ފައިސާތަކެއް ފޭރުނު ބަޔަކު އަތުލައިގަތުމުން ފުލުހުންނަށް ހަމަލާދީފިއެވެ.
ފުލުހުން މިއަދު މީޑިއާތަކަށް މައުލޫމާތު ދެމުން ބުނީ، މާލެ ސިޓީ، ހެންވޭރު، ލޮނުޒިޔާރަތް މަގުގައި މީހަކަށް ތޫނު އެއްޗަކުން ބިރު ދައްކައި، ތަނަކަށް ވައްދައި، އޭނާގެ އެކައުންޓުގައި ހުރި 200 ރުފިޔާ ޓްރާންސްފަރ ކުރުވި މައްސަލައެއް އިއްޔެ (ޖުލައި 18 ވީ ހުކުރު ދުވަހުގެ) ރޭގަނޑު 23:57 ހާއިރު ފުލުހުންނަށް ރިޕޯޓްކޮށްފައިވާކަމަށެވެ. އެ ރިޕޯޓާ ގުޅިގެން ފުލުހުން އެޓެންޑްވީއިރު، ފޭރުނު ކަމަށް ތުހުމަތު ކުރެވޭ މީހުން، އެ ސަރަޙައްދުގެ ގެއެއްގައި ތިބި ކަމުގެ މައުލޫމާތު ލިބުމުން، އެގެއަށް ފުލުހުން ވަންނަން އުޅުމުން އެމީހުން ފުލުހުންނާ ކުރިމަތިލާ މާރާމާރީ ހިންގާފައިވާކަމަށްވެސް ފުލުހުން ވަނީ މައުލޫމާތު ދީފައެވެ.
އެހެންކަމުން ފުލުހުންނަށް ހަމަލާދީ މާރާމާރީ ހިންގައި ފުލުހުންގެ ދައުރު އަދާކުރުމަށް ހުރަސް އެޅިކަމުގެ ކުށުގެ ތުހުމަތުގައި، ބާރުގެ ބޭނުންކޮށްގެން ދެ މީހަކު ފުލުހުންގެ ބެލުމުގެ ދަށަށްވަނީ ގެންގޮސްފައެވެ. ހައްޔަރުކޮށްފައިވަނީ ނ. ވެލިދޫ، ފަރީސާ މަންޒިލް، އުމުރުން 23 އަހަރުގެ ޙަސަން ލުޖައިން މުޙައްމަދާއި މާލެ ސިޓީ، ހ. ކަނޑުފިނިގެ، އުމުރުން 55 އަހަރުގެ މުޙައްމަދު ޝަފީޢުއެވެ. ހައްޔަރުކުރަން އުޅުމުގެ ތެރޭގައި އެ ދެ މީހުންނަށްވެސް އަދި ފުލުސް އޮފިސަރަކަށްވެސް ވަނީ އަނިޔާވެފައެވެ. ނަމަވެސް ލިބުނު އަނިޔާތަކުގެ ތަފްޞީލެއް ފުލުހުން ހާމަކޮށްފައެއް ނުވެއެވެ.
އެ މީހުންނަށް ލިބުނު އަނިޔާތަކަށް ފަރުވާ ދީފައިވާކަމަށާއި، ހައްޔަރު ކުރި ދެމީހުންގެ ބަންދަށް ކޯޓުން 5 ދުވަސް ޖަހައިދީފައިވާކަމަށް ފުލުހުން ވަނީ މައުލޫމާތު ދީފައެވެ.
ޚިޔާލުތައް