މުހައްމަދު ޝިހާބް މިހާރު ގިނަ ރައްޔިތުންގެ ކަންބޮޑުވުން ފާޅުކޮށް ދިމާވާ އުނދަގުލުގެ ވާހަކަ ދައްކަމުންދާ ފުވައްމުލައް ސިޓީގެ ނަރުދަމާ މަޝްރޫޢާ ބެހޭގޮތުންނާއި ފުވައްމުލަކުގެ މަގުހެދުމާއިގުޅޭ ގޮތުން ކަމާބެހޭ ފަރާތްތަކާއި ރައިސުލް ޖުމްހޫރިއްޔާގެ ނައިބު ފައިސަލް ނަސީމު މިއަދު މެންދުރުފަހު މަޝްވަރާ ކުރައްވައިފިއެވެ.
މި ބައްދަލުވުމުގައި ނައިބު ރައީސް ފައިސަލް ވަނީ ފުވައްމުލަކުގެ ނަރުދަމާގެ މަޝްރޫޢުގެ އިތުރުން މަގުހެދުމުގެ މަސައްކަތާއި ގުޅޭގޮތުން ވެސް އެންމެ ފަހުގެ މައުލޫމާތުތައް ހޯއްދަވާފައި ވެއެވެ.
އޮންލައިންކޮށް ކުރިޔަށްގެންދެވި މިބައްދަލުވުމުގައި ފުވައްމުލައް ސިޓީގެ ރައްޔިތުން މަޖިލީހުގެ މެންބަރުންނާއި، މޭޔަރުގެ އިތުރުން މަގު ހެދުމުގެ ޕްރޮޖެކްޓްގައި ހިމެނޭ އިސްފަރާތްތަކުން ބައިވެރިވެ ވަޑައިގެންފައި ވާކަމަށް ރައީސް އޮފީހުގެ މީޑިއާގައި ހާމަކުރައްވާފައި ވެއެވެ. މި ބައްދަލުވުމުގައި ފުވައްމުލަކުމަގު ހެދުމުގެ މަޝްރޫޢު ކުރިއަށްގެންދާ ގޮތުގެ ޕްލޭން، ޕްރެޒެންޓޭޝަނެއް ނައިބު ރައީސް އާއި ހިއްސާ ކުރައްވާފައެވެ. އޭގެ އިތުރުން މަގުހެދުމުގެ މަޝްރޫޢު ކުރިއަށް ގެންދިއުމުގައި ހުރި ގޮންޖެހުންތަކާއި، އެކަންތައްތައް ހައްލުކުރުމަށް އެޅެންހުރި ފިޔަވަޅުތަކާ ގުޅޭގޮތުން ވެސް މި ބައްދަލުވުމުގައި މަޝްވަރާ ކުރައްވާފައި ވެއެވެ.
މަޝްރޫޢުތައް ހިންގުމުގައި ވީހާވެސް އަވަހަށް ރައްޔިތުންނަށް ފަސޭހަވެގެންދާނެ ފަދަ ގޮތަކަށް މަސއްކަތްތައް ކުރިއަށްގެންދިއުމަށް ބައްދަލުވުމުގެ ބައިވެރިންގެ އަރިހުން ނައިބު ރައީސް އެދިވަޑައިގެންފައި ވެއެވެ. މި މަޝްރޫޢުގައި ކުރިއަށްގެންދާއިރު ހުރިހާ ފަރާތްތަކުން ގުޅިގެން މަސައްކަތްތައް ކުރިޔަށްގެންދެވޭ ގޮތަށް ކަންކަން އިންތިޒާމު ކޮށްދެއްވުމަށް ނައިބު ރައީސް ފައިސަލް އެދިވަޑައިގެންފައި ވެއެވެ.
ޚިޔާލުތައް