ކުރިއަށް އޮތް ދެ މަސްދުވަސްތެރޭ އިންޖީނުލީ އެއްގަމު އުޅަނދުތަކަށް އަމާޒުކޮށް ކޮމްޕްރިހެންސިވް އިންޝުއަރެންސް ޕެކޭޖެއް ތައާރަފް ކުރުމުގެ މަސައްކަތް ކުރަމުން ގެންދާ ކަމަށް ދަތުރުފަތުރާއި މަދަނީ އުދުހުންތަކާއި ބެހޭ ވަޒީރު މުހައްމަދު އަމީން ވިދާޅުވެއްޖެއެވެ.
ދައުލަތުގެ މީޑިއާގެ ޕްރޮގްރާމެއްގައި ވާހަކަ ދައްކަވަމުން އަމީން ވިދާޅުވީ، ކޮމްޕްރިހެންސިވް އިންޝުއަރެންސް ޕެކޭޖެއް ތައާރަފު ކުރުމުގެ މަސައްކަތް މިނިސްޓްރީން އިންޝުއަރެންސް ކުންފުނިތަކާ ގުޅިގެން ކުރަމުން އަންނަ ކަމަށެވެ. އެ އިންޝުއަރެންސް ސްކީމްގެ ޕެކޭޖުތައް ދެ މަހެއްހާ ދުވަސް ތެރޭގައި ތައާރަފު ކުރެވޭނެ ކަމަށް ވަޒީރު ވިދާޅުވިއެވެ.
“ގާނޫނު ފާސްވެގެން އައިމަ މައްސަލަތަކަށް ހައްލެއް އަންނާނެ، އެހެންނަމަވެސް މިހާރު އޮތް ގާނޫނުގެ ދަށުންވެސް ތާޑް ޕާޓީ އިންޝުއަރެންސަށް ކޮމްޕްރިހެންސިވް އިންޝުއަރެންސް ޕެކޭޖާއެކީގައި ހުރިހާ އިންޝުއަރެންސް ކުންފުނިތަކާއެކީ ވާހަކަ ދައްކައިގެން އިންޓްރޮޑިއުސް ކުރުމުގެ މަސައްކަތް މިހާރު އެބަދޭ. އަޅުގަނޑު ލަފާކުރާ ގޮތުގައި ކުރިޔަށް އޮތް 45 ދުވަސް ނޫނިއްޔާމުން ދެމަސްދުވަސްތެރޭގައި އާ ކޮމްޕްރެހެންސިވް އިންޝުއަރެންސް ޕެކޭޖެއް އިންޓްރޮޑިއުސް ކުރެވިގެންދާނެ.” އަމީން ވިދާޅުވިއެވެ.
މި އާ ސްކީމްގެ މަގުސަދަކީ، މިހާރު ލާޒިމުކޮށްފައިވާ ތާޑް ޕާޓީ ކަވަރޭޖަށްވުރެ ފުޅާ ކަވަރޭޖެއް އުޅަނދުތަކަށް ފޯރުކޮށްދިނުމެވެ.
އަމީން އިތުރަށް ވިދާޅުވީ، މާލޭގެ ޓްރެފިކް މައްސަލައަށް ހައްލެއް ގެނައުމަށްޓަކައި ގާނޫނަށް ގެންނަން ޖެހޭ ބަދަލުތައް ގެނައުމުގެ މަސައްކަތް ވެސް ކުރަމުން އަންނަ ކަމަށެވެ. މިއީ މާލޭގެ މަގުތަކުގައި ދިމާވާ ތޮއްޖެހުމާއި އެކްސިޑެންޓްތައް މަދުކޮށް، ޓްރެފިކްގެ ހާލަތު ރަނގަޅުކުރުމަށްޓަކައި ކުރެވޭ މަސައްކަތެކެވެ.
މި އާ އިންޝުއަރެންސް ސްކީމާއެކު އެއްގަމު އުޅަނދުތަކުގެ ވެރިފަރާތްތަކަށް އިތުރު ރައްކާތެރިކަމެއް ލިބި، އަދި މާލޭގެ ޓްރެފިކް މައްސަލައަށް ލިބޭ ހައްލަކީ ރައްޔިތުންނަށް ލިބޭނެ ފަސޭހައަކަށް ވާނެއެވެ.
މިހާރުވެސް އިންޖީނުލީ އެއްގަމު އުޅަނދުތަކުން ތާޑް ޕާޓީ އިންޝުއަރެންސް ހެދުމަކީ ޓްރާންސްޕޯޓް މިނިސްޓްރީގެ ގަވައިދުން ލާޒިމްކުރާ ކަމެކެވެ. ތާޑް ޕާޓީ އިންޝުއަރެންސަކީ އިންޝުއަރެންސް ހަދާފައިވާ ހުންނަ އުޅަނދަކުން އެހެން އުޅަނދުތަކަށް ލިބޭ ގެއްލުން ކަވަރު ކޮށްދޭ އިންޝުއަރެންސެކެވެ. މިއީ އެކްސިޑެންޓްތަކުން ދިމާވާ މާލީ ބުރަތައް ކުޑަކުރުމަށްޓަކައި މުހިންމު ކަމެކެވެ.
ޚިޔާލުތައް