ރާއްޖޭގެ ސިއްހީ ދައިރާއަށް ގިނަ ދުވަސްތަކެއް ވަންދެން ހިދުމަތް ކުރެއްވި ހ.ސެންޓާލަމް/ އަބްދުލްކަރީމް އާދަމް (ކަރީމްބެ) 80އ. ގައި އަވަހާރަވުމާއި ގުޅިގެން ރައީސް ޑރ. މުހައްމަދު މުއިއްޒު އާއިލާއަށް ތައުޒިޔާ ވިދާޅުވެއްޖެއެވެ.
ކަރީމްގެ އަވާހަރަވީ އިއްޔެއެވެ. ކަރީމްބެ އަވަހާރަވުމާއި ގުޅިގެން އެކްސްގައި ކުރެއްވި ޕޯސްޓެއްގައި ރައީސް ވިދާޅުވީ، 47 އަހަރަށް ވުރެ ދިގު މުއްދަތަކު ސިއްހީ ދާއިރާގައި ޚިދުމަތް ކުރެއްވި، އެތައް ބަޔަކަށް ބޭސްފަރުވާ ކޮށްދެއްވި ހިދުމަތްތެރިޔާ، ކަރީމްބެ އަވަހާރަވުމުގެ ހިތާމައިގާ، އެ މަރުހޫމްގެ އާއިލާއަށް ތައުޒިޔާ ދަންނަވާ ކަަމަށެވެ.
އަދި ރާއްޖޭގެ ސިއްހީ ހިދުމަތުގެ ދާއިރާއަށް މި ގެއްލުނީ، އެ ދާއިރާއަށް މި ވޭތުވި ބައި ގަރުނަށް ވުރެ ގިނަ ދުވަހު އައި ބަދަލުތައް ގާތުން ދެކެވަޑައިގެންނެވި، ތަޖްރިބާކާރު، އެންމެންގެ ލޯތްބާއި އިހްތިރާމް ލިބިވަޑައިގެން ހުންނެވި ނަމޫނާ ޝަހްސިއްޔަތެއް ކަމަަށްވެސް ރައީސް ވިދާޅުވިއެވެ.
އަދި ދިވެހި ދައުލަތަށް ދިގު މުއްދަތަކަށް ހިދުމަތްކުރެއްވުމުގެ އިނާމު ލިބިވަޑައިގެންފައިވާ ޝަރަފްވެރިއެއް ކަމަށްވެސް ރައީސް ވިދަޅުވިއެވެ.
”އަޅުގަނޑުގެ ހިތުގެ އިހްލާސްތެރި ދުއާއަކީ، މާތްﷲގެ ރުއްސެވުމާއި ފުއްސެވުމުގައި، ސުވަރުގޭގެ ދާއިމީ ނިއުމަތުގައި މަރުހޫމް އަބްދުލްކަރީމް އާދަމް ލެހެއްޓެވުމެވެ،”. ރައީސް ވިދާޅުވިއެވެ.
ކަރީމްބެ ދިވެހި ދައުލަތަށް ހިދުމަތް ކުރައްވަން ފެއްޓެވީ، 18 ޖޫން 1961 ގައެވެ. ފުރަތަމަ އަދާކުރެއްވީ، ސިއްހަތާ ބެހޭ އޮފީހުގެ ހެލްތު އެސިސްޓެންޓުގެ (ލޭ ނެގުމާ ބެހޭ) ވަޒީފާއެވެ. 16 ޖުލައި 2009 ގައި އުމުރުން 65 އަހަރުވެގެން ރިޓަޔާ ކުރައްވަންދެން ހިދުމަތް ކުރައްވަމުން ގެންދެވީ ސިއްހީ ދާއިރާގައެވެ. ކަރީމްބެ ދައުލަތަށް ކޮށްދެވި މަސައްކަތްޕުޅު އަގުވަޒަންކޮށް 2023 ވަނަ އަހަރު ވަނީ ދިވެހި ދައުލަތަށް ހިދުމަތްކުރުމުގެ އިނާމް ސަރުކާރުން ދެއްވާފައެވެ.
47 އަހަރަށްވުރެ ދިގު މުއްދަތެއްގައި އެ ދާއިރާގައި ހިދުމަތް ކުރެއްވިއިރު، ހެލްތު އެސިސްޓެންޓް ކަމާއި، ކެއްސުންބައްޔާ ބެހޭ ހެލްތު އެސިސްޓެންޓް ކަމާއި، ކޮންޓްރޯލް އޮފް ކޮމިއުނިކެބްލް ޑިޒީޒަސް ޑިވިޝަންގެ ފައިލޭރިއާއާ ބެހޭ ސީނިއާ ހެލްތު އެސިސްޓެންޓް ކަމާއި، ޕަބްލިކް ހެލްތު ޑިވިޝަންގެ ހެލްތު އެސިސްޓެންޓް ކަމާއި، މިނިސްޓްރީ އޮފް ހެލްތުގެ ހެލްތު އެސިސްޓެންޓް ކަމާއި، މޯލްޑިވްސް ވޯޓާ އެންޑް ސެނިޓޭޝަން އޮތޯރިޓީގެ ހެލްތު އެސިސްޓެންޓް ކަމާއި، ސެނިޓޭޝަން އޮފިސަރުކަން ކުރައްވައިފައިވެއެވެ. އަދި އެ އޮތޯރިޓީގެ އެސިސްޓެންޓް މެނޭޖަރު ކަމުގެ މަގާމާއި، އެސިސްޓެންޓް ޑިރެކްޓަރު ކަމުގެ މަގާމާއި، މިނިސްޓްރީ އޮފް ހެލްތުގެ އެސިސްޓެންޓް ޑިރެކްޓަރު ކަމުގެ މަގާމާއި، ޑެޕިއުޓީ ޑިރެކްޓަރު ކަމުގެ މަގާމާއި، މޯލްޑިވްސް ފުޑް އެންޑް ޑްރަގް އޮތޯރިޓީގެ ޑެޕިއުޓީ ޑިރެކްޓަރ ކަމުގެ މަގާމު ފުރުއްވައިފައިވެއެވެ.
ޚިޔާލުތައް