އިބްރާހިމް ލަތީފް ކޮވިޑް 19 އަށް ފުވައްމުލަކު ސިޓީއިން އިއްޔެވެސް 18 މީހުން ޕޮޒިޓިވުވެއްޖެއެވެ. އިއްޔެގެ ނަތީޖާ މިހާ މައްޗަށް ގޮސްފައިވަނީ ކޮވިޑް ކޭސްތައް ރިޕޯޓްކުރުމަށް ގެނައި ބަދަލަކުން ކަމަށް ބެލެވެއެވެ. އެގޮތުން، ކުރިން ކޭސް ތައް ރިޕޯޓްކުރަނީ އެދުވަހެއްގެ މެންދަމު 12 އާއި ހަަމައަށެވެ. ނަމަވެސް އިއްޔެގެ ކޭސްތައް ރިޕޯޓް ކޮށްފައިވަނީ ކުރީ ދުވަހު ހަވީރު 6 އިން އިއްޔެ ހަވީރު 6 ގެ ނިޔަލަށެވެ. އެހެންކަމުން ކުރީ ދުވަހު ރިޕޯޓް ކޮށްފައިވާ 11 ކޭސް އިއްޔެގެ ރިޕޯޓްގައި ހިމެނިފައިވެއެވެ. އިއްޔެގެ ހަވީރު 6 އާއި ހަމައަށް އަލަށް ރިޕޯޓްކުރެވިފައިވަނީ 7 ކޭސް ކަަމަށް ފުވައްމުލަކު ހޮސްޕިޓަލުން ހާމަކުރި ހިސާބުތަކުން ދައްކައެވެ.
އިއްޔެ އާ 7 ކޭސް އާއިއެކު މިހާތަނަށް ފުވައްމުލަކުން ކޮވިޑް 19 އަށް ޕޮޒިޓިވު ވެފައިވަނީ 118 ފަރާތެކެވެ. އޭގެތެރެއިން 74 ފަރާތެއް އެރޯގާއިން ސަލާމަތްވެފައިވާ އިރު މިވަގުތު އެކްޓިވް ކޭސްގެ ގޮތުގައި ތިބީ 45 ފަރާތެކެވެ. އިއްޔެ ވަނީ އިތުރު 65 ފަރާތެއް ޑައިރެކްޓް ކޮންޓެކްޓްގެ ގޮތުގައި ފާހަގަކުރެވިފައެވެ.
ފުވައްމުލަކު ހޮސްޕިޓަލުން ހާމަކޮށްފައިވާ މައުލޫމާތުތަކަށް ބަލާއިރު އިއްޔެ އެހޮސްޕިޓަލުން 70 ސާމްޕަލެއް އިއްޔެ ނަގާފައިވެއެވެ. ފެސިލިޓީގައި އެއްވެސް މީހަކު ނެތް ނަމަވެސް، ފުވައްމުލަކު ސިޓީއަށް އައި ކޮވިޑް ދެވަނަ ރާޅާއިއެކު ބަލީގެ އަލާމާތްތައް ފެންނަ މީހުން ގިނަކަމަށް ފުވައްމުލަކު ހެލްތު އިމަޖެންސީ ކޮމިޓީ މީގެ ކުރިން ވަނީ ފާހަގަކޮށްފައެވެ.
ފުވައްމުލަކުގެ އިތުރުން މުޅި ރާއްޖެއިން ކޮވިޑަށް ޕޮޒިޓިވު މީހުންގެ އަދަދަށް ބަލާއިރު އިއްޔެއަކީ ވެސް ރެކޯޑު ދުވަހެކެވެ. ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ރޭ ހާމަކޮށްފައިވާ އަދަދުތަކަށް ބަލާއިރު އިއްޔެ މާލެ ސަރަހައްދުން 1،229 މީހަކާއި ރަށްރަށުން 265 މީހަކާއި ރިސޯޓުތަކުން ހަތް މީހަކާއި އެކު ޖުމްލަ 1501 މީހަކު މުޅި ރާއްޖެއިން ކޮވިޑް 19 އަށް ޕޮޒިޓިވުވިއެވެ.
މުޅި ރާއްޖެއިން ކޮވިޑް ޖެހުނު މީހުންގެ އަދަދު ވަނީ 38،520 އަށް އަރާފައެވެ. އަދި މިހާރު ފައްސިވެ ފަރުވާދެމުން ދަނީ 11626 މީހަކަށެވެ. މީގެ ތެރެއިން 8963 މީހުންނަކީ ދިވެހިންނެވެ. 2666 މީހުންނަކީ ބިދޭސީންނެވެ. އޭގެ ތެރޭގައި 18 އަހަރުން ދަށުގެ 290 ކުދިންނާއި 65 އަހަރުން މަތީގެ 49 މީހަކު ހިމެނެއެވެ.
ޚިޔާލުތައް