މުހައްމަދު ޝިހާބް ޒަރޫރީ ބޭނުންތަކަށް އައްޑޫ ސިޓީއަށް ދަތުރުކުރުމަށް ހަފުތާއަކު ފެރީ ދެ ދަތުރު ބާއްވާ ގޮތަށް ފުވައްމުލައް ސިޓީ ކައުންސިލުން ހަމަޖައްސައިފިއެވެ.
އައްޑޫ ސިޓީ އާއި ފުވައްމުލައް ސިޓީ އާއި ދެމެދު ފެރީ ދަތުރުތައް މިހާރު ކުރުމަށް ހަމަޖެހިފައިވާ މޯލްޑްިވސް ޓްރާންސްޕޯރޓް އެން ކޮންޓްރެކްޓިން ކޮމްޕެނީ (އެމްޓީސީސީ) އާއި ސިޓީ ކައުންސިލާއި ދެމެދު އެކަމަށް އެއްބަސްވެފައިވާ ކަމަށް ފުވައްމުލައް ސިޓީ ކައުންސިލުން ހާމަކުރައްވައެވެ. އެގޮތުން އެޗްޕީއޭއިން އަޅާފައިވާ މޮނިޓަރިންގެ ފިޔަވަޅުތައް ނެގެންދެން މިދަތުރުތައް ކުރިޔަށް ގެންދިއުމަށް ހަމަޖައްސާފައި ވެއެވެ. މޮނިޓަރިންގެ ހާލަތުގައި އޮންނައިރު އާއްމު ފެރީ ނިޒާމުގެ ދަށުން ދަތުރުފަތުރު ކުރުން އޮންނަނީ ހުއްޓާލެވިފައެވެ.
މިދަތުރުތަކަކީ ސިއްޙީ ޚިދުމަތް ހޯޯދުމުގެ ބޭނުމަށާއި އެނޫންވެސް ޒަރޫރީ ބޭނުންތަކަށް ޚާއްސަކުރެވިގެން ހަމަޖެހިގެން ދިޔަ ދަތުރުތަކެކެވެ. މިދަތުރުތައް ކުރަނީ ފުވައްމުލައް ސިޓީ ބަނދަރުން އައްޑޫ ސިޓީ ފޭދޫގެ ބަނދަރަށެވެ.
އެގޮތުން އައްޑޫ ސިޓީއަށް ދަތުރުކުރުމަށް ބޭނުންވާ ފަރާތްތަކުން ފުވައްމުލަކު އީއޯސީ އިން ހުއްދަ ހޯދަން ޖެހެއެވެ. އަދި އެމްޓީސީސީއިން ދަތުރުގެ ޓިކެޓް ނެގުމުން، މާދަމާ (1 އޮގަސްޓް 2021) އިން ފެށިގެން ދަތުރުކުރެވޭ އިންތިޒާމު ހަމަޖެހިފައިވާ ކަމަށް ސިޓީ ކައުންސިލުން ހާމަކުރައްވައެވެ.
އެމްތީސީސީގެ ޚައްސަ ފެރީ ދަތުރު ޝެޑިއުލް 2021 ޖުލައި
މިދަތުރުތަކާއި ގުޅިގެން އެމްޓީސީއިން ވަނީ ދަތުރު ތާވަލެއް ވެސް ނެރެފައެވެ. އެގޮތުން މިދަތުރުތައް ކުރުމަށް ހަމޖެހިފައި ވަނީ ހަފުތާގެ ކޮންމެ އާދީއްތަ އަދި ބުރާސްފަތި ދުވަހުގައެވެ.
ފުވައްމުލަކުން ފުރުން ހެނދުނު 9:00ގައި.
ފޭދޫއިން ފުރުން މެންދުރު ފަހު 2:00ގައި.
މިއީ 1 ގަޑިއިރުގެ ލޯންޗު ދަތުރުތަކެކެވެ. މިގޮތުން ދަތުރުކުރާ މީހުން، މޮނިޓަރިންގައި އޮތް ރަށަކުން އެހެން ރަށަކަށް ދަތުރުކުރުމުގައި އަމަލުކުރުމަށް އެޗްޕީއޭއިން ކަނަޑައަޅާފައިވާ އުސޫލާއި އެއްގޮތަށް އަމަލުކުރުމަށް ސިޓީ ކައުންސިލުން އަންގަވައެވެ.
ކުރިން ފުވައްމުލައް ސިޓީ އާއި އައްޑޫ ސިޓީ އާއި ދެމެދު ދަތުރުކުރުމުން އައީ އެމްޕީއެލްގެ ސަދަން ޓްރާންސްޕޯޓް ލިންކްގެ ފެރީއިންނެވެ. ނަމަވެސް މިހާރު އެ ފެރީތައް ވަނީ އެމްޓީސީސީއަށް ބަދަލުކޮށްފައެވެ.
ފުވައްމުލައް ސިޓީ އެޗްޕީއޭގެ މޮނިޓަރިންގައި އޮންނަތާ ގިނަ ދުވަސްތަކެއް ވެއްޖެއެވެ. އެގޮތުން އެޗްޕިއޭގެ މޮނިޓަރިން އަށް ފުވައްމުލައް ސިޓި ދެވަނަ ފަހަރަށް ލީ ނިމިގެން ދިޔަ މޭ މަހުގެ 6 ވަނަ ދުވަހުއިން ފެށިގެންނެވެ.
ޚިޔާލުތައް