މުހައްމަދު ޝިހާބް އެސްޓީއޯ ފުވައްމުލަކު ފިހާރައަށް ފައިސާ ދެކުމުގައި ބޮޑެތި ދަތިތަކެއް ކުރިމަތިވަމުން އަންނަ ކަމުގެ ޝަކުވާ ފުވައްމުލަކުގެ ރައްޔިތުން ކުރަން ފަށައިފިއެވެ.
ވިޔަފާރި ކުރުމުގައި ފުވައްމުލަކުގެ ގިނަ ބަޔަކު ބަރޯސާވެފައިވާ އެސްޓީއޯ 136 ނަމްބަރު ފިހާރައިން ވިޔަފާރިކުރުމަށްފަހު ފައިސާ ދެއްކުމަށް ދަތިތަކެއް ދިމާވަނީ އެފިހާރައިން މިހާރު ނަގުދު ފައިސާ ނޫން ގޮތަކަށް އަގުދެއްކޭނެ އިންތިޒާމެއް ހަމަޖެހިފައި ނެތުމުން ކަމަށް މިކަލް ނޫހުގެ ރިޕޯޓަރު ހާމަކުރައްވައެވެ.
އެފިހާރާގައި ކުރިން ބޭނުންކުރި ބޭންކް އޮފް މޯލްޑިވެސް (ބީއެމްއެލް) ކާޑުމެޝިންގައި މައްސަލަޖެހި، ކޭޝް ކާޑުން ފައިސާ ބަލައިގަތުން ހުއްޓާލާފައިވާ ދުވަސްތަކެއް ވެއްޖެއެވެ. މިހާރު އެމެޝިން ވެސް ފިހާރާގައި ނެތް ކަމަށާއި އަދި އިސްލާމިކް ބޭންކްގެ ކާޑު ބޭނުންކުރެވޭނެ ގޮތެއްވެސް އެފިހާރައިން ހަމަޖައްސާފައި ނެތް ކަމަށް ވެއެވެ.
އެސްޓީއޯ ފުވައްމުލަކު ފިހާރައިގެ އިސްފަރާތަކާއި ހަވާލާދީ މިކަލް ނޫހުގެ ރިޕޯޓަރު މައުލޫމާތު ދިންގޮތުގައި ބީއެމްއެލް ކާޑު މެޝިނުގައި މައްސަލަޖެހިގެން އެކަން ހައްލުކުރުމަށް ބޭންކަށް ހަވާލުކޮށްފައިވާ ކަމަށެވެ. އެކަން ހައްލުވާނެ ދުވަހެއް ބޭންކުން ބުނެފައި ނުވާ ކަމަށާއި އެއިގެ ސަބަބުން އެއްވެސް ކާޑެއް ބޭނުންކޮށްގެން މިހާރު އެފިހާރައަށް ފައިސާ ދެއްކޭނެ ގޮތެއް ނޯންނަކަމަށެވެ.
ފުވައްމުލައް ސިޓީގައި ހުންނަ އެސްޓީއޯ136 ފިހާރަ -ފައިސާ ދެއްކުމުގައި ރައްޔިތުންނަށް ދަތިތަކެއް ދިޟާވޭ.
ކާޑުން ފައިސާ ދެއްކޭނެ ގޮތެއް ނެތުމުން އޮންލައިންކޮށް އެކައުންޓަށް ފައިސާ ޓްރާންސްފާކޮށްގެން ފައިސާ ދެއްކިދާނެތޯ ސުވާލުކުރުމުން ވެސް އެފަދަ އިންތިޒާމެއް އެފިހާރާގައި ހަމަޖެހިފައި ނުވާ ކަމަށް މައުލޫމާތު ދެއްވި ކަމަށެވެ.
ފުވައްމުލަކުގައި ހުންނަ މުޅިރާއްޖެއަށް ވެސް މަޝްހޫރު ދައުލަތުގެ ބޮޑުފިހާރަ އަކި ގިނަބަޔަކު އަބަދުވެސް ވިޔަފާރި ކުރާ ފިހަރާއަކަށްވެފައި، ފައިސާ ދެއްކުމުގައި މިދިމާވާ ދަތިކަމުގެ ސަބަބުން ރަށުގެ ގިނަ ބަޔަކަށް ބޮޑު ތުރާލަކަށްވެފައި ކަމަށް ވެއެވެ. އެގޮތުން ފައިސާ ދައްކަން ޖެހުމުން މިޖެހެނީ އެޓީއެމުން ފައިސާ ނަގައިގެން ނަގުދު ފައިސާ ހިފައިގެން ދާށެވެ. އަދި އޭޓީއެމްގައި މައްސަލަ ޖެހިފައި ހުންނަ ހާލަތްތަކުގައި ވިޔަފާރިކޮށް، ފައިސާ ދެއްކުމަށް ޖެހެނީ އެހެން މީހެއްގެ އަތުން ފައިސާ ހޯދާށެވެ.
މިޒަމަނަކީ އަތުގައި އަބަދު ނަގުދު ފައިސާގެންގުޅެން ރައްކާތެރި ޒަމާނަކަށް ނުވާތީ އަތްމަތީގައި ވިޔަފާރިކުރަން ފައިސާ ގެންގުޅެން ގިނަބަޔަކު ޖެހިލުން ވެއެވެ. ގިނަ މީހުންނަށް ފަސޭހައީ ވެސް ކާޑުން ފައިސާ ދެއްކުމެވެ. އަދި ރައްކާތެރިކަމުގެ ގޮތުން ވެސް އެގޮތް އިޚުތިޔާރުކުރާ މީހުން ފުވައްމުލައް ސިޓީގައި ގިނަ ކަމަށްއެވެ.
ފުވައްމުލައް ސިޓީގެ ރައްޔިތުން އެދެނީ ފުވައްމުލައް ސިޓީގެ ގިނަ ފިހާރަތަކެކޭ އެއްގޮތަށް އެސްޓީއޯ136 ފިހާރައިން ވެސް ފަސޭހަކަމާއި އަދި ރައްކާތެރިކަމާއެކު ވިޔަފާރިކޮށް ފައިސާދެއްކޭނެ އިންތިޒާމައެއް އަވަހަށް ހަމަޖެހިގެން ދިއުމެވެ.
ޚިޔާލުތައް