ނ. މާފަރުގެ ފެނާއި ނަރުދަމާގެ ނިޒާމް ޤާއިމުކޮށް، ޚިދުމަތްދޭން ފަށައިފިއެވެ.
މާފަރު ފެނާއި ނަރުދަމާ މަޝްރޫއުގެ މަސައްކަތަކީ 2020 ވަނަ އަހަރުގެ ނޮވެމްބަރު މަހުގެ 15 ވަނަ ދުވަހު އެމްޑަބްލިއުއެސްސީއާ ހަވާލުކުރެވުނު މަސައްކަތެކެވެ. 94.4 މިލިއަން ރުފިޔާގެ މި މަޝްރޫއުގެ ދަށުން، މާފަރުގައި ފެން ޕްލާންޓް ބެހެއްޓުމަށް އިމާރާތްކުރާ ފެސިލިޓީ ބިލްޑިންގ ޤާއިމްކޮށް، ފެނާއި ނަރުދަމާ ހޮޅީގެ މައިނެޓްވޯރކް އަޅައި އަދި ގޭގެއަށް ފެނާއި ނަރުދަމާ ކަނެކްޝަން ވަނީ ގުޅައިދީފައެވެ.
މީގެ އިތުރުން، ފެންރައްކާ ކުރުމަށް ތާނގި ބަހައްޓައި، ބޯހޯލް ތޮރުފައި، ޕަންޕިންގ ސްޓޭޝަނާއި، ސީ އައުޓް ފޯލް އަދި ރިޖެކްޓް ލައިންވެސް ވަނީ އަޅާފައެވެ. އަދި ގޭގެގައި ޖަންކްޝަން ބަހައްޓައި، ނަރުދަމާގެ ކަނެކްޝަން ވަނީ ގުޅައިދެވިފައެވެ.
މީގެ އިތުރުން، މި މަޝްރޫއުގެ ދަށުން ނަރުދަމާ ނިޒާމް ހިންގާ ބެލެހެއްޓުމަށް ބޭނުންވާ ވެހިކަލް ވަނީ ފޯރުކޮށްދެވިފައެވެ.
މާފަރުގެ ފެނާއި ނަރުދަމާގެ ޚިދުމަތް މިއަދު ރަސްމީކޮށް ފައްޓަވައިދެއްވީ ރައީސް، ޑރ. މުހައްމަދު މުއިއްޒު، އެމަނިކުފާނު ނ. އަތޮޅަށް މިއަދު ފެއްޓެވި ދަތުރުފުޅުގެ ތެރެއިން އެރަށަށް ވަޑައިގެން ބޭއްވި ހާއްސަ ޖަލްސާއެއްގައެވެ.
މިޖަލްސާގައި އެމްޑަބްލިއުއެސްސީގެ މެނޭޖިން ޑިރެކްޓަރު ޢަބްދުލް މަތީން މުޙައްމަދު އާއި ދައުލަތުގެ ވަޒީރުންގެ އިތުރުން ރަށުގެ ރައްޔިތުން ބައިވެރިވެވަޑައިގަތެވެ.
ޚިޔާލުތައް