ޞާލިޙް ހއ އަތޮޅުން ފެށިގެން ޅ އަތޮޅާ ހަމައަށް މޫސުމާ ބެހޭ ޤައުމީ އިދާރާ، މެޓް އޮފީހުން ވައިތް އެލަރޓް ނެރެފިއެވެ. އެލަރޓް ނެރެފައިވަނީ މިއަދުގެ ހެނދުނު 11:45 އިން ފެށިގެން ހަވީރު 16:00 އާ ހަމައަށެވެ.
އެގޮތުން ގަޑިއަކު 19 މޭލާއި 24 މޭލާ ދެމެދުގެ ބާރުމިނުގައި ވައިޖެހޭނެ ކަމަށް ލަފާކޮށްފައިވާއިރު، ވިލާގަނޑުގައި ގަޑިއަކު 40 މޭލަށް ވައިގަދަވާނެކަމަށް ލަފާކުރެވޭ ކަމަށްވެސް މެޓުން ވަނީ ލަފާކޮށްފައެވެ.
މީގެ އިތުރުން ދިޔަވަރު ބޮޑުވާ ގަޑިތަކުގައި ބައެއް ރާސްތަކަށް އުދައިގެ އަސަރުކޮށްފާނެކަމަށާއި، އުތުރާއި މެދުރާއްޖެތެރޭގައި ކަނޑު ދަތުރުކުރާ ފަރާތްތަކުން މޫސުމަށް ޚާއްސަ ސަމާލުކަމެއް ދިނުމަށް އިލްތިމާސްކުރާކަމަށްވެސް މެޓުން ވަނީ ބުނެފައެވެ.
މިއަދު މޫސުން ގޯސްވެ ވައިބާރުވުމުގެ ސަބަބުން ހދ. ކުޅުދުއްފުއްޓަށް ދަތުރު ކުރަމުން ދިޔަ ފްލައިޓެއްވެސް ނުޖެއްސިގެން އަނބުރާ ވަނީ މާލެއަށް އައިސް ޖައްސައިފައެވެ. މޯލްޑިވިއަންގެ އެ ބޯޓު ކުޅުދުއްފުއްޓަށް ޖައްސަން އޮތީ މިއަދު ހެނދުނު 9:40ގައެވެ. ބޯޓު ވެލާނާ އިންޓަނޭޝަނަލް އެއާޕޯޓުގައި ޖެއްސީ މިއަދު 11:00 ޖަހާކަންހާއިރެވެ.
މެޓުން އިއްޔެ ބުނެފައިވަނީ މިހާރު ކުރަމުންމިދާ ވިއްސާރައަކީ މޫސުމީ ވިއްސާރައެއް ކަމަށާއި ދެކުނުގެ އަތޮޅުތަކަށް މޫސުން އަލިވާނީ އަންނަ ހޯމަ ދުވަހުން ފެށިގެން ކަމަށެވެ. އަދި އުތުރާއި މެދުރާއްޖެތެރެއަށް އަންނަ އަންގާރަ ދުވަހުން ފެށިގެން މޫސުން އަލިވާނެ ކަމަށް އެ އޮފީހުން ވަނީ ބުނެފައެވެ.
ޚިޔާލުތައް