ޙާޖީ އެމްވީގެ ނަމުގައި ހައްޖާއި އުމްރާގެ މައުލޫމާތު ފޯރުކޮށްދިނުމަށް އިސްލާމީ ކަންތައްތަކާ ބެހޭ ވުޒާރާއިން ހާއްސަ އެޕެއް ނެރެފިއެވެ.
އިސްލާމީ ކަންތައްތަކާއި ބެހޭ ވަޒީރު ޑރ. މުހައްމަދު ޝަހީމް އަލީ ސައީދު ވިދާޅުވީ ހާޖީ އެމްވީ އެޕަކީ ފަސޭހައިން ހައްޖާއި އުމްރާއާ ބެހޭ މަޢުލޫމާތު ލިބިގަތުމަށް އެކުލަވާލާފައިވާ އެޕެއް ކަމަށާއި މީގެ އިތުރުން ޒިކުރުކުރުމާއި ތަވާފާއި ސައުޔުގެ އަދަދު ކަށަވަރު ކުރާނެގޮތާއި ގުރުއާނާއި ސުންނަތުން ސާބިތުވާ ދުއާތަކާއި ހައްޖާއި އުމްރާއާ ގުޅޭ މައުލޫމާތު ހިމެނޭ ވީޑިއޯގެ އިތުރުން މައްކާއާއި މަދީނާގެ އިސްލާމީ ތާރީހާ ބެހޭ ވީޑިއޯ ވެސް ބެލެން ހުންނާނެ ކަމަށެވެ.
މިއީ އެޕްގެ ފުރަތަމަ ވާޝަންކަން ފާހަގަކުރައްވާ ވަޒީރު ވިދާޅުވީ މި އެޕް އިތުރަށް ތަރައްގީ ކުރެވިގެން ދާނެ ކަމަށާއި އަމާޒަކީ އެޕް މެދުވެރިކޮށް ހައްޖާއި އުމްރާގެ އަޅުކަން އަދާކުރުމަށް ފަސޭހަވެގެން ދިޔުން ކަމަށެވެ.
މި އެޕްގައި ހިމެނޭ އެންމެހައި މައުލޫމާތަކީ އިސްލާމީ ކަންތައްތަކާ ބެހޭ ވުޒާރާއިން ފާސްކޮށްފައިވާ މައުލޫމާތެކެވެ. މި އެޕްގެ ސަބަބުން ދުއާފޮތްތަކާއި ހައްޖާއި އުމްރާއާއި ބެހޭ ފޮތްތަކާ ނުލައި، ފޯން އެކަނި މިދާއިރާއާ ގުޅޭ މައުލޫމާތު ހާސިލްކުރެވޭނެއެވެ.
ސަރުކާރުން ދަނީ ހައްޖާއި އުމްރާއަށް ދާ މީހުންނަށް ލުއި ފަސޭހަ ގޮތްތަކެއް ހަމަޖެއްސުމަށް މަސައްކަތް ކުރަމުންނެވެ. އެގޮތުން މިއަހަރުގެ ހައްޖު މޫސުމުގައި ދިވެހި ހައްޖާޖީންނަށް ލިބިފައިވަނީ ހާއްސަ އިމްތިޔާޒުތަކެކެވެ. އެގޮތުން، މައްކާ ރޫޓު އިނީޝިއޭޓިވްގެ ދަށުން ދިވެހި ހައްޖާޖީންނަށް ޖިއްދާ އެއާޕޯޓުގައި ހޭދަކުރަން ޖެހުނީ އެންމެ ތިން މިނެޓެވެ.
ޚިޔާލުތައް