އިބްރާހިމް ލަތީފް އެމެރިކާގެ ރައީސް ޑޮނަލްޑް ޓްރަމްޕް ދެވަނަ ފަހަރަށް އެމެރިކާގެ ގާނޫނު ހަދާ މަޖިލީހުގެ ތިރީގެ ހައުސް އޮފް ރެޕްރެސެންޓޭޓިވްސް އިން އިންޕީޗުކޮށްފިއެވެ. މިއީ އެމެރިކާގެ ތާރީޚުގައި އެގައުމުގެ ވެރިކަން ކުރަމުންދިޔަ ރައީސަކު ދެފަހަރަށް އިންޕީޗުކުރެވުނު ފުރަތަމަ ފަހަރެވެ. އެމެރިކާގެ ރައީސް ޓްރަމްޕް މިފަހަރު އިންޕީޗުކުރެވުނީ މިިދިޔަ ހަފުތާގެ ބުދަ ދުވަހު އެމެރިކާގެ ގާނޫނުހަދާ މަޖިލީހަށް ޓްރަމްޕްގެ ސަޕޯޓަރުންތަކެއް ވަދެ ހިންގި ހަމަނުޖެހުމާއި ގުޅިގެނެވެ.
ޓްރަމްޕް އިންޕީޗުކޮށްފައިވަނީ އެމެރިކާގެ ގާނޫނުހަދާ މަޖިލީހުގެ ތިރީގޭގައި އިއްޔެ (ދިވެހި ގަޑިން ރޭ) ބޭއްވި ޖަލްސާގައި 232 މެންބަރުންގެ އަޣުލަބިއްޔަތުންނެވެ. އިއްޔެގެ ވޯޓުގައި ޓްރަމްޕް އިންޕީޗުކުރުމަށް ޓްރަމްޕް ނިސްބަތްވާ ރިޕްބްލިކަން ޕާޓީގެ 10 މެންބަރަކުވެސް ވޯޓުދެއްވިއެވެ. ޓްރަމްޕް ވަކިކުރުމާއި ދެކޮޅަށް ރިޕަބްލިކަން ޕާޓީގެ 197 މެންބަރަކު ވޯޓު ދެއްވިއެވެ.
އެމެރިކާގެ ގާނޫނުހަދާ ތިރީގެއިން ޓްރަމްޕް ވަކިކުރުމަށް ނިންމިނަމަވެސް ޓްރަމްޕް ވެރިކަމުގައި ހުއްޓާ މަގާމުން ވަކިކުރެވުމަކީ ދުރުކަމެކެވެ. ސަބަބަކީ ޓްރަމްޕްގެ ވެރިކަމުން ދުރުކުރުމަށް ގާނޫނުހަދާ މަތިގެއިންވެސް ފާސްކުރަން ޖެހުމާއި އަދި ޓްރަމްޕްގެ ވެރިކަމުގެ މުއްދަތު މިޖެނުއަރީ 20 ވަނަ ދުވަހު ހަމަވާތީއެވެ.
އެމެރިކާގެ ރައީސަކު ރައީސްކަމުން ދުރުކުރުމުގައި ދެމަރުހަލާއެއްވެއެވެ. އެގޮތުން ފުރަތަމަ މަރުހަލާއަކީ ގާނޫނުހަދާ ތިރީގެއިން ފާސްކުރުމެވެ. ތިރީގެއިން ފާސްކުރުމުން އެމައްސަލަ މަތިގެ (ސެނެޓް) އަށް ހުށަހެޅޭނެއެވެ. އަދި ސެނެޓުގައި އެމައްސަލަބަލާ ޖަވާބުދާރީވުމަށް ފުރުސަތުވެސް ދެވޭނެއެވެ. ރައީސް ރައީސްކަމުން ދުރުކުރެވޭނީ އެއަށްފަހުގައެވެ. އެހެންކަމުން، މިމައްސަލަ ނިމޭނެކަމަށް ބެލެވެނީ ޓްރަމްޕްގެ ވެރިކަން ނިމުމުގެ ފަހުންނެވެ. ވެރިކަން ނިމުމުގެ ފަހުން ސެނެޓުން މައްސަލަ ބެލޭނެއެވެ. އަދި މައްސަލައިގެ ގޮތުން ކުރިއަށް އޮތް ރިއާސީ އިންތިޚާބަށް ކުރުމަތިނުލެވޭ ގޮތަށް ނިންމުމަކީވެސް ދުރުކަމެއްނޫނެވެ. އަދި ރައީސަށް ލިބިދޭ އިނާޔަތްކުން އެކަހެރިވެސް ކުރެވިދާނެއެވެ. އެހެންކަމުން، ޓްރަމްޕްގެ ރައީސްކަމުގެ މުއްދަތު ނިމުނު ނަމަވެސް އެމައްސަލަ ކުރިއަށް ގެންދިއުމަށް ގާނޫނުހަދާ މަޖިލީހުގެ މެންބަރުން ތިބީ ބޭނުންވެފައެވެ.
ޓްރަމްޕް މަގާމުން ދުރުކުރުމަށް އެމެރިކާގެ ގާނޫނުހަދާ ތިރީގެއިން ނިންމާފައިވަނީ މިދިޔަ ބުދަ ދުވަހު ހިގި ހަމަނުޖެހުމާއި ގުޅިގެނެވެ. އެ ހަމަނުޖެހުމުގައި 6 މީހަކު މަރުވެފައިވެއެވެ.
އެހަމަނުޖެހުން ހިންގާފައިވަނީ ޓްރަމްޕްއަށް ސަޕޯޓުކުރާ ފަރާތްތަކުން ބޭއްވި އެއްވުމެއް ނިންމާލުމަށްފަހުގައެވެ. އެއްވުމުގައި ޓްރަމްޕްވަނީ ބައިވެރިންނާއި މުޚާތަބުކޮށް އެފަދަ ހަމަނުޖެހުމަކަށް ހިތްވަރު ލިބޭ ގޮތަށް ވާހަކަދައްކާފައެވެ. އެގޮތުން “އަހަރެމެން ވައްކަންކުރުން (ވޯޓުން ވައްކަންކޮށްގެން ވެރިކަމަށް އައުން) ހުއްޓުވާނަން”، “މިއަށްފަހު އަހަރެމުން ދާނީ، އަހަރެންވެސް ތިޔަބައިމީހުންނާއިއެކު ވާނަން، ކެޕިޓަލް އާދިމާލަށް” ފަދަ އިބާރާތުން އެއެއްވުމުގައި ވާހަކަ ދެއްކެވިއެވެ. ޓްރަމްޕް އެއެއްވުމުގައި ބުނިބީދައިން އެއެއްވުން ނިންމާލައިފައި އެއެއްވުމުގެ ބައިވެރިން މިސްރާބުޖެހީ އެމެރިކާގެ ގާނޫނުހަދާ މަޖިލިސް ހިންގާ ކެޕިޓަލް އިމާރާތަށެވެ. އެއިމާރާތާއި ދިމާލަށް ޓްރަމްޕެގެ ސަޕޯޓަރުން މިސްރާބުޖެހިއިރު އެމެރިކާގެ ގާނޫނުހަދާ މަޖިލީހުގައި ކުރިއަށްދިޔައީ އެމެރިކާގެ ރިއާސީ އިންތިޚާބުގެ ނަތީޖާ އެމެރިކާގެ ގާނޫނުހަދާ މަޖިލީހުން ބަލައިގަތުމުގެ ޖަލްސާއެވެ. ޓްރަމްޕްގެ ސަޕޯޓަރުން ހިންގި މިހަމަނުޖެހުމުގައި 6 މީހަކު މަރުވުމުގެ އިތުރުން އެއިމާރާތުގެ އެތަކެއްޗަކަށް ގެއްލުންދީފައިވެއެވެ.
ޚިޔާލުތައް