ބ. އޭދަފުށީ ކައުންސިލުން މުވައްޒަފަކަށް އިތުރުގަޑީގެ ފައިސާ ދިނުމުގައި ގަވައިދާ ހިލާފަށް އަމަލުކޮށްފައިވާކަން އެ ކައުންސިލުގެ އޮޑިޓް ރިޕޯޓުން ހާމަވެއްޖެއެވެ.
އޮޑިޓާ ޖެނެރަލް އޮފީހުން އާންމުކުރި އޭދަފުށީ ކައުންސިލްގެ 2023 ވަނަ އަހަރުގެ އޮޑިޓް ރިޕޯޓުން ވަނީ އެކައުންސިލްގެ މާލީ އަދި އިދާރީ ކަންކަމުގައި ބޮޑެތި މައްސަލަތަކެއް ފާހަގަކޮށްފައެވެ. މި މަހުގެ 1 ވަނަ ދުވަހު އާންމުކުރި މި ރިޕޯޓުގައި ބުނާގޮތުން 2023 ވަނަ އަހަރު އޭދަފުށީ ކައުންސިލުން ވަނީ މުވައްޒަފަކަށް އިތުރު ގަޑީގެ ފައިސާ ދިނުމުގައި އެއްވެސް ލިމިޓެއް ނެތި އަމަލުކޮށްފައެވެ.
“ކައުންސިލު އިދާރާގެ މުވައްޒަފުންނަށް 2023 ވަނަ އަހަރުގެ ތެރޭގައި އިތުރު ގަޑީގެ ފައިސާ ދީފައިވާ ގޮތުން އޮޑިޓުގައި ބެލިއިރު އިތުރު ގަޑީގެ ފައިސާދޭންޖެހޭ ވަރަށް ވުރެ އިތުރަށް ކައުންސިލްގެ އިދާރާގެ މުވައްޒަފަކަށް 1,448 (އެއްހާސްހަތަރުސަތޭކަ ސާޅީސްއަށެއް)
ރުފިޔާ ދީފައިވާކަން ފާހަގަކުރެވެއެވެ. އެމުވައްޒަފުގެ އިތުރު ގަޑީގެ ފައިސާގެ ހިސާބުކުރުމުގައި އިތުރުގަޑީގެ ގޮތުގައި މުވައްޒަފު ރިކޯޑުކުރާ ޝީޓްތަކުގައި މަސައްކަތް ފެށި ގަޑިއާއި މަސައްކަތް ނިންމި ގަޑީގެ ގޮތުގައި ލިޔެފައިވާ ގަޑިތަކަށް ބިނާކޮށް އިތުރު ގަޑީގައި މަސައްކަތްކުރި ގަޑިތަކުގެ އަދަދު ހިސާބުނުކޮށް ހަމައެކަނި މަސައްކަތްކުރި ޖުމުލަ ގަޑިއިރުގެ ގޮތުގައި މުއްވައްޒަފު ލިޔެފައިވާ ޖުމުލަ ގަޑިއިރަށް ބަލައިގެން އިތުރު ގަޑީގެ ފައިސާ ހިސާބުކޮށްފައިވުމުން 2023 ވަނަ އަހަރުގައި މި މުވައްޒަފުގެ މަހެއްގެ އިތުރު ގަޑީގެ
ފައިސާ ހިސާބު ކުރުމުގައި އުނިއިތުރު އައިސްފައިވާކަން ފާހަގަކުރެވެއެވެ.” އޮޑިޓް ރިޕޯޓުގައި ބުނެފައިވެއެވެ.
މި އަދަދުތަކަށް ބަލާއިރު، ބައެއް މުވައްޒަފުންނަށް އެ މުވައްޒަފުންގެ އަސާސީ މުސާރައާއި އިނާޔަތްތަކުގެ 86 ޕަސެންޓާ އެއްވަރުގެ އަދަދެއް އިތުރު ގަޑީގެ ފައިސާގެ ގޮތުގައި ދީފައިވާއިރު ބައެއް މުވައްޒަފުންނަށް އިތުރުގަޑީގެ ފައިސާ ލިބެން ޖެހޭ ވަރަށް ނުލިބުމަކީ ކަންބޮޑުވާންޖެހޭ ކަމެއް ކަމަށް އޮޑިޓް ރިޕޯޓުގައި ބަޔާންކޮށްފައިވެއެވެ. އެހެންކަމުން އިތުރަށް ދީފައިވާ ފައިސާ މުވައްޒަފުން އަތުން ހޯދުމަށް އޮޑިޓް އޮފީހުން ވަނީ އަންގާފައެވެ.
މީގެ އިތުރުން، ކައުންސިލްގެ މުވައްޒަފުން ރަސްމީ ގަޑީގައި އެކިއެކި ބޭނުންތަކަށް ބޭރަށް ދާ ގަޑިއާއި އެނބުރި އަންނަ ގަޑީގެ އެއްވެސް ރެކޯޑެއް އެ ކައުންސިލުން ބަލަހައްޓާފައި ނުވާއިރު، މިއީ މުވައްޒަފުންގެ ހާޒިރީ ބެލެހެއްޓުމުގައި ހުރި ނާގާބިލުކަމެއްގެ ގޮތުގައި އޮޑިޓާ ޖެނެރަލްގެ އޮފީހުން ފާހަގަކުރެއެވެ.
ކައުންސިލް އިދާރާގެ 34 މުވައްޒަފުންނަށް އެ އަހަރު އިތުރު ގަޑީގެ ފައިސާގެ ގޮތުގައި ޖުމުލަ 530،335 ރުފިޔާ ދޫކޮށްފައިވެއެވެ.
މަސައްކަތްތައް ހަވާލުކޮށް ހިންގުމުގައި ވެސް ބޮޑެތި ގޯސްތަކެއް ހުރިކަން އޮޑިޓް ރިޕޯޓުން ހާމަވެއެވެ. 2023 ވަނަ އަހަރު، އޭދަފުށީ ކައުންސިލުން ވަނީ އެކަށީގެންވާ ސަބަބެއް ނެތި މަސައްކަތުގެ މުއްދަތު އިތުރުކޮށްދީފައެވެ. މިގޮތުން، ކައުންސިލްގެ ޕިކަޕެއް މަރާމާތުކުރުމަށް 135،000 ރުފިޔާއަށް 49 ދުވަސް ތެރޭ ނިންމަން އަމިއްލަ ފަރާތަކާ ހަވާލުކުރި މަސައްކަތުގެ މުއްދަތު، އެއްވެސް އެކަށޭނެ ސަބަބަކާ ނުލައި އިތުރު 25 ދުވަހަށް ދިގުދަންމާލާފައިވާކަން އޮޑިޓުން ހާމަވެއެވެ.
އޮޑިޓް ރިޕޯޓުގައި ފާހަގަކޮށްފައިވާ އެންމެ ސީރިއަސް އެއް މައްސަލައަކީ، މަސައްކަތް ނިންމުމުގެ ކުރިން މަސައްކަތް ނިންމި ކަމުގެ ޗެކް ލިޔުންތައް ތައްޔާރުކޮށް ސޮއިކޮށްފައިވާ މައްސަލައެވެ. މިގޮތުން، އެ ރަށުގެ މުއީނުއްދީން މިސްކިތުގެ ފެންޑާ މަރާމާތުކުރުމަށް 184،372 ރުފިޔާއަށް އަމިއްލަ ފަރާތަކާ ހަވާލުކުރި މަސައްކަތް 73 ދުވަހުގެ ތެރޭގައި ނިންމަން ޖެހެއެވެ. މަސައްކަތް ނިންމަން ޖެހޭ ތާރީހަކީ 23 އޮކްޓޫބަރު 2023 އެވެ. ނަމަވެސް، ކައުންސިލުން އެ މުއްދަތަށް މަސައްކަތް ނިންމާފައިވާ ކަމަށް ބުނިނަމަވެސް، ހަވާލުކުރި ފަރާތުން ކައުންސިލަށް ހުށަހެޅި ލިޔުމުން އެ މަސައްކަތް ނިމިފައިވަނީ 5 ނޮވެމްބަރު 2023 ގައިކަން ވަނީ ހާމަވެފައެވެ.
މި މައްސަލަތަކުގެ އިތުރުން، އެއްފަރާތަކަށް ކުރެވިދާނެ މަސައްކަތްތައް ބައިބައިކޮށްގެން ވަކި މަސައްކަތްތަކެއްގެ ގޮތުގައި ކޮށްފައިވުމާއި، ބީލަމާ އެކީގައި ހުށަހަޅަން ޖެހޭ ލިޔުންތައް ފުރިހަމަނުވާ ބީލަންތައް ބަލައިގެންފައިވުމާއި، ގަވާއިދާ އެއްގޮތަށް ހަރުމުދާ ބަލަހައްޓާފައި ނުވުން ފަދަ ކަންކަން ވެސް އޮޑިޓް ރިޕޯޓުގައި ފާހަގަކޮށްފައިވެއެވެ.
2023 ވަނަ އަހަރު އޭދަފުށީ ކައުންސިލްގެ ބަޖެޓަކީ 25.7 މިލިއަން ރުފިޔާ ކަމަށްވާއިރު، އަހަރު ނިމުނުއިރު އޭގެ ތެރެއިން 17.5 މިލިއަން ރުފިޔާ ވަނީ ހަރަދުކޮށްފައެވެ. އެންމެ ބޮޑު ހަރަދެއް ކޮށްފައިވަނީ މުވައްޒަފުންގެ މުސާރައަށް ކަމަށް އޮޑިޓުން ހާމަވެއެވެ. މުވައްޒަފުންގެ މުސާރައަށް 5.9 މިލިއަން ރުފިޔާ ހަރަދުކޮށްފައިވާ ކަމަށްވެއެވެ. މިފަދަ ބޮޑެތި މާލީ ހަރަދުތަކާއެކު މިފަދަ މައްސަލަތަކެއް ފެންމަތިވުމަކީ ސަރުކާރުގެ ބަޖެޓު ރައްޔިތުންނަށް ފައިދާވާނެ ގޮތަކަށް ހަރަދުކުރުމަށް ހުރި ގޮންޖެހުންތަކެއްގެ ގޮތުގައި ގިނަ ބަޔަކު ދެކެއެވެ.
ޚިޔާލުތައް