އަންނަ ބުރާސްފަތި ދުވަހުން ފެށިގެން ހުޅުލޭގައި ހަދާފައިވާ ޕާކިން ޒޯންތަކުގައި ޕާކްކުރުން ވަގުތީ ގޮތުން މަނާކޮށްފިއެވެ.
އެމްއޭސީއެލްއިން ނެރުނު ބަޔާނެއްގައި ވިދާޅުވެފައިވަނީ ވެލާނާ އިންޓަނޭޝަނަލް އެއާޕޯޓުގެ އާ ޓާމިނަލް ހުޅުވުމަށް މި މަހުގެ 26 ވަނަ ދުވަހު ބާއްވަން ހަމަޖެހިފައިވާ ރަސްމިއްޔާތަށް ވަމުން އަންނަ ތައްޔާރީތަކާ ގުޅިގެން ހުޅުލޭގައި ހަދާފައިވާ ޕާކިން ޒޯންތަކުގައި ޕާކުކުރުން ވަގުތީ ގޮތުން މަނާކުރުމަށް ވަނީ ނިންމައިފައި ކަމަށެވެ.
އެގޮތުން އިރުމަތީ ފަރާތު ޕާކިން ޒޯންގައި މި މަހުގެ 17 ވަނަ ދުވަހުން ފެށިގެން ހަތަރު ފުރޮޅުލީ އުޅަދުތައް ޕާކުކުރުމަކީ މަނާކަމެއް ކަމަށް އެމްއޭސީއެލްއިން ވިދާޅުވެއެވެ.
އެހެންކަމުން، އެ ތާރީހުގެ ކުރިން އެ ޕާކިން ޒޯނުގައި ޕާކުކޮށްފައިވާ ހަތަރުފުރޮޅުލީ އުޅަނދުތަކުގެ ވެރިފަރާތްތަކުން ނުވަތަ އުޅަނދު ބެލެހެއްޓުމާ ހަވާލުވެ ހުރި ފަރާތަކުން އެ އުޅަނދުތައް ނަންގަވައިދެއްވުން އެދޭ ކަމަށް އެ ކުންފުނިން ވިދާޅުވިއެވެ.
އެމްއޭސީއެލްއިން ވިދާޅުވީ ހުޅަނގު ފަރާތު ޕާކިން ޒޯންގައި 17 ވަނަ ދުވަހުގެ 18:00 ގެ ފަހުން އެއްވެސް އެއްގަމު އުޅަނދެއް ޕާކުކުރުމަކީ މަނާ ކަމެއް ކަމަށެވެ.
އެ ތާރީހަށްފަހު ފުލުހުންނާއި ގުޅިގެން އެ ޕާކިން ޒޯންތަކުން އުޅަނދުތައް ހުސްކުރެވޭނެ ކަމަށާއި އަދި ޕާކިން ޒޯނުތަކުގައި އަލުން ޕާކު ކުރެވޭނެ ތާރީހެއް ފަހުން އިއުލާންކުރާނެ ކަމަށް އެމްއޭސީއެލްއިން ވިދާޅުވިއެވެ.
އެމްއޭސީއެލްއިން ވަނީ އެ ބަދަލާ ގުޅިގެން އެ ޕާކިން ޒޯނުތަކުގައި ޕާކުކުރާ ފަރާތްތަކަށް ދިމާވެދާނެ ދަތިތަކަށް ޓަކައި ނިހާޔަތައް މައާފަށް އެދިފައެވެ.
ޚިޔާލުތައް