތުރު ގެނެވެއެވެ. އަޅުގަނޑު މިލިއުމުގެ ސުރުޚީ ގެނެސްފައިވާ ގޮތަކީ އޭގެ މިސާލެކެވެ. ހުޅަންމަހަކީ ފުވައްމުލަކު ބަހުރުވައިން ފުޅަނގަށް (ފުޅަނގިއަށް) ކިއާ ނަމެވެ. ސުރުޚީގަ އެބުނާ ބަހުގެ މާނައަކީ “ފުޅަނގިއަށް ލިބޭ ރައްކާތެރިކަން ވެސް ނުލިބޭ އިއްޒައްތެރި މެންބަރުން” މިހެންނެވެ.
ފުޅަންގަށް ލިބޭ ރައްކާތެރިކަމަކީ ކޮބައިތޯ ބަލައިލާއިރު، ބޮޑެތި މަސްމަހުގެ ޙަމަލާތަކުން ރައްކާތެރިކަން ހޯދުމަށްޓަކައި އެސޮރުމެން ކަނޑުގެ ސަޠަހައިން މައްޗަށް އުދުހިގަނެއެވެ. ހަމަ އުދުހިގަތުމާއިއެކު ހޯރަތައް އެސޮރުމެންނާ ދިމާކުރެއެވެ. ހޯރަތަކުން ސަލާމަތްވުމަށްޓަކައި މިސްރާބު ބަދަލުކޮށްލަނީ އެއްގަމާވީ ދިމާލަށެވެ. އެއްގަމަށް އެރުމާއެކު މީހުން ފުޅަނގިތައް ނަގައެވެ. އެސޮރުމެންނަށް ރައްކާތެރިކަން ލިބޭނޭ އެއްގޮތެއްވެސް ނޯންނަނީއެވެ.
ދިވެހި ރާއްޖޭގެ ރައްޔިތުންގެ މަޖިލީހުގެ މެންބަރުން ވެސް ފާހަގަކުރެވެނީ މިފަދަ ބައެއްގެ ގޮތުގައެވެ. މިހެން ދަންނަވަން ޖެހުމުގެ ސަބަބު ކަމުގައި އެކުލެވޭ ދެތިން ކަމެއް ހުށައަޅައިލެވޭތޯ ބަލައިލާނަމެވެ.
ފުރަތަމަ ކަމެއްގެ ގޮތުން: ޤައުމުގައި ހިގާ ކިތައްމެ ކުޑަ އަދި ބޮޑު ކަމެއްގައިވެސް ރައްޔިތުންގެ މަޖިލީހުން އެކަމަކާއި ގުޅޭގޮތުން ބަހެއް ނުބުނެގެން ނުވަތަ އެކަމެއް މަޖިލީހުން ނުބަލައިގެން ރައްޔިތުން ޝަކުވާކުރަން ފަށައެވެ. މަޖިލިސް ކޮބައި ހެއްޔޭ، އެވެރިން ތިބީ ނިދާފައި ހެއްޔޭ؟ ކިޔައި ސުވާލުކުރަން ފަށަތެވެ. އެއީ ތަހުޤީޤީ އިދާރާތަކުން ތަހުޤީޤު ކުރަމުންދާ މައްސަލައަކަށް ވިއަސްއެވެ. ރައްޔިތުންގެ މަޖިލީހުގެ އިޙްތިޞާޞުން ބޭރުކަމަކަށް ވިއަސްމެއެވެ. އެފަދަ ކަމެއްގައި، ރައްޔިތުންގެ މަޖިލީހުގެ އިޙްތިޞާޞްގެ ތެރެއިން ކަމެއް ކުރާން ހަމަ އުޅޭއިރަށް، ދެން އިވޭން ފަށަނީ އެހެން ވާހަކައެކެވެ. ރައްޔިތުންގެ މަޖިލީހުން ހުރިހާކަމެއްގެ ތެރެއަށް އަތް ބާނަނީ ކަމަށާއި، މަޖިލީހުން ވެރިކަންވެސް ކުރާން އުޅެނީއޭ ބުނެ ދައްކާ ވާހަކައެވެ. އެކަމުގެ ތުހުމަތުކޮށް މަޖިލީހުގެ މެންބަރުންނަށް އިނގިލިތައް އަމާޒުވަނީ މަދެއްކޮށެއް ނޫނެވެ. ހުރިހައި ބާރެއް މަޖިލީހަށް އެއްކުރާން މަސައްކަތް ކުރަނީއޭ ބުނެ އެކަމުގެ ޝަކުވާ ވެސް ކޮށް އުޅެތެވެ. ސީދާ ސާދާކޮށް ދަންނަވާ ކަމުގައި ވާނަމަ ދަންނަވާން ޖެހެނީ މަޖިލީހުން ކަމެއް ބަލައިގެން ވެސް ކަމަކުދާކަށް ނޯވެއެވެ. ނުބަލައިގެން ވެސް ކަމަކު ނުދެއެވެ. ހެޔޮ އެއްގޮތެއް ވެސް ނޯންނަނީއެވެ.
އަޅުގަނޑު ހިތުން ރައްޔިތުންގެ ބާރުވެރިކަމޭ ބުނެވޭ ބަހުގެ ޙަޤީޤީ މުރާދަކީ ކޮބައިކަން ރައްޔިތުންނަށް އޮޅުންފިލާން އެބަޖެހެއެވެ. ވިސްނޭން އެބަ ޖެހެއެވެ. ޤާނޫނު އަސާސީގެ ފުރަތަމަ ބާބު ކަމުގައިވާ ދައުލަތާއި، އަމިއްލަ ވެރިކަމާއި، ރައްޔިތުންގެ ބާރުވެރިކަން، ބަޔާންކޮށްފައިވާ ބާބުގައި ބުނެފައިވަނީ ކީކޭތޯ ބަލައިލަމާތޯއެވެ.
ރައްޔިތުންގެ ބާރު: ދިވެހިދައުލަތުގެ އެންމެހައި ބާރުތައް ފެށިގެން އަންނަނީ ރައްޔިތުންގެ ކިބައިންނެވެ. އަދި މި ބާރުތައް ދެމިއޮންނަނީ ރައްޔިތުންގެ ކިބައިގައެވެ.
ޤާނޫނު ހެދުމުގެ ބާރު: ޤާނޫނުހެދުމުގެ އެންމެހައި ބާރުތައް ލިބިގެންވަނީ ރައްޔިތުންގެ މަޖިލީހަށެވެ.
ވެރިކަން ހިންގުމުގެ ބާރު: ޤާނޫނުއަސާސީގައި ބަޔާންވެގެންވާ ގޮތުގެމަތިން ވެރިކަން ހިންގުމުގެ ބާރު ލިބިގެންވަނީ ރައީސުލް ޖުމްހޫރިއްޔާއަށެވެ.
އަދުލު އިންޞާފު ޤާއިމްކުރުމުގެ ބާރު: ޢަދުލު އިންސާފު ޤާއިމްކުރުމުގެ ބާރު ލިބިގެންވަނީ ދިވެހިރާއްޖޭގެ ކޯޓުތަކަށެވެ.
ދައުލަތުގެ އެންމެ މަތީ ބާރު ކަމަށްވާ ރައީސުލް ޖުމްހޫރިއަޔާ ކަމަށް މީހަކު އިންތިޚާބު ކުރުމުގެ ބާރުވެސް އޮންނަނީ ރައްޔިތުންގެ އަތްމަތީގައެވެ. ރައީސުލް ޖުމްހޫރިއްޔާ އަކީ ހަމައެކަނި ހުރިހާ ރައްޔިތުންނަށް ވޯޓު ލުމުގެ ފުރުސަތު ލިބިގެން އިންތިޚާބު ކުރެވޭ ފަރާތެވެ. ދައުލަތުގެ ދެވަނަ ބާރު ކަމަށްވާ ޤާނޫނު ހަދާ މަޖިލީހަށް މެންބަރުން އިންތިޚާބު ކުރުމުގެ ބާރުވެސް އޮންނަނީ ރައްޔިތުންގެ އަތްމަތީގައެވެ. އަދުލު އިންސާފު ގާއިމުކުރުމަށް ފަނޑިޔާރުން އައްޔަންކުރުމާއި ވަކިކުރުމުގެ ބާރު މި އޮންނަނީ ރައްޔިތުން އިންތިޚާބުކުރާ ރައްޔިތުންގެ މަޖިލީހުގެ މެމްބަރުންގެ އަތްމަތީގައެވެ. ދިވެހިދައުލަތުގެ ހުރިހާ ބާރުތަކެއް ފެށިގެން އަންނަނީ އަދި އެ ބާރުތައް ދެމިއޮންނަނީ ވެސް ރައްޔިތުންގެ އަތުގައިކަމަށް ޤާނޫނު އަސާސީގައި ލިޔެފައިވަނީ މި ބަޔާންކުޅަ ސަބަބުތަކާއި ހެދިއެވެ.
ދެވަނަކަމަކީ: ސަރުކާރު ޖަވާބުދާރީ ކުރުވުމަކީ މަޖިލީހުގެ ޒިންމާއެކެވެ. އެއީ ސަރުކާރު ހިންގާ ޕާޓީގެ މެންބަރުންގެ ގޮތުގައި ތިބި ކަމުގައިވިއަސް އަދި އިދިކޮޅު މެންބަރުންގެ ގޮތުގައި ތިބިކަމުގައި ވިޔަސްމެއެވެ. ރައްޔިތުންގެ މަޖިލީހަށް ނުވަތަ ޤާނޫނުހަދާ މަޖިލީހަށް މެންބަރުން އިންތިޚާބު ކުރަނީ ޤާނޫނު ހަދާން ކަމަށް ވީނަމަވެސް، މިހާތަނަށް ރާއްޖޭގެ ކަންތައްތައް ހިނގައިފައިވާ ގޮތުން ރައްޔިތުންނާއި ދިމާވާ ކުދި ބޮޑު ހުރިހައި ކަމަކަށް އެ ރައްޔިތުން އެދެމުން އަންނަނީ އެ ރައްޔިތުންގެ އިންތިޚާބީ މަގާމުތަކަށް އިންތިޚާބު ކޮށްފައިވާ ފަރާތްތަކުގައެވެ. އެއީ ރަށުފެންވަރުގެ ކަމެއްކަމުގައި ވާނަމަ، ބައެއްފަހަރު ކައުންސިލަރުންގެ އަރިހުންނެވެ. ރައީސުލް ޖުމްހޫރިއްޔާއަށް ހުރިހައި ކަމެއްގެ ޝަކުވާ ދުވަހުން ދުވަހަށް، ހަމަ ކޮންމެ ދުވަހަކު ހުށައެޅުމަކީ ކުރެވޭނޭ ކަމެއް ނޫންކަމުގައި ރައްޔިތުން ޤަބޫލުކުރެއެވެ. އެހެންކަމަށް ވާތީވެ ރައްޔިތުން ޤަބޫލުކުރާ ގޮތުން ހުރިހައި ކަމަކަށްވެސް ހައްލު ހޯދައި ދެވޭނީ އެ ރައްޔިތުންގެ ދާއިރާގެ މަޖިލިސް މެންބަރަށެވެ. ނަމަވެސް ހަޤީޤަތުގައި ރައްޔިތުންގެ މަޖިލީހުގެ މެންބަރުންނަކީ މީގެތެރެއިން އެއްވެސް ކަމެއް ކުރުމުގެ އިޙުތިސާސްއެއް ނުވަތަ ބާރުވެރިކަމެއް ލިބިފައިވާ ބައެއް ނޫނެވެ.
ހެނދުނު ހޭލެވެނީ ގިނަފަހަރު ރައްޔިތުމީހާގެ ފޯނު ކޯލަކަށެވެ. ނިދަން އޮށޯންނަ ފަހުންވެސް އެފަދަ ފޯނުތައް އަންނަ ރޭރޭ މަދެއްނޫނެވެ. ކޮންމެވެސް މުހިންމު މުހުތާދަކާއި ގެންނެވެ. ކަންކަމާއި ހަވާލު ކުރެވިފައިވާ ފަރާތްތަކަކީ ރައްޔިތުން ދަންނަ ބައެއްނޫނެވެ. އެހެންކަމުން ރައްޔިތުންގެ ކަންބޮޑުވުންތަކަށް ހައްލު ހޯދައި ދިނުމަށް ނުވަތަ އެދޭ ކަންތައްތައް ކުރުވޭނޭ މަގެއް ފެނޭތޯ މެންބަރުންނަށް ދާން ޖެހެނީ ކޮންމެވެސް މިނިސްޓަރެއްގެ އަރިހަށެވެ. ނުވަތަ ކޮންމެވެސް ކުންފުއްޏެއްގެ އެމް.ޑީއެއްގެ ގާތަށެވެ. ނުވަތަ ދައުލަތުގެ ކޮންމެވެސް މުއައްސަސާއެއްގެ ވެރިއެއްގެ އަރިހަށެވެ. ކަމެއްވާން އޮންނަނީ އެބޭފުޅުން ކޮށްދެއްވައިފިއްޔާއެވެ. މިސާލަކަށް ރައްޔިތު މީހާގެ މުހުތާދު ފުއްދައިދިނުމަށްޓަކައި އެއިން ބޭފުޅެއްގެ އަރިހަށް ގޮސްގެން މިއަދު ކަމެއް ކުރުވިދާނެއެވެ. އެކަމަކު، މާދަމާ އެ ފަރާތެއް ރައްޔިތުންގެ މަޖިލީހުގެ ކޮމިޓީއަކަށް ގެނެސް ޖަވާބުދާރީ ކުރުވާން ވެސް އެބަޖެހެއެވެ. އެއްކޮޅުން ރައްޔިތުން އެދޭ ކަންތައްތައް ކުރުވުމެވެ. އަނެއްކޮޅުން ރައްޔިތުން ހަވާލުކުރި މަސްއޫލިއްޔަތު ފުރިހަމައަށް އަދާކުރުމެވެ. ރައްޔިތުންގެ ބައެއް ކަހަލަ މުހުތާދުތައް ވާން އޮތް ގޮތެއް ހޯދައިގެން އެއިން ބޭފުޅަކު ލައްވައި ކުރުވައިފި ނަމަ، ޙަޤީޤީ މާނާގައި ރައްޔިތުން ހަވާލުކުރި މަސްއޫލިއްޔަތު އަދާކުރުމަށް އުދަގޫތަކެއް ކުރިމަތިވެއެވެ. ރައްޔިތުން ހަވާލުކުރި ޒިންމާ ތެދުވެރިކަމާއި އެކު ފުރިހަމައަށް އަދާކޮށްފި ކަމުގައިވާނަމަ، ރައްޔިތުން އެދޭ އެހެނިހެން ކަންތައްތައް ކުރުވުމަށް ހުރަސްތަކެއް، ދަތިތަކެއް ހުރެއެވެ. އެއީ އިންސާނީ ތަބީއަތެވެ.
ކަންކަމާއި ގުޅޭގޮތުން ސަރުކާރު ޖަވާބުދާރީ ނުކުރުވައިގެން ކަންބޮޑުވުން ފާޅުކުރާއިރު، ސަރުކާރު ޖަވާބުދާރީ ކުރުވުމުގެ ގޮތުން ފިޔަވަޅުއަޅާން ފެށުމުން، ސަރުކާރު ހިންގުމަށް ދަތިކުރާކަމުގެ އިލްޒާމުއާއި، މަޖިލީހުން ސަރުކާރު ހިންގާން ނުވަތަ ވެރިކަންކުރާން އުޅެނީއޭ ބުނެ ތުހުމަތުތައް ކުރާން ފަށައެވެ. ސަރުކާރުން އެދޭ ގޮތައް ކަމެއް ކޮށްދީފިއްޔާމު އެއީ ސަރުކާރަށް ވިކުނީއެވެ.
ފަހު ކަމެއްގެ ގޮތުން ފާހަގަ ކޮށްލާން އޮތީ ރައްޔިތުންގެ މަޖިލީހުގެ މެންބަރުން ގިންތިކުރެވޭ މިންގަނޑުގެ ވާހަކައެވެ. ރައްޔިތުންގެ މަޖިލީހަކީ ދައުލަތުގެ ތިން ބާރުގެ ތެރެއިން އެއްބާރެވެ. ރައްޔިތުންގެ މަޖިލިސް ނުވަތަ ޤާނޫނު ހަދާ މަޖިލީހަކީ އަނެއް ދެބާރު ކަމަށްވާ ވެރިކަން ހިންގުމުގެބާރު ނުވަތަ ސަރުކާރާއި، ޢަދުލު އިންސާފު ޤާއިމް ކުރުމުގެ ބާރު ނުވަތަ ފަނޑިޔާރު ގޭގެ ބެލެނިވެރި ފަރާތެވެ. ދައުލަތުގެ އޮނިގަނޑު ރޭވިފައިވާ ގޮތުން ދައުލަތުގެ އެންމެ އިސްފަރާތަކީ ރައީސުލް ޖުމްހޫރިއްޔާ އެވެ. ދެވަނަ ގިންތީގައި ހިމެނެނީ ރައްޔިތުންގެ މަޖިލީހުގެ ރައީސް، އުއްތަމަ ފަނޑިޔާރު، ރައީސުލް ޖުމްހޫރިއްޔާގެ ނާއިބު އެވެ. ތިންވަނަ ގިންތީގައި ހިމެނެނީ ރައްޔިތުންގެ މަޖިލީހުގެ މެންބަރުންނާއި، ސަރުކާރުގެ ވަޒީރުންނާއި އަދި ސްޕްރީމް ކޯޓުގެ ފަނޑިޔާރުންނެވެ. ފަނޑިޔާރުގެއަށް ފަނޑިޔާރުން އައްޔަން ކުރުމާއި ވަކިކުރުމުގެ ބާރު އޮންނަނީ ރައްޔިތުންގެ މަޖިލީހަށެވެ. އަދި ރައީސުލް ޖުމްހޫރިއްޔާ ސަރުކާރު ހިންގުމަށް އައްޔަން ކުރައްވާ ވަޒީރުންނާއި، ގައުމުތަކަށް އައްޔަން ކުރައްވާ ސަފީރުންނަށް ރުހުންދިނުމާއި ވަކިކުރުމުގެ ބާރު އޮންނަނީ ރައްޔިތުންގެ މަޖިލީހަށެވެ. އަދި ކޮންމެ އަހަރަކު ސަރުކާރުން ފޮނުވާ ދައުލަތުގެ ބަޖެޓު ފާސްކުރުމާއި އެއަށް އުނިއިތުރު ގެނައުމުގެ ބާރުވެސް މިއޮންނަނީ ރައްޔިތުންގެ މަޖިލީހަށެވެ. ޤާނުނުތަކުން ބާރުލިބިގެން އުފެދޭ މިނިވަން މުއައްސަސާތަކަށް މެންބަރުން އައްޔަން ކުރުމާއި ވަކިކުރުމުގެ ބާރުވެސް އޮންނަނީ ރައްޔިތުންގެ މަޖިލީހަށެވެ. އަދި ޚުދު ރައީސުލް ޖުމްހޫރިއްޔާ ވަކިކުރުމުގެ ބާރުވެސް ރައްޔިތުންގެ މަޖިލީހަށް ލިބިގެންވެއެވެ.
މިހުރިހައި ބާރުތަކެއް ލިބިގެންވާ ރައްޔިތުންގެ މަޖިލީހުގެ މެންބަރު، ރައްޔިތުން އެދޭ ކަންތައްތައް ކުރުވުމަށް ޖެހެނީ ހަޤީޤަތުގައި ސަލާންޖަހާށެވެ.
ވަޒީރުބޭފުޅުން، ކުންފުނިތަކުގެ ވެރިން، ފަނޑިޔާރުން، ސިފައިންނާއި ފުލުހުންގެ އޮފިސަރުން، ގައުމަތަކަށް ކަނޑައެޅިފައި ތިއްބަވާ ސަފީރުން، ބައެއް މިނިވަން މުއައްސަސާތަކުގެ ވެރިން، ސިޓީ ކައުންސިލުގެ މޭޔަރުން ފަދަ ބޭބޭފުޅުން ދައުލަތުގެ ކާރުކޮޅުގައި އުޅުއްވާއިރު، މިހުރިހައި ފަރާތެއްގެ ޚަޤީޤީ ބެލެނިވެރި ފަރާތް ކަމަށްވާ ރައްޔިތުންގެ މަޖިލީހުގެ “ޢިއްޒަތްތެރި” މެންބަރުން ފައިމަގުގަ ނުވަތަ ސައިކަލުގައެވެ. ޓުރެފިކު ފުލުހުން މެންބަރުންގެ ސައިކަލު މަޑުކުރުވާފައި ޗެކު ކުރާއިރު، ދިދަޖެހިކާރުތަކަށް ސެލިއުޓު ނަގާން ޖެހެއެވެ.
އެންމެ ގިނައިން އިވޭ އެއްއަޑަކީ ރައްޔިތުންގެ މަޖިލީހުގެ މެންބަރުންގެ މުސާރަ ބޮޑު ވާހަކައެވެ. އެހެންނަމަވެސް ޙަޤީޤަތުގައި ބައެއް ކުންފުނިތަކުގެ ވެރިންނާއި، ބައެއް ފަނޑިޔާރުންނާއި، ގައުމުތަކަށް ކަނޑައަޅާފައި ތިއްބަވާ ސަފީރުންގެ މުސާރަަޔާއި އިނާޔަތްތައް މާ ބޮޑުތަނުންވެސް ބޮޑެވެ. ރައްޔިތުންގެ މަޖިލީހުގެ މެންބަރުންނަށް ލިބޭ މުސާރައިން ދާއިރާގެ ރައްޔިތުންނަށާއި، ދާއިރާގެ ކަންކަމަށް ޚަރަދު ކުރާން ޖެހުނުކަމުގައި ވީނަމަވެސް ވަޒީރުންނާއި ކުންފުނިތަކުގެ ވެރިންނަށް އެ ޚަރަދު ކުރައްވާކަށް ހަމަ ގައިމުވެސް ޖެހިވަޑައެއް ނުގަންނަވާނެއެވެ. ވަޒީރުންނާއި ކުންފުނިތަކުގެ ވެރިންގެ މައްޗައް ނާޖާއިޒު ގޮތުގައި މަގާމުގެ ބޭނުންކޮށްގެން ނުހައްޤު މުއްސަނދިކަން ހޯދާކަމުގެ ތުހުމަތުވެސް ބައެއް ފަހަރަށް ކުރެވެއެވެ. އެއީ އެ ފަދަ ކަމެއް ހަޤީޤަތުގައި ކޮށްގެން ކުރެވޭ އަސްލު ތުހުމަތަކަށް ވާ ފަހަރުވެސް އާދެއެވެ. އެ ފަދަ ކަންކަން ކުރުމުގެ ފުރުސަތު ވެސް އޮންނާތީއާ ވެސް އެކުއެވެ. އެހެން ނަމަވެސް މަޖިލިސް މެންބަރުންނަކީ ލިބޭ މުސާރައާއި އިނާޔަތުގެ ބޭރުން އެފަދަކަމެއް ކުރުމުގެ ކުޑަވެސް ފުރުސަތު އޮންނަ ބައެއް ނޫނެވެ.
މިހުރިހައި ކަމެއް މިހެން ހުރިއިރުވެސް ރައްޔިތުންގެ ފާޑުކިއުން އަބަދުވެސް އަމާޒުވަނީ ރައްޔިތުންގެ މަޖިލީހުގެ މެންބަރުންނަށެވެ. އެހެން ނުވާންވީ ސަބަބެއް ވެސް ނެތެވެ. އެ ރައްޔިތުންގެ އުއްމީދުތައް ގުޅިފައިވަނީ އެ ރައްޔިތުންގެ އިންތިޚާބީ މަންދޫބުންނާއެވެ. ޤަބޫލުކުރެވޭ ގޮތަކީ އެއީ ކަމުގައި ވީނަމަވެސް ޖަވާބުދާރީ ކުރުވަނިވި ދައުލަތެއް ބިނާކުރުމަކީ ރައްޔިތުންގެ މަޖިލީހުގެ ޒިންމާއެއްކަން އެއީ ކޮންމެ ރައްޔިތަކުވެސް ހަނދާނުގައި ބަހައްޓާން ޖެހޭ ކަމެކެވެ. އެކަމާމެދު ފުންކޮށް ވިސްނާން ޖެހޭ ކަމެކެވެ. ނަޒާހަތްތެރި މަޖިލީހެއް އުފެދޭނީ ފުރަތަމަ ރައްޔިތުން ނަޒާހަތްތެރި ވެގެންނެވެ.
ނަމުން “ޢިއްޒަތްތެރި” ކަމުން “ފައިދަށު ކުރި” ގެ ބަދަލުގައި، ކަމުންނާއި، ނަމުން ޢިއްޒަތްތެރި، ނަޒާހަތްތެރި، ޖަވާބުދާރީ ކުރުވަނިވި ދައުލަތެއް ބިނާކުރުވޭނީ ވެރިކަމުގެ ނިޒާމުގެ ބާރުތައް މަތިން ތިރިއަށް ފުރިހަމައަށް ތަރުތީބު ކުރެވިގެންނެވެ. ނުވަތަ ވެރިކަމުގެ ނިޒާމު ރައްޔިތުންނަށް ސީދާ ބަސް ބުނެވޭނެ ނިޒާމަކަށް ބަދަލު ކުރެވިގެންނެވެ.
ޚިޔާލުތައް
ރައްޔިތުން މަގުފުރައްދަނީ ރައީސް ކަމަށާއި މަޖިލިސް މެންބަރު ކަމަށް އަންނަން އުޅޭ އަމިތްލަ އެދުމުން ފޯވެފަ ތިބޭ ޖާހިލު މީހުން ހަޤީގަތުގަ ތިމަންނަމެން އެވެނި ކަމެއް މިވެނި ކަމެއް ކުރާނަމޭ ކޮށްދޭނަމޭ ބުނެ އަޑަށް ބާރުލާ ހަޅޭފަޅޭ ޖްހާއިރު ޤާނޫނު އަސާސީއާއި ، ޤާނޫނު ތަކުން ރައީސަށާއި، މަޖިލިސް މެންބަރުންނަށް ލިބިދޭ މެންޑޭޓް އާއި މިނިޒާމުން އެތުރި ލާމެހި ހިނގަމުންދާ މެންޑޭޓް ތައް ތަރުތީބު ވެފައިވާގޮތް އެއްފަރާތް ކޮށް ރައްޔިތުންނަށް ކަންކަން އޮޅުވާ ލާހަދަނީ ހަމަ ތިމީހުން ދެން ޒިންމާގެ ގޮމޑީގަ އިށީންދެފަ ތިކަން އޮތީމިހެން، އެހެން މަޖެހޭނެ ރައީސް، މިނިސްޓަރ ، އެމްޑީ އެސަފީރު، އޭނަ މީނަ ޖްވާބު ދާރީ ކުރުވަން މިހެން ކިތަންމެ އެއްޗެއް ކިޔާހަދާ އެހެން ވީމަ ރައްޔިތުންނަށް ކަންކަން އޮޅޭގޮތްވަނީ . ބަލަ ބާރުތަކާއި ޒިންމާތައް ތަރުތީބުވެ ހިނގުންދާ ސާދާގޮތް ކިޔާދީގެން ވެރި ކަމާއި މެންބަރުކަން ޙާޞިލް ކުރަން ވިސްނީއާއި ކީތަވާނީ ރައްޔިތުން ހަމަ ޤބޫލް ކުރައްވާނެ އެގޮތްތައްވެސް ވިސްނަ ދެއްވީމަ ރީތިކޮށް.
މަޖުލީސް އިއޒަތްތެރި މެމްބަރުވެސް ރައްޔިތު މީހާގެ އަޑު އަހަންވާނެ. ޢެކަމަކު ގާނޫނު ތަކާ ގަވާއިދާ ތިމާމެންގެ މެންޑޭޓުގެ ތެރެއިން. ރައޔިތުންގެ ތެރޭގައި އުޅޭނެ ސިުޑިން ނުވިސްނާ މީހުނ
ވަރަށް ރަނގަޅު ވާހަކައެއް! އަސްލު ގައުމެއް ތަރައްޤީ ވާނީ މީހުން ތަރައްޤީ ވެގެން. މިޤައުމުގެ ގިނައިން ތިބީ ތިމާގެ އަމިއްލަ ސިކުޑިން ނުވިސްނާ އެހެން މީހުންގެ ބުއްދި އިން އުޅޭ މީހުން.