ފަތުހުﷲ ސާލިހް
- 05 އަހަރާއި 09 އަހަރާ ދެމެދުގެ އެންމެ ރަނގަޅު ބަނދި ހުށަހެޅުމަކަށް 1000 ރުފިޔާ.
- 05 އަހަރާއި 09 އަހަރާ ދެމެދުގެ އެންމެ ރަނގަޅު ޅެން ހުށަހެޅުމަކަށް 1000 ރުފިޔާ.
- 10 އަހަރާއި 14 އަހަރާ ދެމެދުގެ އެންމެ ރަނގަޅު ބަނދި ހުށަހެޅުމަކަށް 1000 ރުފިޔާ.
- 10 އަހަރާއި 14 އަހަރާ ދެމެދުގެ އެންމެ ރަނގަޅު ޅެން ހުށަހެޅުމަކަށް 1000 ރުފިޔާ.
- ފޭސްބުކްގައި އެންމެ ޕޮޕިއުލަރ ހުށަހެޅުމަކަށް 1000 ރުފިޔާ.
ފުވައްމުލަކު ބަހުން އޮންލައިންކޮށް ބަންޖާއި ޅެން ކިޔުމުގެ މުބާރާތް “މިނިވަން ވާދަ 2020″ގައި ބައިވެރިވުމުގެ މުއްދަތު އިތުރުކޮށްފިއެވެ. މުބާރާތް އިންތިޒާމްކުރާ ފަރާތުން މަޢުލޫމާތު ދެއްވި ގޮތުގައި މުއްދަތު އިތުރުކުރީ ފުވައްމުލަކު ބަހުން ޅެމާއި ބަނދިފަދަ ތަކެތި ޢާންމު ގޮތެއްގައި ލިބެން ނުހުންނާތީ ކުދިން ބައިވެރިކުރާން ބޭނުންވާ މީހުންނަށް އެ ފަދަ އެއްޗެހި ހޯދުމަށް ދަތިތަކެއް ހުރުމުން މުއްދަތު އިތުރުކޮށްދިނުމަށް ގިނަ ބަޔަކު އެދެމުން ދާތީއެވެ.
މި މުބާރާތުގެ މަޤްޞަދުތަކުގެ ތެރޭގައި ފުވައްމުލަކު ބަހުގެ އަދަބިއްޔާތު މުއްސަނދިކުރުން ހިމެނިފައި ވާތީ ބައިވެރިކުރާ ކުދިންގެ ތެރެއިން އެ ފަދަ ތަކެތި ހޯދުމަށް ދަތިވާ ކުދިންނަށް ޅެމާއި ބަނދި ހޯދައިދިނުމަށްވެސް އިންތިޒާމްކުރާ ފަރާތުން އެހީތެރިވެދޭން ވަނީ ނިންމާފައެވެ. އެ ގޮތުން އިންތިޒާމްކުރާ ފަރާތުން އެ ފަދަ ތަކެތި ލިބޭނޭ މަގުތައް ދައްކައިދޭނޭ ކަމަށް ވަނީ ވިދާޅުވެފައެވެ.
މި ފަހަރު މުއްދަތު އިތުރު ކުރި އިރު ވަނީ ބައިވެރިވެވޭނޭ އިތުރު ޢުމުރުފުރައެއް ވެސް ހިމަނާފައެވެ. ކުރިން އޮތް ގޮތުން މުބާރާތުގައި ބައިވެރި ކުރެވެނީ 05 އަހަރާއި 09 އަހަރާ ދެމެދުގެ ކުދިން އެކަންޏެވެ. މިހާރު ވަނީ އޭގެ އިތުރުން 10 އަހަރާއި 14 އަހަރާ ދެމެދުގެ ޢުމުރުފުރަޔަށް ވެސް ހުޅުވާލާފައެވެ. އިންތިޒާމް ކުރި ފަރާތުން ވިދާޅުވި ގޮތުގައި އިތުރު ޢުމުރުފުރައެއް ހިމަނާން ނިންމީވެސް އެ ޢުމުފުރައިން ބައެއް ކުދިން ބައިވެރި ކުރުމަށް އެދެމުންދާތީ އެ ކުދިންނަށް ވެސް ފުރުޞަތު ދިނުމުގެ ގޮތުންނެވެ. ކުރިން އިޢުލާން ކުރި ހަމައިން މި ޢުމުރުފުރަޔަށް ވެސް އެއް މިންވަރަކަށް އިނާމު ވަނީ ކަނޑައެޅިފައެވެ.
މިނިވަން ވާދަ 2020 މި މުބާރާތަކީ މި އަހަރުގެ މިނިވަން ދުވަހުގެ މުނާސަބާގައި FatheyS ފޭސްބުކް ޕޭޖުން އިންތިޒާމްކޮށްގެން އެ ޕޭޖު މެދުވެރިކޮށް ބާއްވާ މުބާރާތެކެވެ.
މިހާރު އޮތް ގޮތުން މުބާރާތް ކުރިޔަށް ދާނީ އޮގަސްޓް 15ވަނަ ދުވަހުގެ ނިޔަލަށެވެ. ބައިވެރި ކުރައްވާ ކުދީން ލައްވައި ފުވައްމުލަކު ބަހުން ބަންޖެއް ނުވަތަ ޅެމެއް ކިޔުއްވައި ވީޑިއޯ ކުރުމަށްފަހު 9753939 ނަންބަރަށް ވައިބާ ކުރާނީއެވެ.
މި މުބާރާތުގައި ބައިވެރި ކުރެވެނީ ފުވައްމުލަކު ބަހުން ހަދައިފައި އޮންނަ ޤައުމީ ޅެމެއް ނުވަތަ ބަންޖެކެވެ. ޅެން ހުންނަންޖެހެނީ 5 ބައިތާއި 10 ބައިތާ ދެމެދުގެ ދިގުމިނެއްގައެވެ. ބަންޖަކަށް ވަކި މިންގަނޑެއް ނެތެވެ. އިންތިޒާމްކުރައްވާ ފަރާތުން ވިދާޅުވި ގޮތުގައި މި މުބާރާތުގައި ބަންޖާއި ޅެމުގެ ޅެންވެރިކަމުގެ ފެންވަރަކަށް އެއްވެސް ވަރަކަށް ނުބަލާނެއެވެ. ބަލާނީ ހަމައެކަނި ކިޔުމަށެވެ. އެ ގޮތުން ފަނޑިޔާރު ކުރުމުގެ މިންގަނޑެއްގެ ގޮތުގައި ހަމަޖައްސާފައިވަނީ ކިޔުންތެރިކަމަށް 70، ހުށަހެޅުންތެރިކަމަށް 20، އަކުރު އަދާކުރުމަށް 10އެވެ. ކުދިންގެ ކިޔުން ވީޑިއޯ ކުރާއިރު ވީހާވެސް އަޑު ސާފުކޮށް ހުންނާނޭހެން ވީޑިއޯ ކުރުމަށް ސަމާލުކަން ދޭންވާނޭ ކަމަށް އިންތިޒާމްކުރާ ފަރާތުން ވިދާޅުވިއެވެ. ވީޑިއޯ ރިކޯޑުކުރާން ވާނީ ލޭންޑްސްކޭޕްކޮށެވެ.
ފޭސްބުކްގައި އެންމެ ޕޮޕިއުލަރ ވީޑިއޯއެއްގެ ގޮތުގައި ހޮވުމަށްޓަކައި ކެމްޕޭން ކުރުމަށް ވީޑިއޯތައް FatheyS ފޭސްބުކް ޕޭޖަށް އަޕްލޯޑް ކުރުމަށްފަހު ކެންޕޭނު ކުރުމަށް 10 ދުވަހުގެ މުއްދަތެއް ދޭ ގޮތަށް ވަނީ ހަމަޖެހިފައެވެ. އެންމެ ޕޮޕިއުލަރ ވީޑިއޯގެ ގޮތުގައި ހޮވޭނީ އެންމެ ގިނަ ރިއެކްޓް ލިބޭ ވީޑިއޯއެކެވެ.
މި މުބާރާތުގައި ބައިވެރި ވުމަށްޓަކައި ބައިވެރިކުރާ ކުދިންގެ އައިޑީ ފޮޓޮޔާއެކު ވީޑިއޯތައް ފޮނުވުމުގެ ސުންގަޑިއަކީ އޮގަސްޓް މަހުގެ 15ވަނަ ދުވަހުގެ ހަވީރު 06:00 އެވެ. އިންތިޒާމްކުރާ ފަރާތުން މަޢުލޫމާތު ދެއްވައިފައިވާ ގޮތުގައި މިހައިތަނަށް މުބާރާތުގައި ބައިވެރި ކުރުމަށްޓަކައި ފޮނުވާފައި ހުރި ވީޑިއޯތައްވެސް އަޕްލޯޑް ކުރާނީ ފަހުން ކަނޑައެޅުނު ސުންގަޑި ހަމަވުމުންނެވެ. ސުންގަޑި ހަމަވުމުން 3 ދުވަހުގެ ތެރޭގައި ވީޑިއޯތައް FatheyS ޕޭޖަށް އަޕްލޯޑް ކުރެވޭނެއެވެ.
ޚިޔާލުތައް