އަހުމަދު ނިޖާހް މުޙައްމަދު ރަޝީދު (ދޮންބެ) ފުވައްމުލަކު އުތުރު ދާއިރާ:
2020 ވަނަ އަހަރަށް ލަފާކުރާ ބަޖެޓަކީ ސަރުކާރުގެ ސްޓްރެޓީޖިކް އެކުޝަން ޕުލޭން އާއި ޖަޒީރާ ރާއްޖެ މެނިފެސްޓޯގައި ހިމެނޭ ފަސް ވައުދު ފުރިހަމައަށް ތަންފީޒު ކުރެވޭ ގޮތަށް އެކުލަވާލެވިފައިވާ ބަޖެޓެއްކަން ފާހަގަކުރަމެވެ. އެގޮތުން 2020 ވަނަ އަހަރަށް ލަފާކުރާ ބަޖެޓު ކަމުގައިވާ 37.8 ބިލިއަން ރުފިޔާގެ ބަޖެޓު ބެހިފާވާ ގޮތައްބަލާއިރު:
ނޫ އިގުތިސާދަށް 4.4 ބިލިއަން ރުފިޔާ ބަޖެޓުގާ ކަނޑައެޅިފާ ވާއިރު
އޯގާތެރި ސަރުކާރަށް 12.3 ބިލިއަން ރުފިޔާ
ފަޙުރުވެރި އާއިލާއަށް 3.6 ބިލިއަން ރުފިޔާ.
ޖަޒީރާ ދިރިއުޅުމަށް 6 ބިލިއަން ރުފިޔާ.
ހެޔޮވެރިކަމަށް 11.5 ބިލިއަން ރުފިޔާ ބަޖެޓުގާ ކަޑައެޅިފަވެއެވެ.
2020 ވަނަ އަހަރަށް ހުށައެޅިފައި މިވާ ބަޖެޓުގެ ޖުމްލައަކީ 37.8 ބިލިއަން ރުފިޔާ
މީގެ ތެރެއިން ޚަރަދުގެ ގޮތުގައި ހިގާނެކަމަށް ބެލެވެނީ 35.6 ބިލިއަން ރުފިޔާއެވެ. އެއީ ރިކަރެންޓު ޚަރަދުގެ ގޮތުގާ 22.2 ބިލިއަން ރުފިޔާއެވެ. ޕީ.އެސް.އައި.ޕީ ޕުރޮޖެކުޓުތަކަށް 10.1 ބިލިއަން ރުފިޔާއެވެ. އަދި
އެހެނިހެން ކެޕިޓަލް ޚަރަދުތަކަށް 5 ބިލިއަން ރުފިޔާއެވެ. ދައުލަތުގެ ދަރަނި އަދާކުރުމަށް 1.9 ބިލިއަން ރުފިޔާ ޚަރަދު ކުރުމަށް ހަމަޖެހިފައިވެއެވެ.
2020 ވަނަ އަހަރު ޖުމްލަ އާމްދަނީއާ ހިލޭއެހީގެ ގޮތުގާ ދައުލަތަށް ލިބޭނީ ކަމަށް ލަފާކުރެވެނީ 29.9 ބިލިއަން ރުފިޔާ
މިގޮތުން ޓެކުސްގެ ގޮތުގައި ލިބޭނޭކަމަށް ލަފާކުރެވެނީ 17.9 ބިލިއަން ރުފިޔާއެވެ. އަދި ޓެކުސް ނޫން ގޮތުގައި 6.9 ބިލިއަން ރުފިޔާ ލިބޭނޭކަމަށް ލަފާކުރެވޭއިރު ހިލޭ އެހީގެ ގޮތުގައި 5.2 ބިލިޔަން ރުފިޔާ ލިބޭނޭކަމަށް ލަފާކުރެވެއެވެ.
2020 ވަނަ އަހަރަށް ލަފާކުރާ ބަޖެޓްގެ އާމްދަނީ އާއި ހިލޭ އެހީގެ ގޮތުގައި ހިމަނާފައިވާ އަދަދަކީ 2019 ވަނަ އަހަރަށް މިހާރު އަންދާޒާކުރެވޭ އަދަދާއި އަޅާބަލާއިރު 24 ޕަސެންޓް އިތުރު އަދަދެކެވެ. 2020 ވަނަ އަހަރު އާމްދަނީގެ ގޮތުގައި ސަރުކާރަށް ލިބޭ ފައިސާގެ އެންމެ ބޮޑު ބައެއް (28 ޕަސެންޓް) ހިއްސާކުރަނީ ޓީޖީއެސްޓީ އިންނެވެ. ޓީޖީއެސްޓީގެ ގޮތުގައި ލިބޭނޭކަމަށް ލަފާވަނަ ކުރާ އަދަދަކީ 2019އަހަރަށް މިހާރު ލަފާކުރާ އަދަދާ އަޅާބަލާއިރު 4 ޕަސެންޓް އިތުރު އަދަދެކެވެ. ނަމަވެސް، ފާއިތުވެ ދިޔަ އަހަރުތަކަށް ބަލާއިރު، ފަތުރުވެރިކަމުގެ ސިނާއަތަށް އަންނަ ކުރިއެރުމާއި އެއް މިންވަރަށް ޓީޖީއެސްޓީ އިން ލިބޭ އާމްދަނީ އިތުރުވަމުން ނުދާކަން ފާހަގަކުރެވެއެވެ.
2020 ވަނަ އަހަރަށް ލަފާކުރާ ޖުމްލަ ބަޖެޓުގެ ޚަރަދުތަކަށް ބަލާއިރު ރިކަރަންޓް ޚަރަދުގެ މިންވަރަކީ 22.3 ބިލިއަން ރުފިޔާއެވެ. އަދި ކެޕިޓަލް ޚަރަދުގެ ގޮތުގައި ހޭދަވާނެކަމަށް ލަފާކުރެވެނީ 15.2 ބިލިއަން ރުފިޔާއެވެ. މިއީ 2019 ވަނަ އަހަރާއި އަޅާބަލާއިރު 23 ޕަސެންޓް އިތުރު އަދަދެކެވެ.
އަދި މިއީ 2020 ވަނަ އަހަރު ދައުލަތަށް ލިބޭނޭކަމަށް އަންދާޒާކުރާ އާމްދަނީގެ (ހިލޭ އެހީ ނުހިމަނައި) 89 ޕަސެންޓުއެވެ.
2020 ވަނަ އަހަރުގެ ބަޖެޓުގައި ވެސް އެންމެ ބޮޑު ބައެއް (ޖުމްލަ ރިކަރަންޓް ޙަރަދުގެ 23 ޕަސެންޓް) ޚަރަދުވަނީ މުވައްޒަފުންގެ މުސާރައަށެވެ.
2019 ވަނަ އަހަރާއި އަޅާބަލާއިރު ރިކަރަންޓް ޚަރަދު އެންމެ ބޮޑު އިތުރުވުމެއް އައިސްފައި ވަނީ ސަރުކާރުން ދޭ އެހީ، އިޝްތިރާކާއި ސަބްސިޑީޒް 1.5 ބިލިއަން ރުފިޔާއިން އިތުރުވުމާއި މުވައްޒަފުންނަށް ހިނގާ ޚަރަދު 432.3 މިލިއަން ރުފިޔާއިން އަދި ތަމްރީން ކުރުމަށް ކުރެވޭ ޚަރަދު 293.2 މިލިއަން ރުފިޔާއިން އިތުރުވުމުންނެވެ.
އިޝްތިރާކާއި ސަބްސިޑީޒްގެ ތެރެއިން އެންމެ ބޮޑު ބައެއް ހިއްސާކުރަނީ ކައުންސިލްތަކަށް ބުލޮކު ގްރާންޓް ގޮތުގައި ދޭން ހިމަނާފައިވާ 1.6 ބިލިއަން ރުފިޔާއެވެ.
އަދި ތަމްރީން ކުރުމަށް ކުރެވޭ ޚަރަދުގެ ބޮޑު ބައެއް ހިއްސާކުރަނީ ސަރުކާރުގެ ސިޔާސަތުތަކުގެ ތެރޭގައި ހިމެނޭ ސްކޮލަޝިޕް އަދި ފެލޯޝިޕްގައި ދާ މީހުންނަށް ދިނުމަށް ހަމަޖެހިފައިވާ ފައިސާއެވެ. މިއީ، 2019 ވަނަ އަހަރާއި އަޅާބަލާއިރު 256 މިލިއަން ރުފިޔާ (49 ޕަސެންޓް) އިތުރު އަދަދެކެވެ.
2020 ވަނަ އަހަރު ކެޕިޓަލް ޚަރަދުގެ ގޮތުގައި ހޭދަވާނޭކަމަށް ލަފާކޮށްފައިވާ 15.2 ބިލިއަން ރުފިޔާ އަކީ ޖުމްލަ ބަޖެޓުގެ 41 ޕަސެންޓްއެވެ. އަދި މިއީ، 2019 ވަނަ އަހަރަށް ލަފާކުރާ އަދަދަށްވުރެ 58 ޕަސެންޓް އިތުރު އަދަދެކެވެ.
2020 ވަނަ އަހަރު ކެޕިޓަލް ޚަރަދުގެ ގޮތުގައި އެންމެ ބޮޑު ޚަރަދެއް ކުރަން ހަމަޖެހިފައި ވަނީ ޕަބްލިކް ސެކްޓަރ އިންވެސްޓްމެންޓް ޕްރޮގްރާމް (ޕީއެސްއައިޕީ) އަށް، 10.4 ބިލިއަން ރުފިޔާއެވެ. މިއީ 2019 ވަނަ އަހަރާއި އަޅާބަލާއިރު 70 ޕަސެންޓް އިތުރު އަދަދެކެވެ.
2020 ވަނަ އަހަރުގެ ބަޖެޓުގައި ޕީއެސްއައިޕީގެ ދަށުން 900 އަށްވުރެ ގިނަ މަޝްރޫއުއަށް ޚަރަދުކުރުމަށް ހުށައަޅާފައިވާއިރު، މީގެ ތެރޭގައި އަލަށް ފަށާ 411 މަޝްރޫއު އާއި ހިނގަމުންދާ 287 މަޝްރޫއެއް ހިމެނެއެވެ. މިގޮތުން، 6.1 ބިލިއަން ރުފިޔާގެ މަޝްރޫއުތައް ސީދާ ސަރުކާރުގެ ބަޖެޓުން ކުރުމަށް ހަމަޖެހިފައި ވެއެވެ. މީގެ އިތުރުން، ޕީއެސްއައިޕީއަށް ލޯނުން 2.9 ބިލިއަން ރުފިޔާ، ހިލޭ އެހީއިން 472.7 މިލިއަން ރުފިޔާ އަދި ޓްރަސްޓް ފަންޑުން 791.7 މިލިއަން ރުފިޔާ ޚަރަދުކުރުމަށް ވެސް ހަމަޖެހިފައިވެއެވެ. (ނުނިމޭ).
ޚިޔާލުތައް