ނ. ކެނދިކުޅުދޫގައި އެމްޓީސީސީ އާރުޓީއެލް ބަހުގެ ހިދުމަތް މިއަދު ރަސްމީކޮށް ފަށައިފިއެވެ.
މި ހިދުމަތް ފައްޓަވައިދެއްވީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުއެވެ. އެމަނިކުފާނު ނ. އަތޮޅަށް ކުރައްވަމުން ގެންދަވާ ދަތުރުފުޅުގައި މި ހިދުމަތް އިފްތިތާހުކޮށްދެއްވުމާއެކު އެރަށުގެ ސްކޫލް ދަރިވަރުންނަށް ބޮޑެތި ލުއިތަކެއް ލިބިގެންދާނެއެވެ.
ބިމުގެ ގޮތުން ބޮޑު ރަށަކަށް ވެފައި ކެނދިކުޅުދޫގައި ދެ އަވަށް އޮވެއެވެ. އެހެންކަމުން ސްކޫލުގެ ދަރިވަރުންނާއި އާންމު ރައްޔިތުން އެއް އަވަށުން އަނެއް އަވަށަށް ދަތުރުފަތުރު ކުރުމުގައި ގިނަ ދަތިތަކާ ކުރިމަތިލާން ޖެހެއެވެ. އެހެންކަމުން މި ހިދުމަތަކީ ސްކޫލް ދަރިވަރުންނަށް ލިބިގެންދާނެ ވަރަށް ބޮޑު ލުޔެކެވެ.
މިއަދަކީ ކެނދިކުޅުދޫ ރައްޔިތުން ދަތުރުފަތުރާމެދު ދެކެމުން އައި ހުވަފެންތަކުގައި ހަގީގީ ކުލަ ޖެހިގެން އައި ދުވަހެއްގެ ގޮތުގައި ރައްޔިތުން ވަނީ ފާހަގަކޮށްފައެވެ.
މި ހިދުމަތާއެކު އާރުޓީއެލްގެ ދެ ބަސް އެރަށުގައި ދަތުރުކުރާނެއެވެ.
ރައީސް ކެނދިކުޅުދޫއަށް ކުރެއްވި ޒިޔާރަތުގައި އެރަށު ކައުންސިލާއި ބައްދަލުކުރައްވައި ރަށަށް ބޭނުންވާ ތަރައްގީއާ އެހެނިހެން ކަންތައްތައް ބައްލަވައިލެއްވިއެވެ.
ސްކޫލް ދަރިވަރުން، ޔުނީފޯމާއި އެކްޓިވިޓީ ޔުނިފޯމްގައި ތިބޭ ސްކޫލް ދަރިވަރުންނަށް ވެސް އާރުޓީއެލް ބަހުގައި ހިލޭ ދަތުރުކުރެވޭނެ އިންތިޒާމް އެމްޓީސީސީން އޮންނަނީ ހަމަޖައްސައިދީފައެވެ.
ރާއްޖޭގައި އާންމު ދަތުރުފަތުރުގެ ހިދުމަތް ފޯރުކޮށްދޭ އެންމެ ބޮޑު ކުންފުނީގެ ހައިސިއްޔަތުން އެމްޓީސީސީގެ މަގުސަދަކީ އެކަށީގެންވާ އަގެއްގައި ލުއިފަސޭހަކަމާއެކު ބޭނުންކުރެވޭ ކަނޑާއި އެއްގަމުގެ ދަތުރުފަތުރުގެ ހިދުމަތެއް ރައްޔިތުންނަށް ފޯރުކޮށްދޭ ކުންފުންޏެއްގެ ގޮތުގައި ދެމިތިބުން ކަމަށް އެ ކުންފުނިން ބުނެއެވެ.
ޚިޔާލުތައް