މުހައްމަދު ޝިހާބް އެމްޑީޕީ ކޯލިޝަން ސަރުކާރުގައި ހިމެނިވަޑައިގަންނަވާ ފުވައްމުލަކަށް ނިސްބަތްވާ ހަމައެކަނި މިނިސްޓަރު މުހައްމަދު މަލީޙު ޖަމާލުގެ އިތުބާރު ނެތްކަމަށް ރައްޔިތުންގެ މަޖުލީހުން ފާސްކޮށް މަގާމުން ވަކިކޮށްފިއެވެ.
ޓެލެކޮމިއުނިކޭޝަން ސައިންސް އެންޑް ޓެކްނޮލޮޖީ މިނިސްޓަރު މުހައްމަދު މަލީހު ޖަމާލުގެ އިތުބާރު ނެތްކަަމަށް މައްސަލަ މަޖުލީހަށް ވެއްދީ އެމްޑީޕީގެ ޕާލަމެންޓަރީ ގުރޫޕުންނެވެ. އަދި އެއާއި އެގޮތަށް ވޯޓު ދިނުމަށް ތްރީލައިން ވިޕެއްވެސް ނެރެފައި ވެއެވެ.
މިއަދުގެ މަޖުލިސްގައި މަލީހު މަގާމުން ވަކިކުރުމަށް ނެގި ވޯޓުގައި ފުވައްމުލަކުގެ އެއްވެސް މެމްބަރަކު ބައިވެރިވެފައެއް ނުވެއެވެ. މިއަދުގެ ވޯޓުގައި މަލީހުގެ މައްޗަށް އިތުބާރު ނެތްކަމަށް 59 މެމްބަރަކު ވޯޓު ދެއްވިއިރު ނުފެންނަ ކަމަށް ވޯޓު ދެއްވީ އެންމެ މެމްބަރެކެވެ. އަދި ވަކިގޮތަކަށް ވޯޓު ނުދެއްވާ 4 މެމްބަރަކު ތިއްބެވިއެވެ. ރައްޔިތުންގެ މަޖިލީހުގެ ސުޕާމެޖޯރިޓީ އެމްޑީޕީއަށް އޮންނައިރު މިނިސްޓަރެއްގެ އިތުބާރުނެތްކަމަށް ފާސްކުރަން ބޭނުންވަނީ މަޖިލީހުގެ އަޣުލަބިއްޔަތު ކަމުގައި ވާ 43 ވޯޓެވެ.
ކޮމިއުނިކޭޝަން އެންޑް ސައިން މިނިސްޓަރ މަލީހުގެ އިތުބާރު ނެތްކަމަށް ނެގި ވޯޓު ވަކިކޮށްފި. 1 މާރިޗް 2021
މިނިސްޓަރު މަލީހު އާއި މެދު ތުހުމަތު ކުރެވި އިތުބާރު ގެއްލިފައިވަނީ ކޮމިއުނިކޭޝަން މިނިސްޓްރީން ހަދަން ޖެހޭ އެއްވެސް ގަވައިދެއް މަލީހު މަގާމުގައި ހުންނަވާތާ ދެ އަހަރުވީ އިރު ވެސް ހަދާފައިނުވާ ކަމަށް ތުހުމަތުކޮށްގެންނާއި އިންޓަނެޓްގެ އަގުހެޔޮކުރުމަށް އަމަލީ ސިފައެއް ނުގެންނެވުމާއި، މިކަންކަމާއި ގުޅިގެން ޖަވާބުދާރީވުމަކީ މުވާސަލާތީ ހިދުމަތްތައް ތަންފީޒުކޮށް ހިންގުމުގެ މަސްއޫލިއްޔަތު އެ އިރެއްގައި ހަވާލުކޮށްފައިވާ ވުޒާރާއެއްގެ ވަޒީރުގެ ޒިންމާއެއް ކަމަށް ރާއްޖޭގެ ކޮމިއުނިކޭޝަންސް އޮތޯރިޓީ އޮފް މޯލްޑިވްސްގެ ގާނޫނުގެ ދެ ވަނަ މާއްދާގެ (ނ) ގައި ކަނޑައެޅިފައިވާ ކަމަށް ބަލައިގެންނެވެ.
މިކަމާއި ގުޅިގެން މިއަދުގެ މަޖުލީހުގެ ތަޅުމުގައި ވެސް މަލީހު ވަނީ އެއީ ދޮގު ތުހުމަތުތަކެއް ކަމަށް ބުނެ އިންކާރުކޮށްފައެވެ. މަލީހު މިއަދު ވިދާޅުވެފައި ވަނީ އެއީ ހަދާފައިވާ ގަވާިއދުތަކެއްކަމަށެވެ.
މަލީހު މިއަދުވެސް ތަކުރާރު ކުރެއްވީ އެމްޑީޕީގެ ޕާލަމެންޓްރީ ގްރޫޕްގެ މަދު ބޭފުޅުންކޮޅެއް ހިތްހަމަޖެހި ވަޑައިނުގެން އިތުބާރުނެތްކަމުގެ ވޯޓު ނަގަނީ ވީޓީވީގެ ޕްރޮގްރާމެއްގައި އަމިައްލަ ހައިސިއްޔަތުން ބަރުލަމާނީ ނިޒާމާ ގުޅޭގޮތުން ދެއްކެވި ވާހަކަތަކާ ގުޅިގެން ކަމަށެވެ. އެއީ، ގާނޫނުއަސާސީގެ 27 ވަނަ މާއްދާއިން ވަޒީރަކަށް ވެސް ލިބިފައި އޮންނަ ހައްގެއް ކަމަށާއި ރިޔާސީ ނިޒާމުގެ ދިފާއުގައި ވާހަކަ ދެއްކެވުމަކީ އަބަދުވެސް ކުރާނެ ކަމެއް ކަމަށް މަލީހް ވިދާޅުވި އެވެ.
މިއަދު މަލިހުގެ ވާހަކަތައް ހުރީ މަޖުލީހުގެ މެމްބަރުންނަށް ގޮންޖައްސަވާފަދަ ގޮތަކަށެވެ. އަދި މަޖުލީހުގެ ޖަލްސާ ކުރިޔަށް ގެންދެވީ ގާނޫނާއި ޚިލާފަށްކަމަށް ވެސް މަލީޙު ތުހުމަތު ކުރެއްވިއެވެ. ނަމަވެސް ރިޔާސަތުން ޔަގީންކޮށްދެއްވީ މަޖުލިހުގެ ޖަލްސާ ކުރިޔަށްދަނީ ގާނޫނޢި އުސޫލުތަކާއި އެއްގޮތަށް ކަމަށެވެ.
ޚިޔާލުތައް