މުހައްމަދު ޝިހާބް މަގުގެ ދެފަރާތުގައި ހައްދާފައިވާ ގަސްތަކާއި ބަހައްޓާފައިވާ ގަސްމުށިތައް ނަގައި މަގުސާފުކޮށް ބޭއްވުމަށް ފުވައްމުލައް ސިޓީ ކައުންސިލުން އަންގައިފިއެވެ. އެގޮތުން ބަހައްޓާފައި ހުންނަ ތަކެތީގެ ސަބަބުން ހިނގާ މީހުންނަށާއި ދުއްވާތަކެއްޗަށް އުނދަގޫވާކުމުގެ ޝަކުވާ އެކައުންސިލަށް ލިބެމުން އަންނަ ކަމަށް ހާމަކުރެއެވެ.
މިހާރު ކުރިޔަށްދާ ފުވައްމުލަކުގެ އެތެރޭގެ މަގުތައް ޑިޒައިންކޮށް ހެދުމުގެ މަޝްރޫޢުގެ ތެރެއިން މަގު ކޮންނަމުންދާއިރު، ގޯތިން ބޭރު މަގުފާރު ކައިރީގައި ގަސްއިންދައި، ގަސްމުށި ފަދަތަކެތި ބަހައްޓައި އަދި، މަގުމައްޗަށް ވާގޮތަށް ތަޅުންއަޅާފައި ހުރުމުގެ ސަބަބުން މަސައްކަތަަށް ދަތިވަމުންދާކަން ފާހަގަކުރެވިފައިވާ ކަމަށް ވެސް ސިޓީ ކައުންސިލުގެ އިއުލާނުގައި ހާމަކޮށްފައިވެއެވެ.
މަގުމަތިގައި ގަސްހައްދާފައި. އަދި ތަޅުން އަޅާފައި
މަގުހެދުމުގެ މަސައްކަތ ކުރަމުން ދާއިރު މިގޮތަށް ނުނަގައި ބަހައްޓާފައި ހުންނަ ތަކެއްޗަށް ލިބޭ ގެއްލުމަށް ޒިންމާވާން ޖެހޭނީ އެތަކެތީގެ ވެރިފަރާތުން ކަމަށް އަންގާފައި ވެއެވެ.
ފުވައްމުލަކުގެ އެތެރޭގެ މަގުތަކުގެ މަސައްކަތް ކުރުމުގައި ލަސްތަކެއް ވާން ދިމާވާ އެއްސަބަބަކީ މަގުތައް ކޮނުމުގައި ދިމާވާ ތަފާތު ހުރަސްތަކާއި ހެދިކަމަށް، މަސައްކަތް ކުރާ އެމްޓީސީ އިން މީގެ ކުރިން ހާމަކޮށްފައި ވެއެވެ. އަދި މަގުތައް ކޮނުމުގައި ކޭބަލްތައް ބުރިވާ މަސައްލަ އަވަހަށް ދިނުމުގެ ގޮތުން ފުވައްމުލަކުގައި ކޭބަލް ވަޅުލާފައިވާ ފަރާތްތަކާއެކު އެމްޓީސީސީން ވަނީ މަޝްވަރާކޮށްފައެވެ.
މަގުގައި ގަސްހައްދާފައި
އެމްޓީސީސީއިން ފުވައްމުލައް ސިޓީގެ އެތެރޭގެ މަގުތައް ހެދުމުގައި ލަސްތަކެއް ވާކަމުގެ ޝަކުވާ ވެސް އޮތީ ބޮޑުވެފައެވެ. އެކަމާއި ގުޅިގެން އެމްޓީސީސީއިން ވަނީ މަސައްކަތް ހަލުއިކުރުމުގެ ގޮތުން އިތުރު މީހުން މަގުގެ މަސައްކަތަށް ނެގުމަށް ހުޅުވާލާފައެވެ.
ފުވައްމުލަކު އެތެރޭގެ މަގު ހެދުން. 21 ޖުލައި 2020
ޚިޔާލުތައް