މުހައްމަދު ޝިހާބް ފުވައްމުލައް ސިޓީގެ ކަރަންޓަށް ދިމާވި މައްސަލައަށް ދާއިމީ ހައްލެއް ހޯދުމުގެ ގޮތުން ގެނައި އައު ޓްރާންސްފޯމަރު ކަރަންޓް ނެޓްވޯކާއި ގުޅުމުގެ މަސައްކަތް ކުރުމަށް މިއަދު މުޅި ރަށުން ކަރަންޓް ކަނޑާލާނެ ކަން ފެނަކަ-ފުވައްމުލަކުން އަންގައިފިއެވެ.
ފެނަކަ-ފުވައްމުލަކު ހާމަކޮށްފައިވާ ގޮތުން މިއަދު މެންދުރު ފަހު 2:00 އިން ހަވީރު 5:00 އާއި ދެމެދު އައު ޓްރާންސް ފޯމަރު ކަރަންޓް ގްރިޑާއި ގުޅުމުގެ މަސައްކަތް ކުރެވޭނެ ކަމަށް ވެއެވެ. އެވަގުތުގައި ރަށުގެ ސަޕްލައިފެނުގެ ޕްރެޝަރު ދަށްވުން އެކަށީގެންވާ ކަމަށް ހާމަކޮށްފައި ވެއެވެ.
އަލަށް ގެނައި ޓްރާންސްފޯމަރު ބެހެއްޓުމުގެ މަސައްކތް މިހާރު ނިންމައި ކަރަންޓް ގްރިޑާއި ގުޅުމުގެ މަސައްކަތް މިއަދު ކުރިޔަށް ގެންދިއުމަށް ވަނީ ރޭވިފައެވެ. އަލަށް ގެނެސްފައި ވަނީ 4500 ކިލޯވޮޓް ގެ ޓްރާންސްފޯމަރެއް ކަމަށާއި އެއާއެކު މިފަހަރު ދިމާވި މައްސަލައަށް ދާއިމީ ހައްލެއް ލިބިގެންދާނެ ކަމަށް ފެނަކަ ފުވައްމުލަކުގެ މެނޭޖަރު ހުސޭން ޝާފީ މައުލޫމާތު ދެއްވިއެވެ. ކަރަންޓް މައްސަލަ ހައްލުކުރުމަށް މެދުކެނޑުމެއްނެތި މަސައްކަތް ކުރެވެމުންދާކަމަށާއި، މިއަދުގެ ވަގުތެއްގައި ކަރަންޓް ގްރިޑާއި އައު ޓްރާންސް ފޯމަރު ގުޅާލެވޭނެ ކަމަށްވެސް ޝާފީ ކުރިން ހާމަކުރައްވާފައި ވެއެވެ.
ފުވައްމުލައް ސިޓީއަށް ގެންނައި ޓްރާންސްފޯމަރު ލޭންޑިން ކްރާފްޓަށް އަރުވާފައި 2 އޮގަސްޓް 2021.
ފުވައްމުލައް ސިޓީއަށް ގެނައި ޓްރާންފޯމަރަކީ ބަރުދަނުގައި ގާތްގަނޑަކަށް 8-9 ޓަނު ހުންނާނެ ކަަމަށާއި އެހެންކަމުން ޓްރާންސްފޯމަރު ގެނެސް ބެހެއްޓުމަކީ އުދަގޫ ކަމެއް ކަަމަށް ވެސް ފެނަކަ ފުވައްމުލަކު ބްރާންޗުން ކުރިން ބުނެފައިވާ ކަމަށް މިހާރު ނޫހުން ރިޕޯޓުކޮށްފައި ވެއެވެ.
ފެނަކައިގެ ޓީމުން – އަވަސް ފުރުސަތެއްގައި އަނބުރާ ކަރަންޓާއި ފެނުގެ ޚިދުމަތް ގެނެސް ދިން.
ފުވައްމުލައް ސިޓީގެ ކަރަންޓް މައްސަލަތަކަށް ދާއިމީ ހައްލެއް ހޯދުމުގެ ގޮތުން އައު އިންޖީނުގެއެއްގެ ބިންގާ މިއަހަރު އޭޕްރީލްމަހުގެ 8 ވަނަ ދުވަހު އަޅާފައި ވެއެވެ. ނަމަވެސް އެމަޝްރޫއުގެ އަމަލީ މަސައްކަތް އަދި ކުރިޔަށްދާ ތަނެއް ނުފެންނާތީ އެކަމުގެ ކަންބޮޑުވުން ރަށުގެ ބައެއް މީހުން ފާޅުކުރަމުން އާދެއެވެ.
ޚިޔާލުތައް