މިއަހަރު ނިންމަން ބުނި ފުވައްމުލައް ސިޓީގެ މަގުތައް އަންނަ އަހަރަށް ލަސްވެއްޖެ!

މިއަހަރު ނޮވެމްބަރުމަހަށް ނިންމަން ކުރިންބުނި ފުވައްމުލައް ސިޓީގެ މަގުތައް ނިމޭވަރުވާނީ އަންނަ އަހަރު (2022ގައި) ކަމަށް އެމްޓީސީސީގެ ސީއީއޯ ހާމަކުރައްވައިފިއެވެ. އަދި މަގުތަކުގައި ތާރު އެޅުމުގެ މަސައްކަތް ފެށިގެންދާނީ އަންނަ އަހަރު ފުރަތަމަ 3 މަސްތެރޭގައި ކަމަށް ޤަބޫލުކުރައްވާ ކަމަށް ސީއީއޯ އާދަމް އާޒިމް ރާއްޖެޓީވީގައި ވަހަކަދައްކަވަމުން ވިދާޅުވިއެވެ.

އެގޮތުން ފުވައްމުލައް ސިޓީގެ އެތެރޭގެ މަގުތައް ހެދުމުގެ މަސައްކަތް ނިންމާލެވެނީ މިއަހަރު (2021) ނޮވެމްބަރު ހިސާބުގައި ކަމަށެވެ.

މަގުހެދުމުގެ މަސައްކަތް ލަސްވެގެންދިޔައީ އެމަސައްކަތަތަށް ބޭނުންވާ ސާމަނުތަކެއް އިމްޕޯޓް ކުރަންޖެހުމާއި ކޮވިޑާއި ގުޅިގެން ލޮޖިސްޓިކް ދަތިތައް ހުރެގެން އެސާމާނުތައް ލިބުން ލަސްވުމުން ކަމަށެވެ. އަދި މިހާރު ވެސް ސާމާނުތައް ރާއްޖެއަށް ގެނައުމަށް ދަތިވާ ކަމަށް އާޒިމް ހާމަކުރެއްވިއެވެ.

އެތެރޭގެ މަގު ހެދުމުގެ ޕްރޮޖެކްޓް މާބޮޑަށް ވެސް ލަސްވެއްޖެ!

ފުވައްމުލައް ސިޓީ އެތެރޭގެ މަގުތައް ހެދުން ލަސްވާތީ ރައްޔިތުންގެ މަޖުލީހުގެ ފުވައްމުލަކު އުތުރު ދާއިރާގެ މެމްބަރު މުހައްމަދު ރަޝީދު (ދޮންބެ) މިނިސްޓަރ އޮފް ޕްލޭންނިން އެންޑް ހައުސިން މުހައްމަދު އަސްލަމު އާއި 2020 ނޮވެމްބަރު މަހު 6 ގައި ރައްޔިތުންގެ މަޖުލީހުގައި ސުވާލުކޮށްފައި ވެއެވެ. އެއާއި ގުޅިގެން ފުވައްމުލައް ސިޓީގެ އެތެރޭގެ މަގުތައް ހެދުމުގެ މަސައްކަތް އަވަސްކުރުމަށް 2020 ވަނަ އަހަރު ޑިސެމްބަރު މަހުގައި ކަމާއި ގުޅުން ހުރި އިދާރާތަކާއި އެމްޓީސީސީ އާއި ފުވައްމުލައް ސިޓީ ކައުންސިލުން ބައްދަލުކޮށް މަޝްވަރާކޮށްފައި ވެއެވެ.

ދާދި ފަހުން ރައީސުލްޖުމްހޫރިއްޔާގެ ނާއިބު ފައިސަލް ނަސީމު ފަވައްމުލަކަށް ކުރެއްވި ދަތުރުފުޅުގައި ވެސް އެމްޓީސީސީއިން ކުރިޔަށް ގެންދާމަގުހެދުމުގެ މަސައްކަތް ބައްލަވާލައްވާފައި ވެއެވެ. ފުވައްމުލަކުގެ ރައްޔިތުން ބުނަނީ މަގުހެދުމުގެ މަސައްކަތް އެކަށީގެންވާ ބާރުމިނެއްގައި ކުރިޔަށްނުދާ ކަމަށެއެވެ. އަދި އެކަމުގެ ދަތިތަކާއި ކަންބޮޑުވުންތަކުގެ ވާހަކަތައް އާއްމުން ދައްކައެވެ.

އެތެރެގެ މަގު ހެދުމުގެ މަސައްކަތް ދަނީ ފިނިހަކަ ދުވެލީގައި!

އެގޮތުން ފުވައްމުލައް ސިޓީ ކައުންސިލުން ބައްދަލުކުރީ މި މަސައްކަތް ޕްލޭންކޮށް ބަލަހައްޓާ މިނިސްޓްރީ އޮފް ޕްލޭނިން، ހައުސިންގ އެންޑް އިފްރާސްޓްރަކްޗާ އާއި ފުވައްމުލައް ސިޓީގެ ފެނާއި ނަރުދަމާ އަދި ކަރަންޓް ޚިދުމަތްއް ދެމުންގެންދާ ފެނަކަ ކޯޕަރޭޝަނާއި އެމްއެންއެންޑީއެފް-ފުވައްމުލައް އަދި މަސައްކަތް ކުރާ ކުންފުނި އެމް.ޓީ.ސީ.ސީ އާއެކުއެވެ.

ފުވައްމުލައް ސިޓީގެ އެތެރޭގެ 31 މަގެއް ހެދުމުގެ މަސައްކަތް އެމްޓީސީސީއާ ހަވާލުކޮށްފައި ވަނީ 2019 ވަނަ އަހަރުގެ ޖުލައި މަހުގެ 04 ވަނަ ދުވަހެވެ. އަދި އަމަލީ މަސައްކަތް ފަށާފައިވަނީ ޖުލައި 20، 2020 ގައެވެ.

މަގު ހެދުމުގެ މަސައްކަތުގައި ހިމެނެނީ ސަބް ބޭސް ލޭޔާ ހެދުމާއި، ތާރު އެޅުމާއި، މަގުތަައް ކުރެހުމާއި، މަގުބައްތި ހަރުކުރުމާއި ފެންހިންދާ ނިޒާމުގެ ކަންކަމެވެ. މި މަސައްކަތަށް 279.4 މިލިއަން ރުފިޔާ ޚަރަދު ކުރެއެވެ.