ޞާލިޙް ރާއްޖޭގެ މިނިވަން ދުވަހުގެ ރަސްމިއްޔާތުގައި ބައިވެރިވެވަޑައިގަތުމުގެ ދައުވަތު އިންޑިއާގެ ބޮޑުވަޒީރު ނަރެންދުރަ މޯދީއަށް ދީފިއެވެ.
އިންޑިއާގެ ނޫހަކުން ރިޕޯޓުކޮށްފައިވަނީ އިންޑިއާ އާއި ރާއްޖެއާ ދެމެދު އެކުލަވާލާފައިވާ ހައި-ލެވެލް ކޯ ގުރޫޕުގެ ބައްދަލުވުމަށް، ދާދި ފަހުން އިންޑިއާ އަށް ވަޑައިގެންނެވި ފޮރިން މިނިސްޓަރު އަބްދުﷲ ހަލީލް ވަނީ ރައީސް ޑރ. މުހައްމަދު މުއިއްޒުގެ ފަރާތްޕުޅުން، މިނިވަން ދުވަހުގެ ޖަލްސާއަށް ވަޑައިގެންނެވުމަށް މޯދީއަށް ރަސްމީ ދައުވަތު އަރުވައިފައިކަމަށާއި އިންޑިއާ ސަރުކާރުން މިހާރު ވިސްނަމުން ދަނީ މޯދީ ޖުލައި މަހު ރާއްޖެ ވަޑައިގަތުމުގެ އިންތިޒާމު ހަމަޖެއްސުމަށްކަމަށެވެ.
މި ޚަބަރާ ގުޅިގެން ރާއްޖޭއާއި އިންޑިއާ ސަރުކާރުންވެސް މިހާތަނަށް ރަސްމީކޮށް އެއްޗެއް ބުނެފައެއް ނުވާއިރު، އެ ޚަބަރު ތެދުނަމަ، މި ދަތުރުފުޅަކީ ރައީސް ޑރ. މުއިއްޒު ވެރިކަމަށް ވަޑައިގެންނެވި ފަހުން، މޯދީ ރާއްޖެއަށް ކުރައްވާނެ ފުރަތަމަ ދަތުރުފުޅަށް ވެގެންދާނެއެވެ.
ރައީސް މުއިއްޒު ވަނީ މިދިޔަ އޮކްޓޯބަރު މަހު އިންޑިއާއަށް ފުރަމާނަ ދަތުރުފުޅެއް ކުރައްވާފައެވެ. އޭގެ ކުރިން، މިދިޔަ އަހަރުގެ މެދުތެރޭގައި ރައީސް ވަނީ މޯދީ ބޮޑުވަޒީރުކަމުގެ އިތުރު ދައުރަކަށް ހުވާ ކުރެއްވުމުގެ ރަސްމިއްޔާތުގައި ވެސް ބައިވެރިވެވަޑައިގެންފައެވެ.
ޚިޔާލުތައް