އިބްރާހިމް ލަތީފް ޕްރޮސެކިއުޓާ ޖެނެރަލް ހުސައިން ޝަމީމު ވަގުތުން ވަޒީފާއިން ވަކިކޮށް ރައީސް ޔާމީނަށް އުފުލާފައިވާ ޙައްޤު ނޫން ދަޢުވާތައް ބާތިލްކުރަން ޖެހޭކަމަށް ކުރީގެ ނާއިބު ރައީސް ޑރ. މުހައްމަދު ޖަމީލު އަހުމަދު ވިދާޅުވެއްޖެއެވެ. ޓްވިޓާ މެދުވެރިކޮށް ޖަމީލު މިމޭރުމުން ޓްވީޓް ކުރައްވާފައިވަނީ ޕްރޮސެކިއުޓަރ ޖެނެރަލް ހުސެއިން ޝަމީމަށް އެމްއެމްޕީއާރުސީ ހިޔާނާތާއި ގުޅޭ ފައިސާ ލިބުނު ކަމަށް ބައެއް އޮންލައިން ނޫސްތަކުން ރިޕޯޓުކުރުމާއި ގުޅިގެނެވެ.
“ނުތާހިރު ފެންގަނޑަކުން ތާހިރުވާނީ ކިހިނެއް؟ މިހެންވެތާ އަދީބަށް މިސަރުކާރުން ވީއައިޕީ ޚިދުމަތް މިދެނީ! ރައީސް އިބްރާހިމް މުހައްމަދު ސާލިހް، ރައްޔިތުންގެ ޙައްޤުގައި ޕީޖީ ހުސެއިން ޝަމީމް ވަގުތުން މަޤާމުން ވަކިކޮށް، ރައީސް ޔާމީނަށް އުފުލާފައިވާ ޙައްޤު ނޫން ދަޢުވާތައް ބާތިލްކުރަންޖެހޭ!” އޮންލައިން ދެ ނޫހަކުން ލިޔެފައިވާ ހަބަރެއް ޓްވީޓާގައި ހިއްސާކުރައްވަމުން ޓްވީޓް ކުރައްވާފައިވެއެވެ.
ޕްރޮސެކިއުޓަރ ޖެނެރަލް ހުސެއިން ޝަމީމަށް 3 މިލިއަން ރުފިޔާ ލިބުނު ކަމަށް އެމްއެމްޕީއާރުސީ ހިޔާނާތާއި ގުޅޭގޮތުން އެސްޓް ރިކަވަރީ ކޮމިޝަނުން ހެދި ރިޕޯޓުން ދައްކައިފިކަމަށާި އަދި އެ ރިޕޯޓުގައި ބުނެފައިވާ ގޮތުގައި ކުރީގެ ނައިބު ރައީސް އަހްމަދު އަދީބް ހައްޔަރު ކުރުމުން ވަކީލު ފީގެ ގޮތުގައި 3 މިލިއަން ރުފިޔާ ހަމަޖައްސައިދީފައިވާނެ ކަމަށް މުހައްމަދު އައްލާމް ލަތީފް ބުނެފައިވާ ކަމަށް އޮންލައިން ނޫސް ދިޔަރެސް އިން ހާމަކޮށްފައިވެއެވެ. ނަމަވެސް، އެމްއެމްޕީއާރުސީ ފައިސާއިން އެއްވެސް މިންވަރެއް ލިބިފައިނުވާނެ ކަމަށް ޕީޖީ ބުނެފައިވެއެވެ.
އެމްއެމްޕީއާރުސީގެ ކަރަޕްޝަން ފައިސާ ހޯދުމަކީ މިސަރުކާރުން ވެފައިވާ ވައުދެކެވެ. ނަމަވެސް، އެފައިސާ ލިބިދާނެކަމާއި މެދު ގިނަ ބަޔަކު މިހާރު ދަނީ ޝައްކުގެ ނަޒަރަކުން ބަލަންފަށާފައެވެ. ސަބަބަކީ އެބޮޑު ޚިޔާނާތުގެ ފައިސާ ލިބުނު ފަރާތްތައް ހާމަކުރުމަށް އެމްޑީޕީގެ މެންބަރުންވެސް ދެކޮޅު ހަދަމުން ދިއުމާއި ލީކުވާ މައުލޫމާތުގެ ތެރޭގައި ބޮޑު ދެޕާޓީ ކަމުގައިވާ އެމްޑީޕީ އާއި ޕީޕީއެމްގެ ލީޑާޝިޕްގެ ގިނަ ބަޔަކު ހިމެނޭތީވެއެވެ.
ޚިޔާލުތައް