އޭވިއޭޝަން ސެކިއުރިޓީ ކޮމާންޑްގެ އޮފިސަރުން ރަސްމީ މަސައްކަތުގެ ގަޑިއަކީ ހަ ގަޑިއިރު ކަމަށް ކަނޑައަޅައި ގަވާއިދަށް އިސްލާހު ގެނެސްފިއެވެ.
އޭވިއޭޝަން ސެކިއުރިޓީ ކޮމާންޑުގެ އޮފިސަރުންގެ މަސައްކަތު ގަޑިއާއި ޗުއްޓީ އަދި ބަންދު ދުވަސްތަކާއި، ހިންގުމުގެ އިސްފަންތީގެ މުވައްޒަފުން ޢަމަލުކުރަންޖެހޭގޮތުގެ ގަވާއިދަށް މިއަދު ގެނެސްފައިވާ އިސްލާހުގައިވާގޮތުން އޮފިސަރުންގެ ރަސްމީ މަސައްކަތުގެ ގަޑިއަކީ ދުވާލަކު ހަ ގަޑިއިރެވެ.
މީގެ ކުރިން އެ އޮފިސަރުންގެ ރަސްމީ މަސައްކަތުގެ ގަޑިއަކީ އަށް ގަޑިއިރެވެ.
މިގޮތުން އޭވިއޭޝަން ސެކިއުރިޓީ ކޮމާންޑުގެ ހިދުމަތުގެ ރަސްމީ މަސައްކަތު ގަޑީގެ ދިގުމިނަކީ ދަންފަޅީގެ އުސޫލުން ހަ ގަޑިއިރު ނަމަވެސް ރަމަޟާންމަހުގައި މުވައްޒަފުންނަށް ލުއިވާނޭހެން ދަންފަޅި ހަމަޖެއްސިދާނެ ކަމަށް ބުނެފައި ވެއެވެ.
އަދި އެ ގަވާއިދުގައިވާގޮތުން އޭވިއޭޝަން ސެކިއުރިޓީ ކޮމާންޑުގެ އޮފިސަރުންގެ އިތުރުގަޑި ހިސާބުކުރާނީ ދުވާލަކު ހަ ގަޑިއިރަށް ވުރެ އިތުރަށް މަސައްކަތް ކުރަން ޖެހި ހުއްދަ ލިބިގެން މަސައްކަތް ކުރާ ވަގުތަށެވެ.
އޭގެ އިތުރުން މުވައްޒަފުން މަސައްކަތު ގަޑިއަށް ހާޒިރުވެފައިވަނީ މަސައްކަތުގެ ގަޑީގެ ބޮޑުބައި (ތިން ގަޑިއިރަށްވުރެ ވުރެ ގިނައިރު) ފާއިތުވި ފަހުންކަމުގައިވާނަމަ، އެ ދުވަހަކީ މުވައްޒަފު އޮފީހަށް ހާޒިރުނުވާ ދުވަހެެއްގެ ގޮތުގައި ބަލައި، މަސައްކަތް ކުރުމުގެ ހުއްދަ އެ މުވައްޒަފަށް ނުދެވޭނެ ކަަމަށްވެސް ބުނެފައި ވެއެވެ. އަދި މިފަދަ މުވައްޒަފުންނަށް ގަވާއިދުގައިވާގޮތުގެ މަތިން އިސްލާހީ ފިޔަވަޅު އަޅަން ވާނެ ކަމަށް ބުނެފައި ވެއެވެ.
ޚިޔާލުތައް