އިބްރާހިމް ލަތީފް އިއްޔެ ފުވައްމުލަކު ސިޓީއިން ކޮވިޑް 19 އަށް ޕޮޒިޓިވުވި 17 މީހުންނާއި އެކު ފުވައްމުލަކު ސިޓީއިން މިހާތަނަށް ކޮވިޑް 19 އަށް ޕޮޒިޓިވުވެފައިވާ މީހުންގެ އަދަދު 100 އިން މައްޗަށް އަރައިފިއެވެ. ރޭ ފުވައްމުލަކު ހޮސްޕިޓަލުން އާންމުކުރި މައުލޫމާތަށް ބަލާއިރު އިއްޔެއަކީ މިހާތަނަށް އެންމެ ގިނަ މީހުން ފުވައްމުލަކު ސިޓީއިން ކޮވިޑް 19 އަށް ޕޮޒިޓިވުވި ދުވަހެވެ. އިއްޔެގެ އަދަދު ތަކާއިއެކު މިހާތަނަށް ފުވައްމުލަކުން ކޮވިޑް 19 އަށް ޕޮޒިޓިވުވެފައިވާ މީހުންގެ އަދަދަކީ 111 އެވެ. އިއްޔެ ޕޮޒިޓިވުވި 17 މީހުންނާއި ގުޅިގެން 73 އާ ޑައިރެކްޓް ކޮންޓެކްޓް ހޯދިފައިވާކަމަށްވެސް ފުވައްމުލަކު ހޮސްޕިޓަލުން ހާމަކުރިއެވެ.
މި ބައްޔަށް މިހާރު ފައްސިވާ މީހުންގެ ތެރޭގައި ބަލީގެ އަލާމާތްތައް ހުންނަ މީހުން ގިނަކަން ފާހަގަ ކުރެވޭ ކަމަށާއި ފުވައްމުލައް ސިޓީގައި ދިރިއުޅޭ ފަރާތްތަކުން މިކަމަށް ދެއްވާ ސަމާލުކަން އިތުރު ކުރައްވައި ބަލިން ރައްކާތެރިވެ ތިއްބެވުންމަށް ފުވައްމުލަކު ހޮސްޕިޓަލުން އާންމުންނަށް ނަސޭހަތްތެރިވެއެވެ.
ފުވައްމުލަކު ހޮސްޕިޓަލުން ހާމަކޮށްފައިވާ މައުލޫމާތުތަކަށް ބަލާއިރު އިއްޔެ އެހޮސްޕިޓަލުން 85 ސާމްޕަލް ނަގާފައިވެއެވެ. އަދި މިހާތަނަށް އެކްޓިވް ކޭސްތަކުގެ ގޮތުގަިއ ތިބީ 38 ކޭސްއެކެވެ. އަދި 74 މީހަކު މިރޯގާއިން މިހާތަނަށް ފަސޭހަވެފައިވެއެވެ. ފެސިލިޓީގައި އެއްވެސް މީހަކު ނެތް ނަމަވެސް، ފުވައްމުލަކު ސިޓީއަށް އައި ކޮވިޑް ދެވަނަ ރާޅާއިއެކު ބަލީގެ ސިމްޓަމް ފެންނަ މީހުން ގިނައެވެ. އަދި އެޗްޕީއޭގެ މައުލޫމާތަށް ބަލާއިރު ވެކްސިން ގެ ދެ ޑޯޒު ފުރިހަމަކޮށްފައިފައި އެއްވެސް މީހަކު މިހާތަނަށް ވެންޓިލޭޓަރަށް ލާންޖެހޭ ހާލަތަކަށް ނުދެއެވެ. އަދި ފެސިލިޓީތަކުގައި މިހާރު 40 އަހަރުން ދަށުގެ މީހުން ތިބިއިރު ގިނައިން ތިބީ ވެކްސިން ނުޖަހާ ނުވަތަ ދެޑޯޒު ފުރިހަމަ ނުކުރާ ފަރާތްތަކެވެ. އެހެންކަމުން އަލުން ވެކްސިން ދިނުން މިވަނީ މާލެ އާއި ފުވައްމުލަކުގައި ވެސް ކުރިއަށް ގެންގޮސްފައެވެ.
އެގޮތުން އިއްޔެ އާއި ހަމައަށް ފުވައްމުލަކު ސިޓީއިން 5713 މީހުންވަނީ ވެކްސިންގެ ފުރަތަމަ ޑޯޒު ފުރިހަމަކޮށްފައެވެ. އަދި 2903 މީހަކު ވަނީ ވެކްސިންގެ ދެވަނަ ޑޯޒުވެސް ފުރިހަމަކޮށްފައެވެ. މިހާރު ބޭނުންކުރަމުންދާ ސިނޮފާމް ވެކްސިން 60 އަހަރުން މަތީ މީހުންނަށް ދިނުމަށް ޑަބްލިއު އެޗްއޯއިން ހުއްދަ ދިނުމާއި ގުޅިގެން ދިވެހިރާއްޖޭގައިވަނީ އެވެކްސިން 60 އަހަރުން މަތީގެ މީހުންނަށް ދޭން ފަށާފައެވެ.
ފުވައްމުލަކުގެ އިތުރުން މާލެ ސަރަހައްދަށްވެސް އިއްޔެއަކީ ރެކޯޑެކެވެ. ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ރޭ ހާމަކޮށްފައިވާ ގޮތުން އިއްޔެ މާލެއިން 961 މީހަކު ކޮވިޑަށް ޕޮޒިޓިވްވެފައިވެއެވެ. ރަށްރަށުން ބަލި ޖެހުނު މީހުންގެ އަދަދު ވެސް ވަނީ 235 އަރާފައެވެ. އެއާއިއެކު ކޮވިޑް-19 އަށް މުޅިރާއްޖެއިން 1204 މީހަކު ޕޮޒިިޓިވްވެ، މިއިން ދުވަހަކު މިރޯގާގެ ހާލަތު ގޯސް ނުވާވަރަށް މިހާރު މިވަނީ މިރޯގާގެ ހާލަތު ގޯސްވެފައެވެ.
ޚިޔާލުތައް