އިބްރާހިމް ލަތީފް އިސްލާމް ފޮތުގައި ހުރި ނަމަ، ހުރި ނަފްރަތު އުފެދޭ ކަންކަން ރައްޔިތުންނަށް ހާމަކޮށްދެއްވުމަށް ތަޢުލީމީ ވުޒާރާއަށް ޝެއިޚް ޝަފީއު އަބްދުﷲ ގޮވާލައްވައިފިއެވެ. ފުވައްމުލަކަށް އުފަން ޝެއިޚް ޝަފީއު ޓްވިޓާ މެދުވެރިކޮށް މިފަދައިން ގޮވާލައްވާފައިވަނީ، އެ ފޮތްތަކުން ކިޔަވައިގެން ތިބި ދަރިވަރުން ގިނަކަމުން ކަމަށް ބުނެފައިވެއެވެ. އެހެންކަމުން އެ ދަރިވަރުންނަށް އޭގެ ރަނގަޅު މަޢުލޫމާތާއި ރަނގަޅު ގޮތް އެނގުން ވަރަށް މުހިއްމުކަން ޝަފީއު ހާމަކުރެއްވިއެވެ.
ޝެއިޚް ޝަފީއު މިމޭރުމުން ޓްވީޓް ކުރައްވާފައިވަނީ މިދިޔަ ހޮނިހިރު ދުވަހު ރޭ އެމްޑީޕީގެ ގައުމީ މަޖިލީހުގައި ވާހަކަދައްކަވަމުން އެމްޑީޕީގެ މެންބަރު އަދި ރައްޔިތުންގެ މަޖިލިސްގެ މެއީ 6 ކޮމިޓީގެ މުގައްރިރު ހަސަން އަފީފު ދެއްކެވި ވާހަކަފުޅަކާއި ގުޅިގެންނެވެ. އަފީފް ވިދާޅުވީ މެއީ 6 ކޮމިޓީއިން ދާދިފަހުން އެޑިއުކޭޝަން މިނިސްޓަރު އައިޝަތު އަލީ އާއިއެކު ބައްދަލުވުމެއް ބޭއްވިކަމަށާއި އެބައްދަލުވުމުގައި، އިސްލާމް މާއްދާގެ ކަރިކިއުލަމްއަށް ގެންނަ ބަދަލާއެކު މިހާރު ބޭނުން ކުރަމުންދާ ފޮތްތަކުގައި ހުރި ނަފްރަތު އުފައްދާ ފަދަ ލިޔުންތައް ބަދަލުުކުރުމުގެ މަސައްކަތް އެޑިއުކޭޝަން މިނިސްޓްރީން ފަށާފައިވާ ކަމަށެވެ.
އެޑިއުކޭޝަން މިނިސްޓްރީން މިހާރުވެސް ޕްރިވެންޝަން ޕްރޮގްރާމްތަކާއި ކްރިޓިކަލް ތިންކިން އަދި އެކަކު އަނެކަކަށް އިހުތިރާމް ކުރަން ދަސްކޮށް ދިނުމަށް ހާއްސަ ސަމާލުކަމެއް ދެއްވަވާ ކަމަށް އަފީފް ވިދާޅުވި އެވެ. އަދި ހަމައެހެންމެ މިހާރު ހަރުކަށި ފިކުރައް ލެނބެމުންދާ ދަރިވަރުންތިބި ސްކޫލުތައް ވެސް މިނިސްޓްރީން ފާހަނގަކޮށްފައިވާ ކަމަށް އަފީފު ވިދާޅުވިއެވެ.
ސްކޫލްތަކުގެ އިސްލާމް މުގައްރަރަށް މިގެންނަ ބަދަލާއި ގުޅިގެން ގިނަ އާންމު ރައްޔިތުންނާއި އިލްމުވެރިން ކަންބޮޑުވުން ފާޅުކުރައްވަމުން އެބަގެންދަވައެވެ. މިކަންބޮޑުވުންތައް ހުރި ނަމަވެސް އެޑިއުކޭޝަން މިނިސްޓްރީއިން މިހާތަނަށް ބުނެފައިވަނީ އެމިނިސްޓްރީއާއިއެކު ވާހަކަ ދެކެވުނީ އިސްލާމް މާއްދާ ކިޔަވައިދިނުމަށް ބިދޭސީ ޓީޗަރުން ގެނައުމަށެވެ. އަދި ބުނީ އިސްލާމް މާއްދާގެ މުގައްރަރު ތައްޔާރު ކޮށްފައި ވަނީ ދިވެހި ބަހުން ކަމަށްވެފައި، އެ މާއްދާ ކިޔަވައި ދޭނެ ފެންވަރު ރަނގަޅު ދިވެހި ޓީޗަރުން ރާއްޖޭގައި އެބަތިބި ކަމަށެވެ. އެހެންކަމުން އިސްލާމް މާއްދާ ކިޔަވައިދޭން ބޭރުން ޓީޗަރުން ނުގެންނާނެ ކަމަށާއި އަދި އިނގިރޭސި ބަހުން ވެސް އެ މާއްދާ ކިޔަވައި ނުދޭނެ ކަމަށެވެ.
ނަމަވެސް، ދާދިފަހުން ވަނީ އެޑިއުކޭޝަން މިނިސްޓްރީއިން ޓްރާންސްޕޭރަންސީ މޯލްޑިވްސް އާއިއެކު ހަރުކަށި ވިސްނުން އަށަގަތަ ނުދިނުމަށް ދަރިވަރުންގެ ކިބައިގައި ދީނަށް ލޯބި ޖެއްސުމުގެ ނަމުގައި އެއްބަސްވުމެއްގައި ސޮއެކޮށްފައެވެ. މިއެއްބަސްވުމާއި ގުޅިގެންވެސް ގިނަ ބަޔަކުދަނީ ކަންބޮޑުވުން ފާޅުކުރަމުންނެވެ. އެގޮތުން، މިއެއްބަސްވުމުގައި ހިމެނޭ ކަންތައްތަކާއި މެދު މަޝްވަރާ ކުރުމަށް އިލްމުވެރިންގެ ގުޅުމުންވަނީ އެޑިއުކޭޝަން މިނިސްޓްރީއަށް އެދިފައެވެ.
ހަރުކަށި ވިސްނުން އަށަގަތަ ނުދިނުމަށް ދަރިވަރުންގެ ކިބައިގައި ދީނަށް ލޯބި ޖެއްސުމުގެ ނަމުގައި އެޑިއުކޭޝަނުން އަމިއްލަ ޖަމްޢިއްޔާއަކާ އެކު ސޮއެކޮށްފައިވާ ފަހުމުނާމާގެ މައްސަލައިގައި އެމިނިސްޓްރީއާ ބައްދަލު ކުރުމަށް ޢިލްމުވެރިންގެ ގުޅުމުގެ ފަރާތުން އެދި ސިޓީ ފޮނުވައިފީމެވެ
ޚިޔާލުތައް