މުހައްމަދު ޝިހާބް މިއަދު އެމްޑީޕީ ޕާލެމަންޓަރީ ގްރޫޕުން ބޭއްވި މިނިސްޓަރު މަލީޙު ޖަމާލުގެ އިތުބާރު ނެތްކަމުގެ މައްސައްލައިގެ ޖަލްސާގައި އެމްޑީޕީއަށް ނިސްބަތްވާ ފުވައްމުލަކު މަޖުލިސް 3 މެމްބަރުން ވެސް ބައިވެރިނުވާ ކަމަށް ހާމަކުރައްވައިފިއެވެ.
ފުވައްމުލަކު ދެކުނު ދާއިރާގެ މަޖުލިސް މެމްބަރު މުހައްމަދު މުމްތާޒު ވިދާޅުވީ އޭނާ ދެކިލައްވާ ގޮތުގައި އެއީ މަސްލަހަތު ފުށުއެރުން އޮތް މައްސަލައެއް ކަމަށްވާތީ އެ ޖަލްސާގައި ބައިވެރިނުވާން ނިންމީ ކަމަށެވެ. މެދު ދާއިރާގެ މެމްބަރު ހުސޭން މުހައްމަދު އާއި އުތުރު ދާއިރާގެ މެމްބަރު މުހައްމަދު ރަޝީދު (ދޮންބެ) ވެސް ޖަލްސާގައި ބައިވެރިނުވާ ކަމަށް މެމްބަރު ރަޝީދު ވިދާޅުވިއެވެ.
މިއަދު ބޭއްވި އެމްޑީޕީގެ ޖަލްސާއިން ނިންމާފައި ވަނީ ފުވައްމުލަކަށް ނިސްބަތްވާ ހަމައެކަނި ކެބިނެޓް މިނިސްޓަރު، ސައިންސް އެންޑް ޓެކްނޮލޮޖީ މިނިސްޓަރު މަލީޙު ޖަމާލުގެ އިތުބާރު ނެތް ކަމަށް ރައީސް އިބްރާހިމް މުހައްމަދު ސޯލިހުއަށް ދެންނެވުމަށެވެ.
މީގެ ކުރިން މަލީހުގެ އިތުބާރުނެތްކަމަށް އެމްޑީޕީގެ 10 މެމްބަރަކު ސޮއިކޮށް މަޖުލީހަށް މައްސަލަ ވައްދާފައި ވެއެވެ. މިމައްސަލާގައި އިސްކޮށް އުޅުވީ މާލޭގެ މެމްބަރުންނެވެ. މަޖުލީހަށް ވެއްދި އިތުބާރުނެތްކަމުގެ މައްސަލާގައި ވެސް ފުވައްމުލަކަށް ނިސްބަތްވާ 3 މެމްބަރުން ކުރެ މެމްބަރަކު ސޮއި ކުރައްވާފައެއް ނުވެއެވެ. މިނިސްޓަރު މަލީހުގެ އިތުބާރުނެތްކުމުގެ މައްސަލަ މި މަހުގެ 15 ވަނަ ދުވަހު މަޖުލީހަށް ވެއްދީ ގަލޮޅު ދެކުނު ދާއިރާގެ މެންބަރު މީކާއިލް ނަސީމެވެ.
މިނިސްޓަރު މަލީހު ތުހުމަތު ކުރައްވާ ގޮތުގައި އޭނާގެ އިތުބާރު ނެތްކަމުގެ މައްސަލަ ހުށަހަޅާފައި ވަނީ އޭނާ ވީޓީވީގައި ބަރުލަމާނީ ނިޒާމާއި މެދު ޚިޔާލު ފާޅުކުރި ގޮތަކާއި ގުޅިގެންނެވެ. އޭނާގެ މަސްއޫލިއްޔަތު ބަރާބަރަށް އަދާ ކުރައްވަމުން ގެންދަވާކަމަށް މަލީހު ވިދާޅުވެއެވެ.
ނަމަވެސް އިތުބާރު ނެތްކަމުގެ މައްސަލާގައި ތުހުމަތު ކޮށްފައި ވަނީ މިނިސްޓަރު މަލީހުގެ ދަށުން ހިންގާ ކޮމިއުނިކޭޝަންސް އޮތޯރިޓީއިން ހަދަން ޖެހޭ އެއްވެސް ގަވާއިދެއް މަގާމުގައި ހުންނަވާތާ ދެ އަހަރު ވީއިރު ވެސް ހަދާފައިނުވާތީ ކަމަށެވެ. އަދި އެ ވުޒާރާގެ ވަޒީރުގެ ޒިންމާތައް އަދާ ނުކުރެވި ހޭދަވާ ކޮންމެ ދުވަހަކީ ދައުލަތަށާއި، ރައްޔިތުންނަށް އެތަކެއް ގެއްލުންތަކެއް ކުރިމަތިކުރުވާ ކަމެއްކަން ކަށަވަރުވާ ހިނދު މިނިސްޓަރުގެ ފަރާތުން އެއްވެސް އެއްބާރުލުމެއް ދެއްވާފައި ނުވާ ކަމަށާއި އަދި އެކަމަށް ހުރަސް އަޅުއްވާފައިވާކަން ސާފުވާ ކަމަށް އެމްޑީޕީ ޕީޖީ ގްުރޫޕަށް އަދި ރައްޔިތުންގެ މަޖުލީހަށް ހުށަހެޅި މަސައްލާގައި ވެއެވެ.
މަލީހުގެ ޓްވީޓް
އެހެންކަމުން މިނިސްޓަރު މަލީހު އިތުރަށް މަގާމުގައި ބެހެއްޓުމަކީ އެމްޑީޕީއަށް އިތުބާރު އޮތް ކަމަކަށް ނުވާތީ އާއި، ގިނަ ރައްޔިތުންތަކެއް އޭނާ މަގާމުން ވަކިކުރުމަށް ކެނޑިނޭޅި އެދުމުންދާތީ މަލީހު މަގާމުން ވަކިކުރަން ހުށައަޅާ ކަމަށެވެ.
މި ވާހަކަތަކަށް ރައްދު ދެއްވަމުން މަލީހު ވިދާޅުވެފައި ވަނީ، އެއްވެސް ޒިންމާއެއް އަދާނުކުރައްވައި ނޯންނާނެ ކަމަށެވެ. އެގޮތުން އެ ވުޒާރާއާ ހަވާލުކުރެވިފައިވާ މަސައްކަތްތައް ބަރާބަރަށް ކުރައްވަމުން ގެންދަވާ ކަމަށެވެ. އަދި އިންޓަރނެޓް އަގު ހެޔޮ ކުރުމަށް އެ މިނިސްޓްރީން ކުރަން ޖެހޭ މަސައްކަތް ނިންމައި ރައީސް އޮފީހާ އެ ކަރުދާސް ހިއްސާކުރައްވާފައިވާ ކަމަށެވެ.
މަލީހުގެ މިނިސްޓްރީގެ މަސައްކަތްތަކަށް ފުވައްމުލަކުގެ އެމްޑީޕީ ބައެއް ސަޕޯޓަރުންގެ ވެސް ފާޑުކިޔުން ދޭތެރެ ދޭތެރެއިން ސޯޝަލް މީޑިއާގައި ފެންމަތިވެއެވެ.
އެމްޑީޕީގެ މަޖުލިސް މެމްބަރުންގެ މި ނިންމުމަށް ރައްދު ދެއްވަމުން މަލީހު ވިދާޅުވެފައި ވަނީ ބޭއިންސާފުގެ ކުރިމަތީގައި ދުވަހަކުވެސް ކުޑަ ކަކޫ ނުޖަހާނެ ކަމަށެވެ. މިއަދު އެމްޑީޕީ ޕީޖީ ގްރޫޕްގެ ނިންމުމަށް ރައްދެއްވައި މަލީހު ކުރެއްވި ޓްވީޓެއްގައި ވދާޅުވެފައި ވަނީ “ތިމަންނާމެންގެ ވެރިކަމެއްގައި ގާނޫނު އަސާސީގެ 27 ވަނަ މާއްދާއަށް އިތުބާރު ނެތްކަމަށް ފާސްކުރުމަކީ، ހިޔާލު ފާޅު ކުރުމުގެ މިނިވަންކަމުގެ ތާޖު އަޅުއްވައިގެން އުޅުއްވާ ބޭފުޅުން ބައިކޮޅަށް ޖެހި ގޯލެއް. އަމިއްލަ ސަންދޯކަށް ތިޔަޖައްސަވަނީ މޮހޮރު” ކަމަށެވެ.
އެމްޑީޕީގެ މަޖުލިސް މެމްބަރުންނާއި މަލީހު އާއި ދެމެދު ސޯޝަލް މީޑިއާގައި ބަހުގެ ހަމަލާތައް ބަދަލުކުރެވެމުން އަންނަތާ އަހަރެއްހާ ދުވަސް ވެދާނެއެވެ.
ޚިޔާލުތައް