އިބްރާހިމް ލަތީފް ފުވައްމުލަކު ވަލުތެރޭގައި ފޮރުވާފައިހުރި މަސްތުވާޓަކެތިކަމަށް ޝައްކުކުރެވޭ އެއްޗެއް ފުލުހުންގެ ބެލުމުގެ ދަށަށް ގެންގޮސްފިކަމަށް ފުލުހުންގެ އިދާރާއިން ހާމަކޮށްފިއެވެ. އެއިދާރާއިން ހާމަކުރިގޮތުގައި މިތަކެތި ހޯދާފައިވަނީ، ފުވައްމުލަކަށް މަސްތުވާތަކެތި އެތެރެކުރަން އުޅޭކަމަށް ފުލުހުންގެ އިންޓެލިޖެންސަށް ލިބުނު މައުލޫމާތަކާ ގުޅިގެން ފުވައްމުލަކު ޕޮލިސް ސްޓޭޝަނުން ހިންގި އޮޕަރޭޝަނެއްގައެވެ.
އެއޮޕަރޭޝަނުގައި ފުވައްމުލަކު ވަލުތެރޭގައި ފޮރުވާފައި ހުރި މަސްތުވާތަކެތި ކަމަށް ޝައްކުކުރެވޭ އެއްޗެއް ހޯދައި ފުލުހުންގެ ބެލުމުގެ ދަށަށް ގެންދިޔައެވެ. އޭގެ ބަރުދަނުގައި 1.170 ކިލޯ ގްރާމް ހުރިކަމަށް ފުލުހުންގެ އިދާރާއިން ހާމަކުރެއެވެ. މި މައްސަލަ މިހާރު ފުލުހުންދަނީ ތަހުގީގު ކުރަމުންނެވެ.
ފުވައްމުލަކުގެ އިތުރުން ޅ. ހިންނަވަރު ޕޮލިސް ސްޓޭޝަނާއި، ތ. ކިނބިދޫ ޕޮލިސް ސްޓޭޝަނާއ ގއ. ވިލިނގިލި ޕޮލިސް ސްޓޭޝަނާއި، އައްޑޫސިޓީ ހިތަދޫ ޕޮލިސް ސްޓޭޝަނުން ހިންގި މަސްތުވާތަކެތީގެ އޮޕަރޭޝަންތަކެއްގައި ވެސް ވަނީ މަސްތުވާތަކެތި ކަމަށް ޝައްކުކުރެވޭ ތަކެތި ފެނިފައެވެ. މި މައްސަލަތަކާ ގުޅިގެން ހައްޔަރުކޮށްފައިވަނީ 29 އަހަރުގެ މީހަކާއި، 31 އަހަރުގެ މީހަކާއި، 32އަހަރުގެ މީހަކާއި، 33 އަހަރުގެ މީހަކާއި، 36 އަހަރުގެ މީހަކާއި، 38 އަހަރުުގެ މީހަކާއި، 46 އަހަރުގެ މީހެއްގެ އިތުރުން 49 އަހަރުގެ މީހަކާއި 59 އަހަރުގެ މީހެކެވެ. މި އެންމެންނަކީ ވެސް ދިވެހި ފިރިހެނުންނެވެ.
ޚިޔާލުތައް