ފަގީރުންނާއި މިސްކީނުންގެ ދަފުތަރުގައި ރަޖިސްޓްރީވުމުގެ ފުރުސަތު ޒަކާތު ހައުސްއިން ހުޅުވާލައިފިއެވެ.
އެންމެ ފަހުގެ މައުލޫމާތުތަކަށް ބަލާއިރު ރާއްޖޭގައި މިހާރު 2852 މީހުން ފަގީރުންނާއި މިސްކީނުންގެ ގޮތުގައި ދަފުތަރުކުރެވިފައިވެއެވެ. އެ ދަފުތަރުގައި ރަޖިސްޓްރީވެފައިވާ ފަރާތްތަކަށް ޒަކާތު ފަންޑުން ގިނަ އެހީތަކެއް ފޯރިކޮށްދެއެވެ.
އެގޮތުން ނިމުނު ޖޫން މަހުގެ ތަފާސްހިސާބުތަކަށް ބަލާއިރު، މުދަލު ޒަކާތުގެ ގޮތުގައި ފަގީރުންނާ މިސްކީނުންގެ ދަފްތަރުގައި ރަޖިސްޓްރީވެފައިވާ ފަރާތްތަކަށް 14.2 މިލިޔަން ރުފިޔާ ވަނީ ހޭދަކޮށްފައެވެ. މީގެ އިތުރުން، ހާއްސަ ހާލަތްތައް މެދުވެރިވެގެން ހާލުގައި ޖެހޭ ފަރާތްތަކަށް ޒަރޫރީ އެހީގެ ގޮތުގައި ޒަކާތު ފަންޑުން 12,000 ރުފިޔާ ހޭދަކޮށްފައިވެއެވެ.
ބޭސްފަރުވާއަށް އެހީތެރިކަން ބޭނުންވާ ފަގީރުންނާއި މިސްކީނުންނަށް ވެސް ޒަކާތު ހައުސްއިން ވަނީ ބޮޑު އެހީތެރިކަމެއް ފޯރުކޮށްދީފައެވެ. އެގޮތުން ޖޫން މަހު 104 މީހަކަށް ބޭސްފަރުވާއަށް އެހީތެރިކަން ފޯރުކޮށްދީފައިވާ އިރު، މިކަމަށް 1.7 މިލިޔަން ރުފިޔާ ހަމަޖައްސައި، އޭގެ ތެރެއިން 1.1 މިލިޔަން ރުފިޔާ ވަނީ ހަރަދުކޮށްފައެވެ. އެ އެހީތެރިކަމުގެ ތެރޭގައި ކެންސަރާއި އެކި ކަހަލަ ބޮޑެތި ބަލިތަކުގެ ފަރުވާ ހިމެނެއެވެ.
ފަގީރުންނާއި މިސްކީނުންގެ ދަފުތަރުގައި ރަޖިސްޓްރީވުމަށް ބޭނުންވާ ފަރާތްތަކުން އެކަމަށް ހާއްސަކޮށްފައިވާ ފޯމު މެދުވެރިކޮށް ރަޖިސްޓްރޭޝަންގެ ކަންކަން ކުރިއަށްގެންދަން ޒަކާތު ހައުސްއިން ވަނީ އިލްތިމާސްކޮށްފައެވެ. ރަޖިސްޓްރީވާން ފޯމު ހުށަހަޅާއިރު ފޯމު ހުށަހަޅާ ފަރާތުގެ މައުލޫމާތާއި، ދަރީންގެ މައުލޫމާތާއި އާމްދަނީއާއި ހަރަދުތަކާ ގުޅޭ މައުލޫމާތުވެސް ފޯމާއެކު ހުށަހަޅަންޖެހެއެވެ. ފޯމުގައި އެކަމުގެ ތަފްސީލްތައް ހިމެނިފައިވެއެވެ.
ޒަކާތު ހައުސަކީ 2024 ވަނަ އަހަރުގެ ޖެނުއަރީ މަހު ރާއްޖޭގައި ގާއިމުކުރި އިދާރާއެކެވެ. މިއީ ޒަކާތުގެ ކަންކަން ހަރުދަނާކޮށް، ޒަކާތުގެ ހައްގުވެރިންނަށް ޒަކާތުގެ މަންފާ ލިބޭނެ މަގު ފަހިކޮށްދިނުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އުފެއްދެވި އިދާރާއެކެވެ.
ޚިޔާލުތައް