މުހައްމަދު ޝިހާބް އިއްޔެ ފުވައްމުލައް ސިޓީއިން ކޮވިޑް-19 އަށް ޕޮޒިޓިވް ވީ 3 މީހުންނެވެ. އެއީ މިހާރު ރަށުގައި އޮތް ކްލަސްޓާގެ ކޮންޓެކްޓުންގެ ތެރެއިން އެކަކާއި ހޯމް ކަރަންޓީނުން 2 މީހަކު ކަމަށް ފުވައްމުލަކު ހޮސްޕިޓަލުން ހާމަކުރައްވައެވެ.
މިއާއެކު، ކޮވިޑް-19 ގެ ދެވަނަ ރާޅާއެކު ފުވައްމުލައް ސޓީއިން ބައްޔަށް ޕޮޒިިވްވި މީހުންގެ އަދަދު މިވަނީ 17 އަށް އަރާފައެވެ. މިފަހަރު ފުވައްމުލައް ސިޓީއިން ފެނިފައި ވަނީ ކޮވިޑް-19ގެ އެއް ކްލަސްޓާއެވެ. ނަމަވެސް ފުރަތަމަ ފަހަރު 3 ކްލަސްޓާއަކުން މީހުން ޕޮޒިޓިވްވެފައި ވެއެވެ. މިއާއެކު ފުވައްމުލައް ސިޓީއިން ޖުމުލަ 4 ކޮވިޑް-19 ގެ ކްލަސްޓާ ފާހަގަ ކުރެވުނީއެވެ. މިފަހަރުގެ ކްލަސްޓާ ގުޅިފައިވަނީ ދިގުވާޑު އަވަށުގައި ހުންނަ މަސްޖިދުއް ސަފްވާ (ދިގުވާޑި މިސްކިތް)އަށް ނަމާދަށް ދިޔަ މީހުންގެ ތެރެއިންނެވެ.
ފުވައްމުލައް ސިޓީ ކޮވިޑް-19 އަޕްޑޭޓް 8 މެއި 2021
މިހާރު ފުވައްމުލައް ސިޓީގައި ބަލީގެ އެކްޓިވް 20 މީހުން އެބަތިއްބެވެ. އަދި ބަލިން ރަނގަޅުވެފައި ވަނީ 74 މީހެކެވެ. އަދި ބައްޔަށް ޕޮޒިޓިވްވި ޖުމްލަ މިވަނީ 93 އަށް އަރާފައެވެ. އިއްޔެ ރަށުން 60 ސާމްޕަލް ނަގާފައިވާއިރު މިހާތަނަށް ނެގި ސާމްޕަލްގެ ޖުމްލައަކީ 9677 އެވެ. ބަލީގެ ޑައިރެކްޓް ކޮންޓެކްޓުންގެ ގޮތުގައި އަލަށް 5 މީހަކު ފާހަގަ ކުރެވިފައިވެ ވެއެވެ.
މިއަދަދު ތަކަށް ބަލާއިރު ބަލި ކޮންޓްރޯލް ކުރެވިގެންދާކަމުގެ އަލާމަތްތައް ވަނީ ފެންނަން ފަށާފައެވެ. އެއީ މިފަރުގެ ފުރަތަމަ 13 ކޭސް އާއިއެކު ފާހަގަ ކުރެވުނު ގިނަ ޑައިރެކްޓް ކޮންޓެކްޓުންގެ ނަތީޖާތައް ނެގަޓިވް ވެފައިވާތީ އާއި އަދި ކޮންޓެކްޓުންގެ ތެރެއިން އަލަށް އެންމެ މީހަކު އިއްޔެ ޕޮޒިޓިވްވެފައި ވުމުންނެވެ. ނަމަވެސް ކޮމިއުނިޓީގައި ބަލި އޮތް މިންވަރު ބަލަނީ ރޭންޑަމް ސާމްޕަލްތަކުގެ ނަތީޖާއަށް ބަލާފައެވެ. އަދި ރޭންޑަމް ސާމްޕަލް ނަގަން ފެށިކަން ހާމަކޮށްފައެއް ނުވެއެވެ.
ކޮވިޑް-19ގެ ކޭސްތައް ފެނުމާއި ގުޅިގެން ފުވައްމުލައް ސިޓީ މޮނިޓަރިން އަށް ލިތަނާ މިއަދު މީ 3 ވަނަ ދުވަހެވެ. އަދި އެޗްޕީއޭގެ 7 ދުވަހުގެ ޚާއްސަ ފިޔަވަޅުތައް (ކާފިއު) މިވީ 2 ދުވަހެވެ. މިހާރު އެޗްޕީއޭގެ މޮނިޓަރިން ގައި ރާއްޖޭގެ 28 ރަށެއް އެބައޮތެވެ. ކައިރިން އައްޑޫ ސިޓީއާއި ގދ.ތިނަދޫ ވެސް އޮތީ މޮނިޓަރިންގައެވެ.
މިރާޅާއެކު ކޮވިޑް-19 ޖެހޭ މީހުންނަށް ކުރާ އަސަރު ބޮޑުކަމަށް ވެއެވެ. ވުމާއެކު ރައްޔިތުން މިކަމަށް ސަމާލުވެ ބަލިން ރައްކާތެރިވުމުގެ ކަންތައްތަކަށް ސަމާލުކަން ދިނުމަށް ތަކުރާރުކޮށް ކަމާބެހޭފަރާތްތަކުން އެދިފައި ވެއެވެ.
ކޮވިޑް-19ގެ ބަލި މީހުންގެ ތެރެއިން ޙާލުބޮޑުވެ ހޮސްޕިޓަލުގައި އެޑްމިޓްކުރާ %70 އަށް ވުރެ ގިނަ މީހުންނަކީ ކޮވިޑް-19ގެ ވެކްސިން ގެ އެއްވެސް ޑޯޒެއް ނުޖަހައި ތިބި މީހުންކަން ރޭގައި ބޭއްވި ނެޝަނަލް ހެލްތު އިމަޖެންސީ ސެންޓަރުގެ ނިއުސް ބްރީފައިގައި ހާމަކުރެއްވިއެވެ. ވުމާއެކު އެއިން އެނގިގެންދަނީ ވެކްސިންގެ ރައްކާތެރިކަން ބޮޑުކަމެވެ. ބަލި ޖެހުނު ނަމަވެސް ޙާލުބޮޑުވެ ހޮސްޕިޓަލުގައި އެޑްމިޓްކޮށްގެން ފަރުވާ ދޭން ޖެހުމުގެ ފުރުސަތު ކުޑަކަމެވެ.
ފުވައްމުލައް ސިޓީއަށް ދިމާވި ކޮވިޑް-19ގެ ފުރަތަމަ ރާޅާއެކު ކާފިއު އިއުލާންކުރީ 10 ފެބްރުއަރީ 2021 ގައެވެ. އެއިގެ 3 މަސް ދުވަސް ފަހުން މިވަނީ 2 ވަނަ ރާޅަކާއި ވެސް ކުރިމަތިލާން ޖެހިފައެވެ.
އިއްޔެ އެޗްޕީއޭއިން ވަނީ ފުވައްމުލައް ސިޓީއާއި އައްޑޫ ސިޓީގައި ކޮވިޑް-19 ފެތުރޭތީ ރައްކާތެރިކަމުގެ ގޮތުން ޚާއްސަ ފިޔަވަޅުތަކެއް އަޅައި ރަށުގައި އާއްމުކޮށް ބޭރަށް ނުކުމެ އުޅުން (ކާފިއު) ވަނީ 1 ހަފުތާއަށް (7-14 މެއި 2021) މަނާކޮށްފައެވެ. އެއާއެކު ޒަރޫރީ ބޭނުމެއްގައި ނޫނީ އެއްތަނުން އަނެއް ތަނަށް ދިއުމަކީ މަނާކަމެކެވެ.
މިހާލަތުގައި ފުވައްމުލައް ސިޓީއަށް ދަތުރުކުރެވޭނީ އެޗްޕީއޭގެ ޚާއްސަ ހުއްދައެއް ނަގައިގެންނެވެ. މިހުއްދައަށް އީމެިއލް މެދުވެރިކޮށް އެދޭވޭގޮތަށް ވަނީ ހަމަޖައްސާފައެވެ.
އަލުން ވެކްސިްން ޖަހަން ފަށަނީ ގުޅައިގެން ނަންނޯޓުކޮށްގެން
ވެކްސިން އަޕްޑޭޓްސް
ސިނޮފާމްގެ ވެކްސިން މިހާރު އުމުރުން 60 އަހަރުން މަތީގެ މީހުންނަށް ޖަހަން ޑަބްލއިޔު އެޗްއޯއިން އެޕްރޫވް ކުރުމުން ރާއްޖޭގައި ވެސް އެވެކްސިން 60 އަހަރުން މަތީގެ މީހުންނަށް ވެސް ޖެހުމަށް ވަނީ ހުޅުވާލާފައެވެ. އެގޮތުން ސިނޮފާމް ވެކްސިންގެ ފުރަތަމަ ޑޯޒް ނުވަތަ 2 ވަނަ ޑޯޒް ޖަހަން އެދޭ ފަރާތްތަކުން ކާފިއުގެ މިދުވަސް ވަރު ޖެހެނީ ފުވައްމުލަކު ހޮސްޕިޓަލުގެ 6860658 އަށް ހެނދުނު 11:00 ގެ ކުރިން ގުޅައިގެން ނަންނޯޓް ކުރުމުން އެރެއަކު ވެކްސިން ޖެހުމަށް ހަމަޖައްސައިދޭނެ ކަމަށް ފުވައްމުލަކު ހޮސްޕިޓަލުން ހާމަކުރައްވައެވެ.
އިއްޔެ ވެސް ފުވައްމުލައް ސިޓީއިން އެއްވެސް މީހަކު ވެކްސިން ޖަހާފައެއް ނުވެއެވެ.
ފުވައްމުލައް ސިޓީގައި ދިރިއުޅޭ ކަމަށް ބެލެވޭ 10،705 މީހުންގެ %26.8 މީހުން ވަނީ ކޮވިޝީލްޑް 2 ވަނަ ޑޯޒް ފުރިހަމަކޮށްފައެވެ.
މިއީ ފުވައްމުލައް ސިޓީގައި ދިރިއުޅޭ މީހުންގެ ތެރެއިން ވެކްސިން ޖެހުމުގެ ފުރުސަތު އޮތް (18 އަހަރުން މަތީ) 7735 މީހުންގެ %73.7 މީހުން ވަނީ ކޮވިޑް-19 ވެކްސިންގެ ފުރަތަމަ ޑޯޒް ޖަހާފައެވެ.
ފާއިތުވި އަންގާރަ ދުވަހު (6 މެއި 2021) ގެ ނިޔަލަށް ކޮވިޑް-19 ވެކްސިންގެ 2 ވަނަ ޑޯޒް ފުވައްމުލައް ސިޓީއިން 2868 މީހަކު ފުރިހަމަކޮށްފައި ވެއެވެ. އަދި 5711 މީހަކު ފުރަތަމަ ޑޯޒް ފުރިހަމަކޮށްފައި ވެއެވެ.
ޚިޔާލުތައް