އެމްޑީޕީގެ އެކްޓިވިސްޓް މަރިޔަމް ޒުބައިރު، މަންދި، ރައީސްގެ ދަރިކަލުންގެ އަބުރަށް އަރައިގެންފައިވާކަން ސާބިތުވާކަމަށް ސިވިލް ކޯޓުން ހުކުމްކޮށްފިއެވެ.
މިއަަހރުގެ މާރިޗު މަހުގެ ތެރޭގައި އެމްޑީޕީން ކުރިއަށް ގެންދިޔަ ސިލްސިލާ އެއްވުންތަކެއްގެ ތެރެއިން ވާހަކަ ދައްކަމުން މަންދީ ވަނީ، “ޒުވާނުން ބިޑި އޮޅަން ޖެއްސީ ރައީސްގެ ދަރިކަލުން ވޭޕް ބޯން ފެށުމުން” ކަމަށް ބުނެފައެވެ. އޭގެ ސަބަބުން ރައީސްގެ ދަރިކަލުންގެ ނަފްސަށާއި ފުރާނައަށް ނުރައްކާވާނޭ ހާލަތެއް މެދުވެރިކުރުވައި އެ ކުއްޖާގެ ކިޔެވުމާއި މުސްތަގްބަލަށް ބޮޑެތި ގެއްލުންތަކެއް ކުރިމަތިވާނޭ ހާލަތެއް މެދުވެރިކޮށްފައިވާކަމަށް ވިދާޅުވެ ރައީސްގެ އަނބިކަނަބަލުން މެޑަމް ސާޖިދާ އިބްރާހީމްގެ ފަރާތުން ވަނީ އެ މައްސަލަ ސިވިލް ކޯޓަށާއި ފެމިލީ ކޯޓަށް ހުށަހަޅާފައެވެ.
މި މައްސަލަ ސާޖިދާގެ ފަރާތުން ހުށަހަޅުއްވާފައިވަނީ މަންދީގެ އިތުރުން އެ ޕާޓީގެ ޗެއާޕާސަން ފައްޔާޒް އިސްމާއިލްވެސް ޒިންމާވާންޖެހޭކަމަށް ވިދާޅުވެ އެ ދެމީހުންނަށް ދައުވާ ރައްދުވާގޮތަށެވެ. ސިވިލް ކޯޓަށް މައްސަލަ ހުށަހެޅުއްވަމުން ސާޖިދާ ވަނީ ތިން ކަމަކަށް އެދިވަޑައިގެންފައެވެ. އެއީ، ގާނޫނުއަސާސީންނާއި ކުޑަކުދިންގެ ހައްގުތައް ރައްކާތެރިކުރުމާ ބެހޭ ބައިނަލްއަގުވާމީ މުއާހަދާއިން ދަރިކަލަށް ކަށަވަރުކޮށްދީފައިވާ ނަމާއި އަބުރު ރައްކާތެރިވެގެންވުމުގެ ހައްގު ނިގުޅައިގެންފައިވާ ކަމަށް ކަނޑައަޅައިދިނުމަށެވެ. އަދި ދަރިކަލަށް ލިބިފައިވާ އަދި ލިބޭނެ ކަމަށް ގަބޫލުކުރެވޭ ގެއްލުމުގެ ބަދަލު ހޯދުމުގެ ހައްގު ސާޖިދާއަށް ލިބިގެންވާ ކަމަށް ކަނޑައަޅައިދިނުމަށާއި، ދަރިކަލަށް ނިސްބަތްކޮށް ދެއްކި ވާހަކަތަކަށާއި އޭގެ ސަބަބުން ނުކުމެފައިވާ ނަތީޖާއަށް އާންމުކޮށް މައާފަށް އެދުމަށް ދައުވާ ލިބޭ ފަރާތްތަކަށް ކޯޓުން އެންގުމަށެވެ.
ސިވިިލް ކޯޓުގައި މިއަދު ބޭއްވި އަޑުއެހުމުގައި މި މައްސަލަ ބެއްލެވި ގާޒީ ފައިސަލް އާދަމް ކުރެއްވި ހުކުމުގައި ބަޔާންކޮށްފައިވާ ގޮތުގައި، މަރިޔަމް ޒުބައިރު ދެއްކި ވާހަކަތަކުގެ ސަބަބުން އުމައިރު (ކުއްޖާ) ގެ އަބުރު ރައްކާތެރިވެގެންވުމުގެ ހައްގު ނިގުޅައިގެންދާކަން ސާބިތުވެއެވެ.
އެހެންކަމުން، މަރިޔަމް ޒުބައިރުގެ އަތުން ގެއްލުމުގެ ބަދަލު ހޯދުމުގެ ހައްގު ސާޖިދާއަށް ލިބިވަޑައިގަންނަވާ ކަމަށާއި، ގެއްލުމުގެ ބަދަލު ހޯއްދެވުމަށް ދައުވާކުރެއްވޭނެކަން ގާޒީ ވަނީ ކަނޑައަޅުއްވާފައެވެ. ނަމަވެސް، މަރިޔަމް ޒުބައިރު ދެއްކި ވާހަކަތަކާ ގުޅިގެން އެމްޑީޕީންނާއި ފައްޔާޒު ޒިންމާވާން ޖެހޭކަން ނުވަތަ ނޫންކަން ނިންމޭނީ މުޅި މައްސަލަ ފުރިހަމައަށް ބެލުމަށްފަހު ކަމަށް ހުކުމުގައިވެއެވެ. އަދި ހަމައެހެންމެ އާންމުކޮށް މާފަށް އެދެން އެންގުމަކީ ރާއްޖޭގެ ގާނޫނުތަކުން ކޯޓުތަކަށް ލިބިގެންވާ ބާރެއް ނޫން ކަމަށްވާތީ، އާންމުކޮށް މާފަށް އެދުމަށް އަމުރު ކުރެވޭނެ ގޮތެއް ނެތް ކަމަށްވެސް ގާޒީ ފައިސަލް އާދަމްގެ ހުކުމުގައި ބަޔާންކުރައްވާފައިވެއެވެ.
ޚިޔާލުތައް