މާލޭގައި ގްރޫޕަކުން ގޮސް ހަމަލާދީ މަރާލި މުހައްމަދު އަނަސްގެ މަރުގެ މައްސަލާގައި ދައުލަތުން ދައުވާކުރާ މީހުން ބަންދު ނުކުރަން ހައި ކޯޓުން ދެވަނަ ފަހަރަށް ނިންމި ނިންމުން ބާތިލްކޮށް، އެ އެންމެން ބަންދުކުރަން ސުޕްރީމް ކޯޓުން މިއަދު އަމުރުކޮށްފިއެވެ.
އަނިޔާވެރި ގޮތަކަށް މަރާލާފައިވާ ރ. މީދޫ، ފެންފިޔާޒުގެ މުހައްމަދު އަނަސްގެ މަރުގެ މައްސަލައިގައި ދައުވާ ލިބޭ ހަތް މީހުން ޝަރީއަތް ނިމެންދެން ބަންދުގައި ބަހައްޓަން ނުޖެހޭ ކަމަށް ހައިކޯޓުން ނިންމި ނިންމުމާމެދު ހިތްހަމަނުޖެހި ދައުލަތުން އެ މައްސަލަ އަނެއްކާވެސް ސްޕްރީމް ކޯޓަށް ހުށަހެޅީ މީގެ ދެ ހަފްތާ ކުރިންނެވެ.
މި މައްސަލައިގައި ދައުލަތުން ކޯޓުގައި ހަތް މީހެއްގެ މައްޗަށް ދައުވާ އުފުލިއެވެ. އެއީ ދަފްތަރު ނަމްބަރު 1746 ސިމާހު މޫސާ އާއި ސ. ފޭދޫ ވެސްޓަންވިލާ ހަސަން މަހްފޫޒް އާއި ތ. ކިނބިދޫ ގުލްފާމުގޭ މުހައްމަދު ޝާޒް އާއި ލ. ގަން ތުނޑީ، ނަންނާރިގެ ޖުނައިހު އަބްދުﷲ އާއި މ. ދިމިޝްގު އުސްމާން ޝަރީފާއި ޅ. ކުރެންދޫ އަސުރުމާގޭ އަހުމަދު ޒަޔާނާއި މ. ލޮނުމިދިލިގޭ އަފްރާހު އަބްދުލް ރައްޒާގެވެ.
މި މައްސަލައިގައި އެ މީހުން ބަންދު ކުރަން ސުޕްރީމް ކޯޓުން މިއަދު އަމުރު ކުރީ، ދެވަނަ ފަހަރަށް އެ މައްސަލަ ހުށަހެޅުމުންނެވެ.
މި މައްސަލައިގައި މިދިޔަ އަހަރުގެ ފެބްރުއަރީގައި ކްރިމިނަލް ކޯޓުން ހުކުމްކުރީ އެކަކުގެ މައްޗަށް ވެސް ކުށް ސާބިތުނުވާ ކަމަށެވެ. އެ ނިންމުން ދައުލަތުން ހައިކޯޓުގައި އިސްތިއުނާފުކޮށް، އެ މީހުން ބަންދުކޮށްދޭން އެދުނު ނަމަވެސް ހައިކޯޓުން އެ އަމުރު ނެރެނުދިނެވެ. އެކަމާ ގުޅިގެން ދެ ފަހަރު މަތިން ސުޕްރީމް ކޯޓަށް މި މައްސަލަ ހުށަހެޅިއެވެ.
މި މައްސަލައިގައި މިހާތަނަށް ކުށް ސާބިތުވެފައިވަނީ 17 އަހަރުގެ ކުއްޖެއްގެ މައްޗަށް އެކަނިއެވެ. އެ ކުއްޖާއަށް ހައިކޯޓުން އިއްވި 18 އަހަރުގެ ޖަލު ހުކުމް ކުރީގެ ރައީސް އިބްރާހިމް މުހައްމަދު ސޯލިހް ވަނީ ލުއިކޮށްދެއްވާފައެވެ.
އަނަސް މަރާލާފައިވަނީ 2017 ވަނަ އަހަރުގެ ޖުލައި މަހުގެ 31 ވަނަ ދުވަހުގެ ރޭގެ ވަގުތެއްގައި ލިޓަސް ސާވިސް ސެންޓަރު ތެރޭގައި، ތޫނު އެއްޗެހި ހިފައިގެން އައި ގްރޫޕަކުންނެވެ.
ޚިޔާލުތައް