މުހައްމަދު ޝިހާބް ފުވައްމުލައް ސިޓީ ކައުންސިލްގެ ކަންތައްތައް ކުރިޔަށް ގެންދާނީ ހާމަކަން ބޮޑު ގޮތެއްގައި ކަމަށް މޭޔަރު އިސްމާއީލް ރަފީޤު ވިދަޅުވެއްޖެއެވެ. ރޭ ބޭއްވި ފުވައްމުލައް ސިޓީ އިމްޖެންސީ އޮޕަރޭޝަން ސެންޓަރުގެ ބައްދަލުވުމުގައި ކައުންސިލް މެމްބަރުން ވެސް ވަނީ ސިޓީ ކައުންސިލުން މަަސައްކަތްކުރަމުން އަންނަނީ އެވިސްނުމުގައި ކަމަށް ހާމަކޮށްދެއްވާފައެވެ.
މޭޔަރު އިސްމާއީލު ރަފީގު މިމޭރުމުން ފޭސްބުކް ޕޯސްޓެއް ރޭގައި ކުރެއްވީ ސޯޝަލް މީޑިއާގައި ބައެއް ފަރާތްތަކުން، ފުވައްމުލައް ސިޓީ ކައުންސިލްގެ ކަންތައްތައް ހާމަކަން ބޮޑުގޮތެއްގައި ކުރިޔަށް ގެންދިއުމަށާއި ކައުންސިލް ބައްދަލުވުންތައް ލައިވްކުރުމަށާއި ޔައުމިއްޔާތައް އާމުކުރުމަށް ގޮވާލައި ފާޅުކުރަމުންދާ ޝުއޫރުތަކަށް އިޝާރާތްކޮށެވެ.
ނަމަވެސް މިދައުރުގައި (4 ވަނަ ދައުރުގައި) ފުވައްމުލައް ސިޓީ ކައުންސިލުން މިހާތަނަށް ބޭއްވާފައިވަނީ ކިތައް ޖަލްސާކަމާއި އެޖަލްސާތަކުގެ އެޖެންޑާއެއް ވެސް އާއްމު ކުރެވިފައެއް ނުވެއެވެ. އަދި ޖަލްސާގެ ނިންމުންތަކާއި ޔައުމިއްޔާ ވެސް މިހާތަނަށް ހާމަކުރެއްވިފައެއް ވެއެވެ. ނަމަވެސް ޖަލްސާތަކުގެ ނިންމުންތަކެއް ކަމަށް ބުނެ ތަފާތު ވާހަކަތައް އަންނަނީ ދައްކަމުން ނެވެ. އެފަދަވާހަކަ ތަކުގައި ކައުންސިލް މެމްބަރުން ނާޖާއިޒު ފައިދާތަކެއް ނަގަން އުޅޭކަމަށް ތުހުމަތުވެސް ކުރަމުން އާދެއެވެ.
ރޭގައި ބޭއްވި ފުވައްމުލައް ސިޓީ އިމަޖެންސީ އޮޕްރޭޝަން ސެންޓަރުގެ ނޫސްވެރިންގެ ބައްދަލުވުމުގައި އެވާހަކަތަކާއި ގުޅިގެން މިކަލް ނޫހުން ކުރި ސުވާލަކަށް ޖަވާބުދެއްވަމުން ސިޓީ ކައުންސިލްގެ މެމްބަރުން ވަނީ އެކަން ދޮގުކުރައްވާފައެވެ. އަދި އެފަދަ ނިންމުންތަެއް ނިންމާފައި ނުވާކަމަށް ވިދާޅުވެފައެވެ.
ސްމާޓް ސީޓީއެއް ގާއިމުކުރުމުގެ ވައުދުގައި ކެމްޕޭން ކާމިޔާބުކުރެއްވި އެމްޑީޕީ ކައުންސިލް މެމްބަރުންނަށާއި މޭޔަރަށް ވަނީ ގިނަ ފާޑުކިޔުންތަކެއް އަމާޒުވެފައެވެ. ބައެއް ފަރާތްތަކުން ފާހަގަކުރާ ގޮތުގައި ފުވައްމުލައް ސިޓީއަށް ވުރެ މާކުޑަ އާދައިގެ ރަށު ކައުންސިލްތަކުން ވެސް ޖަލްސާތަކުގެ ނިންމުންތަކާއި ޔައުމިއްޔާ އާއްމުކޮށްފައިވާއަރު، އަދި ބައެއް ކައުންސިލްތަކުން ޖަލްސާތައް ލައިވް ކުރަމުން އަންނައިރު ފުވައްމުލައް ސިޓީއަށް އެކަން ނުވާންވީ ސަަބަބާއި މެދު ސުވާލު އުފައްދަމުން އާދެއެވެ.
ފުވައމްުލައް ސިޓީ ކައުންސިލްގެ 3 މެމްބަރުން، މުައްމަދު އިސްމާއިލް، އަބްދުﷲ ނާސިރު އަދި އާއިޝަތު އަބްދުލް ގާދިރު
މޭޔަރުގެ ފާހަގަ ކުރައްވާފައި ވަނީ ސިޓީ ކައުންސިލުން ކަންތައްތައް ސިއްރުކޮށް، ރައްޔިތުންނަށް ނޭނގޭ ގޮތަށް ކުރަން އުޅޭކަމަށް ދޭހަވާގޮތަށް ބައެއް ފަރާތްތަކުން ސޯޝަލް މީޑިއާގައި ވާހަކަ ދައްކަމުން އަންނަކަމަށެވެ. އަދި މޭޔަރު ޔަގީންކަން ދެއްވަމުން ވިދާޅުވެފައި ވަނީ މިހާރު ތިބި ހުރިހާ ކައުންސިލަރުންނާއި މޭޔަރުގެ ވެސް ވިސްނުމަކީ ވީހާވެސް ބޮޑަށް ސިޓީ ކައުންސިލުން ކުރާ ކަންތައްތައް ރައްޔިތުންނަށް އެނގޭނޭ ނިޒާމެއްގެ ތެރެއިން ކުރުން ކަމަށް ވިދާޅުވެފައި ވެއެވެ.
“ކައުންސިލް ޖަލްސާތެއް އާންމުންނަ ސިއްރިކޯން ބާ ވިސްނުމެއް އެއްވިއަސްމީހަކުގެ ނެއް. އަދި ލައިވް ކެރަންނަ ހެރަހައެޑާ މީހެކިސް ނެއް. އަދި ކައުންސިލެން ނިންމާ ނިންމުންތެއް ސިއްރިކެރެމުގެ ވިސްނުމެކިސް ނެއް” މޭޔަރުގެ ޕޯސްޓްގައި ވެއެވެ.
ފުވައްމުލައް ސިޓީ ކައުންސިލްގެ ވެބްސައިޓް އަޕްގެރޭޑު ކުރެވެމުން ދަނީ
ފުވައްމުލައް ސިޓީ ކައުންސިލްގެ ވެބްސައިޓް
ސިޓީ ކައުންސިލްގެ ހިންގާ ގަވާއިދަށް ބަދަލުގެނެސްގެން ވެސް ކައުންސިލްގެ ބައްދަލުވުންތައް ލައިވްކުރުމަށް ތައްޔާރުވަމުން އަންނަ ކަމަށާއި، މީގެ އިތުރުން ސިޓީ ކައުންސިލްގެ ނިންމުންތައް ރައްޔިތުންނާއި ހިއްސާ ކުރަމުން އަންނާނެ ކަމަށާއި، އެކަންކަން ކުރުމަށް ފަސޭހަ އިންތިޒާމުތަކެއް ހަމަޖައްސަމުން އަންނަކަމަށް މޭޔަރު ވިދާޅުވެފައި ވެއެވެ.
މިހާރު ގާއިމުކުރެވިފައިވާ ފުވައްމުލައް ސިޓީ ކައުންސިލުގެ ވެބްސައިޓް ފަރުމާކުރެވިފައި ވަނީ މައުލުމާތުތައް ފަސޭހައިން ހިއްސާކުރެވޭ ގޮތަކަށް ނޫން ކަމަށާއި އެކަމަށް ގެންނަން ޖެހޭ ބަދަލުތައް ގެނައުމުގެ މަސައްކަތް ކުރިޔަށް ދާކަމަށް ވިދާޅުވެއެވެ.
“މިކައުންސިލަކީ ރައްޔިތުންގެ މަޝްވަރާއާ ބައިވެރިވުން އެންމެބޮޑަހަ ހިމަނާގެން ހިނގުއާ ކައުންސިލަހަ ވެގެން އެންނެން. މިކައުންސިލަކީ އެންމެ ހާމަކަން ބޮނޑޮކޮހޮ ހިނގުއާ ކައުންސިލަހަ ވެގެން އެންނެން. މީ ހުށިހައި ކައުންސިލަރުންގެ އަސް ވިސްނުން” ކަމަށާއި އަދި މިއީ މޭޔަރު އިސްމާއިލު ދެއްވާ ޔަގީންކަމެއް ކަމަށް ހާމަކުރައްވާފައި ވެއެވެ.
ޚިޔާލުތައް