އިބްރާހިމް ލަތީފް ކޮރޯނާ ރޯގާއަށް ފުވައްމުލަކު ސިޓީއިން އިއްޔެ 18 މީހަކު ޕޮޒިޓިވުވެއްޖެއެވެ. އިއްޔެއަކީ ފާއިތުވީ 36 ދުވަސްތެރޭ އެންމެ ގިނަ މީހުން މިސިޓީއިން ކޮރޯނާ ރޯގާއަށް ޕޮޒިޓިވުވި ދުވަހެވެ. އެންމެ ފަހުން މިއަށްވުރެ ގިނަ އަދަދަކަށް ކޮރޯނާ ރޯގާއަށް ފުވައްމުލަކު ސިޓީއިން މީހުން ޕޮޒިޓިވިވުވެފައިވަނީ ޖޫން 5 ގައެވެ. ޖޫން 5 ގައި ފުވައްމުލަކު ސިޓީއިން 25 މީހަކު ކޮރޯނާ ރޯގާއަށް ޕޮޒިޓިވުވިއެވެ. އިއްޔެ ޕޮޒިޓިވުވެފައިވަނީ 10 ދިވެހިންނާއި 8 ބިދޭސީންނެވެ. އިއްޔެ ޕޮޒިޓިވުވި މީހުންގެ ތެރޭގައި ގިނައީ ކޮންޓްރެކްޓް ޓްރޭސިން އިން ސާމްޕަލް ނެގުނު މީހުންނެވެ. ކޮންޓްރެކްޓް ޓްރޭސިން އިން ނެގުނު 14 ސާމްޕަލެއް ޕޮޒިޓިވުވެފައިވާއިރު ރަންޑަމް ސާމްޕަލްގެ ތެރެއިން 4 ސާމްޕަލެއްވެސް ޕޮޒިޓިވުވިއެވެ. އިއްޔެ 97 ރަންޑަމް ސާމްޕަލެއްގެ ނަތީޖާ ލިބުނެވެ. އެހެންކަމުން އިއްޔެ ރަންޑަމް ސާމްޕަލްތަކުން މިރޯގާ އަށް ޕޮޒިޓިވުވި މީހުންގެ ނިސްބަތަކީ 4 އިންސައްތައެވެ.
އިއްޔެ 18 މީހަކު ކޮރޯނާ ރޯގާއަށް ޕޮޒިޓިވުވިއިރު 198 ސާމްޕަލެއްގެ ނަތީޖާ އިއްޔެ ލިބުނެވެ. ކޮރޯނާ ރޯގާއަށް ޕޮޒިޓިވުވާ ނިސްބަތަށް ބަލާއިރު އެއީ 9 އިއްސައްތައެވެ. އިއްޔެ ލިބުނު ނަތީޖާއަށް ބަލާއިރު އެނަތީޖާއަކީ ފާއިތުވީ ދެތިން ދުވަހުގެ ސާމްޕަލްތަކަކަށް ވާތީ ފާއިތުވީ 3 ދުވަހުގެ އެވުރެޖްއަށް ބަލާއިރު ފުވައްމުލަކު ސިޓީއިން ކޮރޯނާ ރޯގާއަށް ޕޮޒިޓިވުވެފައިވަނީ ނަތީޖާ ލިބުނު މީހުންގެ 4 އިންސައްތައެވެ. އިއްޔެގެ ހަވީރު 5 އަށް ނަތީޖާ ނުލިބިހުރީ 20 ސާމްޕަލެއްގެއެވެ. އަދި އިއްޔެ ނެގިފައިވަނީ ވެސް އެންމެ 17 ސާމްޕަލެކެވެ.
ކޮރޯނާ ރޯގާގެ ހާލަތާއި ގުޅިގެން ފުވައްމުލަކު ސިޓީގައި އަޅާފައިވާ ބައެއް ފިޔަވަޅުތަކަށް މިދިޔަ އާދީއްތަ ދުވަހުން ފެށިގެން ވަނީ ބައެއް ލުއިތައް ދީފައެވެ. އެލުއިތަކާއިއެކު މިވަގުތު އެޅިފައިވާ ފިޔަވަޅުތަކަކީ:
- ކާފިއު ގަޑި ރޭގަނޑު 21:00 އިން 4:00 އަށް
- ބިދޭސީންލައްވައި ކުރަމުން އައި ހުރިހާ މަސައްކަތް ހުއްޓާލުން، ނަމަވެސް މިހާލަތުގައި ކޮންމެހެން ކުރަންޖެހޭ މަސައްކަތް ކުރުމަށް ކައުންސިލުން ހުއްދަނަގައިގެން ކުރެވިދާނެ
- ގާޑިޔާ. ރެސްޓޯރެންޓް އަދި ކެފޭތައް އެޗްޕީއޭ ގައިޑްލައިނާއި އެއްގޮތަށް މަސައްކަތްކުރުން
- ކައުންސިލުން ހުއްދަދީފައިވާ ފިހާރަތައް ގަވާއިދާއި އެއްގޮތަށް ވިޔަފާރިކުރުން
- ސެލޫން، ޖިމް، ބޯކޮށާތަންތަން އެޗްޕީއޭ ގައިޑުލައިނާއި އެއްގޮތަށް އަމަލުކުރުން
- ޕާޓީ، ޙަފްލާތައް ބޭއްވުން ހުއްޓާލުން
- އެއްގެއިން އަނެއްގެއަށް ޒިޔާރަށް ކުރުން ހުއްޓާލުން
- އެއްއަވަށުން އަނެއް އަވަށެއް ދިއުން ހުއްޓާލުން
- އެއްފަހަރާ ތިން މީހުންނަށްވުރެ ގިނަ މީހުން މަގުމަތީގައި އުޅުމާއި އާންމުތަންތަނުގައި އުޅުން ހުއްޓާލުން
- ހުރިހާ ކުޅިވަރު ހަރަކާތްތަކާއި ކަސްރަތު ހަރަކާތްތައް ހުއްޓާލުން
މުޅި ރާއްޖޭގެ ކޮވިޑު ހާލަތަށް ބަލާއިރު މުޅި ރާއްޖެއިން އިއްޔެ ކޮވިޑަށް ޕޮޒިޓިވުވެފައިވަނީ 90 މީހެކެވެ. އެއީ މާލެއިން ޕޮޒިޓިވުވި 23 މީހުންނާއި މީހުން ދިރިއުޅޭ އެހެންރަށްރަށުން ޕޮޒިޓުވި 58 މީހުންނާއި، ރިސޯޓުތަކުން ޕޮޒިޓުވި 6 މީހުންނާއި، ތަރައްގީކުރަމުންދާ ރިސޯޓުތަކުން 3 މީހެކެވެ.
ޚިޔާލުތައް