ފުވައްމުލައް ސިޓީގެ މަގު ހެދުމުގެ މަސައްކަތް ދަނީ ކުރިއަށްކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ، އެމްޓީސީސީން ހާމަކޮށްފިއެވެ.
އެމްޓީސީސީއިން މިއަދު ކުރި ޕޯސްޓެއްގައި ވަނީ ފުވައްމުލަކު މަގު ހެދުމުގެ މަސައްކަތުގެ ތެރެއިން މިހާރު ކުރިއަށް ދަނީ ސެޓްލްމަންޓް ޓޭންކް، ކޭބަލް ޖަންކްޝަން އަދި ޔޫޕީވީސީ ހޮޅިތައް އިންސްޓޯލް ކުރުމުގެ މަސައްކަތް ކަމަށެވެ.
އެގޮތުން 302 މިލިއަނަށް ވުރެ ގިނަ ރުފިޔާ ޚަރަދުވާ އެ މަޝްރޫއުގެ ދަށުން 34 މަގެއްގައި މުޅިއަކު 18.2 ކިލޯމީޓަރުގެ މަގު ހެދުމުގެ މަސައްކަތް ކުރަން ހަމަޖެހިފައިވާއިރު، މި މަޝްރޫއުގެ %89 މަސައްކަތް މިހާރުވަނީ ނިމިފައެވެ. އެމްޓީސީސީން ވަނީ 2021 ވަނަ އަހަރު ފުވައްމުލަކުގެ 20.6 ކިލޯމީޓަރުގެ ރިންގް ރޯޑްގެ މަޝްރޫއު ވެސް ނިންމައިފައެވެ.
އެމްޓީސީސީން ބުނެފައިވަނީ އަލަށް ސޮއިކުރި މަޝްރޫއުގެ ދަށުން ފެން ހިންދާ ނިޒާމް ގާއިމު ކުރުމާއި 650 ކޭބަލް ޖަންކްޝަން ބޮކްސް ވަޅުލުމާއި 13،964 އަކަ މީޓަރުގެ ސަރަހައްދެއްގައި ޕޭވްމަންޓް ހެދުމާއި 24،345 މީޓަރުގެ ކަބް ސްޓޯން ހަރު ކުރުމާއި ގަސް ހަރު ކުރާ ޕިޓްސް ވަޅުލަން ހަމަޖެހިފައިވާކަމަށެވެ.
އަދި 71،164 އަކަ މީޓަރުގެ ދުއްވާ ސަރަހައްދުގައި ތާރު އެޅުމާއި 633 މަގު ބައްތި ހަރު ކުރުމާއި މަގުމަތީ ނިޝާން ހަރު ކުރުމާއި ކަފިހި ހުރަސް ކުރެހުމާއި ސްޕީޑް ބްރޭކަރު ހަރު ކުރުމުގެ މަސައްކަތްވެސް މި މަޝްރޫއުގައި ހިމެނެއެވެ. މި މަޝްރޫއު ފެށުމަށް ހަމަޖެހިފައިވަނީ އެންވަޔަރަމަންޓަލް އިމްޕެކްޓްސް އެސެސްމަންޓް އީއައިއޭ ހެދުމަށްފަހުއެވެ.
ހައުސިން މިނިސްޓްރީން އެމްޓީސީސީއާ ހަވާލުކޮށްފައިވާ މި މަޝްރޫއު ނިންމަން ދީފައި ވަނީ 730 ދުވަހެވެ.
ޚިޔާލުތައް