އދ. މާމިގިލި ކައިރިއަށް ފީނަން ފޭބި 15 އަހަރުގެ ލޫތު އަހްމަދު ނިޔާވުމަކީ ނުތަނަވަސް އިހްސާސްތަކެއް ކުރުވި ހިތްދަތި ހަބަރެއް ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
ރައީސް މިއަދު “އެކްސް”ގައި ކުރެއްވި ޕޯސްޓެއްގައި ވިދާޅުވީ މޫދަށް ގޮސް އުޅެނިކޮށް އުމުރުން 15 އަހަރުގެ ކުޑަ ކުއްޖަކު ނިޔާވުމަކީ، ހިތާމަވެރި، ނުތަނަވަސް އިހުސާސްތަކެއް ކުރުވި ހިތްދަތި ހަބަރެއް ކަމަށެވެ.
އދ. މާމިގިލީގައި ރޭ ހިނގި އެ ހިތާމަވެރި ހާދިސާގައި ނިޔާވި ލޫތު ބިން އަހްމަދަށް ސުވަރުގޭގެ ދާއިމީ ނިއުމަތް މާތްﷲ މިންވަރު ކޮށްދެއްވުމަށް އެދިވަޑައިގެން، އެ އާއިލާއަށް ކެތްތެރިކަން ދެއްވުމަށް ރައީސް ދުއާ ކުރެއްވިއެވެ.
ލޫތް ފީނަން ދިޔައީ އެހެން ކުދިންތަކަކާއެކުގައެވެ. ފީނަން ގޮސް އުޅުނު ހަތަރު ކުޑަކުދިންގެ ތެރެއިން ލޫތް ގެއްލިގެން މައްސަލަ ފުލުހުންނަށް ހުށަހެޅީ އިއްޔެއެވެ.
އެ ކުދިންނަކީ ބޯވަ ނަގަންވެގެން މޫދަށް ފޭބި ކުދިންތަކެއް ކަމަށް ވެއެވެ.
ލޫތު ފެނިފައިވަނީ ފީނަން ފޭބި ސަރަހައްދާ ކައިރިންނެވެ. އަދި ސިއްހީ މަރުކަޒާ ހަވާލާދީ ފުލުހުން ވިދާޅުވީ އެ މަރުކަޒަށް ގެނައިއިރު ވެސް އެ ކުއްޖާ ނިޔާވެފައިވާ ކަމަށެވެ.
ޚިޔާލުތައް