އާ ޓަރމިނަލް ހުޅުވާ ރޭ އެއަރޕޯޓުގެ ޓްރެފިކް ފްލޯއަށް ބަދަލުތަކެއް ގެންނަން ނިންމައިފިއެވެ.
ވެލާނާ އިންޓަރނޭޝަނަލް އެއަރޕޯޓް (ވީއައިއޭ)ގެ އާ ޕެސެންޖަރ ޓަރމިނަލް ހުޅުވުމަށް 26 ޖުލައި 2025 ގައި ބާއްވަން ހަމަޖެހިފައިވާ ރަސްމިއްޔާތުގެ އެންމެހާ ކަންކަން ސަލާމަތާއި ރައްކާތެރިކަމާއެކު ކުރިއަށް ގެންދިއުމަށްޓަކައި އެ ދުވަހު އެއަރޕޯޓުގެ ޓްރެފިކް ފްލޯއަށް ބަދަލުތަކެއް ގެންނަން ވަނީ ނިންމާފައިވާކަމަށް މޯލްޑިވްސް އެއަރޕޯޓްސް ކޮމްޕެނީ ލިމިޓެޑް، އެމްއޭސީއެލުން ބުނެފިއެވެ.
އެގޮތުން 26 ޖުލައި 2025 ގެ ރޭގަނޑު 19:00 އިން ފެށިގެން 23:30 އަށް އެއަރޕޯޓަށް ވަންނަ މަގާއި ޓަރމިނަލް ސަރަޙައްދަށް ވަދެވޭނީ ހަމައެކަނި ހުއްދަ ދެވިފައިވާ އުޅަނދުތަކަށެވެ. އަދި އެ ވަގުތުގެ ތެރޭގައި ޓެކްސީ އަދި އަމިއްލަ ފަރާތްތަކުގެ އުޅަނދުތަކަށް ޕޮލިސް ޕޯސްޓް އަދި އިރުމަތީ ފަރާތު ޕާކިން ސަރަޙައްދަށް ދެވޭނެއެވެ. ޓަރމިނަލް ސަރަޙައްދަށް ދިއުމަށް އެމްއޭސީއެލްގެ އުޅަނދުތައް ހަމަޖެހިފައިވާނެކަމަށް އެ ކުންފުނިންވަނީ މައުލޫމާތު ދީފައެވެ.
މި ބަދަލާއެކު، ފެރީ އަދި ބަހުގެ ޚިދުމަތް މެދުކެނޑުމެއް ނެތި މާލެއާ ހުޅުމާލެއިން ހުޅުލެއަށް ދާ ފަރާތްތަކަށް ލިބިގެންދާނެކަމަށްވެސް އެމްއޭސީއެލުން ވަނީ ބުނެފައެވެ.
ޚިޔާލުތައް