އިބްރާހިމް ލަތީފް ރައްޔިތުންގެ މަޖިލީހުން އިތުބާރުނެތްކަމަށް ނިންމާ މަގާމުން ދުރުކޮށްފައިވާ ޖުމްހޫރީ ޕާޓީގެ ޓިކެޓެއްގައި ކެބިނެޓަށް އައްޔަންކޮށްފައިވާ ކުރީގެ ޓެލިކޮމިއުނިކޭޝަން ސައިންސް އެންޑް ޓެކްނޮލޮޖީ މިނިސްޓަރު މުހައްމަދު މަލީހު ޖަމާލު ޖުމްހޫރީ ޕާޓީއަށް ފާޑުކިއުމަށްފަހު އެޕާޓީއާއި ފެއަށް ޖެހިލައިފިއެވެ. ޖުމްހޫރީ ޕާޓީއަށް މަލީހު ފާޑުކިޔާފައި މިވަނީ، ލޯކަލް ކައުންސިލްތަކުގެ އިންތިހާބަށް ކެމްޕޭން ކުރަން އިދިކޮޅުން ބޭއްވި އެއްވުމެއްގައި މަލީހު ބައިވެރިވުމުން، އެޕާޓީއިންވެސް މަލީހުގެ އަމަލު ކުށްވެރިކޮށްފައި ވަނިކޮށެވެ.
ޖޭޕީއަށް މަލީހު ފާޑު ކިޔާފައިވަނީ، ކުރީގެ ޓޫރިޒަަމް މިނިސްޓަރު އަލީ ވަހީދަށް ބޮޑެތި ތުހުމަތުތަކެއްކޮށް، އޭނާ މަގާމުން ވަކިކުރި އިރު އޭނާއާ ދޭތެރޭގައި ފިޔަވަޅެއް އަޅާފައި ނުވާތީ އާއި މަލީހު ވަކިކުރިއިރު އެ ޕާޓީން އެެއްްޗެއް ބުނެފައިނުވާތީއެވެ.
“ސަރުކާރުތެރޭ ޖޭޕީގެ އަޑު އެންމެ އިޚުލާސްތެރިކަމާއި އެކު އުފުލި މީހާއާއި ދޭތެރޭ ބޭއިންސާފު ހުސްކޮށް އެމްޑީޕީއިން ކަންކުރަމުން ދިޔަ އިރު ހަނު. ބޮޑެތި ތުހުމަތުތަކާއި އެކު ވަކި ކުރެވުނެ ފަރާތްތަކާއި މެދު ފިޔަވަޅު ނާޅާ. ކޯލިޝަންގައި ދަލު ބޭރުން. މިވަގުތު ޖޭޕީއާއި ފެޔަށް ޖެހިލާނަން” ޖޭޕީ އާއި ދުރަށް ޖެހުނުކަން ހާމަކުރައްވަމުން ރޭ މަލީހު ކުރެއްވި ޓްވީޓުގައިވެއެވެ.
ފުވައްމުލަކު ސިޓީ ކައުންސިލަށް ވާދަކުރާ އިދިކޮޅު ކެންޑިޑޭޓުންގެ ޖަގަހައެއް މާލޭގައި ހުޅުވުމުގެ ރަސްމިއްޔާތުގައި މަލީހު ބައިވެރިވެ ވަޑައިގެންނެވި އިރު، ޕީޕީއެމް/ޕީއެންސީގެ އިސް ބޭފުޅުން ވެސް އެ ހަރަކާތުގައި ބައިވެރިވެވަޑައިގަތެވެ. މަލީހު ވިދާޅުވި ގޮތުގައި އެ ހަރަކާތުގައި ބައިވެރިވެ ވަޑައިގަތީ އޭނާ ނިސްބަތްވެ ވަޑައިގަންނަވާ ފުވައްމުލަކުގެ ޒުވާނުންގެ ދައުވަތަކަށެވެ.
މަލީހުގެ މިއަމަލު ކުށްވެރިކުރައްވައި މަލީހާއިއެކު ޓެކްނޮލޮޖީ މިނިސްޓްރީގައި ސްޓޭޓް މިނިސްޓަރަކަށް ހުންނެވި އަލީ ސޯލިހު ވިދާޅުވީ ކެމްޕޭން ހަރަކާތުގައި މަލީހް ބައިވެރިވެ ވަޑައިގެންނެވީ އެ ޕާޓީއަށް އެނގިގެން ނޫން ކަމަށާއި މަލީހުގެ އެ އަމަލު ޖޭޕީއަކަށް ބަލައެއް ނުގަނެވޭނެކަމަށާއި އެކަން ހިނގައި ދިޔަ ގޮތް ބަލަމުންދާ ކަމަށެވެ.
ޚިޔާލުތައް