ޕޮލިސް ބޯޑުން ވަކިކުރަން ނިންމާފައިވާ ފުލުސް އޮފިސަރުންގެ މައްސަލައިގައި ދައުލަތުން ހުށަހެޅި އިސްތިއުނާފުގެ މައްސަލަ ހައިކޯޓުން އިއްޔެ ބޭރުކޮށްލައިފިއެވެ.
މި މައްސަލައިގައި ހައިކޯޓުން މިގޮތަށް ނިންމީ ސިވިލް ކޯޓުގެ ހުކުމް ތަންފީޒުކުރުން ފަސްކުރުމުގެ އަމުރެއް ހައިކޯޓުން ހޯދުމަށް ފަހު ވެސް، ދައުލަތުން ވަކިކުރަން ނިންމި ބައެއް އޮފިސަރުން ވަޒީފާގައި ބައިތިއްބައި ޕްރޮމޯޝަން ވެސް ދީފައިވާތީ، ޝަރީއަތުގެ ނިޒާމު ނަހަމަ ގޮތުގައި ބޭނުންކުރިކަމަށް ފެންނާތީ ކަމަށް ފަނޑިޔާރުންގެ އަޣުލަބިއްޔަތުން ވަނީ ކަނޑައަޅާފައެވެ.
ނިމިދިޔަ އެމްޑީޕީ ސަރުކާރުގައި ޕޮލިސް ބޯޑުން ފުލުހުންގެ އިސް ހަތް އޮފިސަރެއް ވަކިކުރަން ނިންމުމުން، އޭގެ ތެރެއިން ފަސް އޮފިސަރެއް ސިވިލް ކޯޓަށް މައްސަލަ ހުށަހެޅިއެވެ. ސިވިލް ކޯޓުން އެ މީހުންނަށް ވަޒީފާ އަނބުރާ ދިނުމަށް ހުކުމް ކުރުމުން، ދައުލަތް ތަމްސީލްކުރާ އެޓާނީ ޖެނެރަލް (އޭޖީ) އޮފީހުން މި މައްސަލަ ހައިކޯޓުގައި އިސްތިއުނާފު ކުރިއެވެ.
މި ސަރުކާރު ވެރިކަމަށް އައުމަށް ފަހު، ކުރީގެ ނިންމުން ބަދަލުކޮށް އޮފިސަރުންނަށް ފުރުސަތު ދިނުމަށް އާ ޕޮލިސް ބޯޑުން އޭޖީ އޮފީހުގައި އެދުނު ނަމަވެސް، އޭޖީން ވަނީ ހައިކޯޓުގައި ހުށަހަޅާފައިވާ އިސްތިއުނާފުގެ މައްސަލަ ކުރިއަށް ގެންގޮސްފައެވެ.
ހައިކޯޓުގައި މި މައްސަލަ ބެއްލެވި ބެންޗުގައި ތިއްބެވި ފަނޑިޔާރުން ކަމަށްވާ އަބްދުއްމާނިއު ހުސައިނާއި ހަސަން ޝަފީއުގެ އަގުލަބިއްޔަތުން މައްސަލަ ވަނީ ބާތިލްކޮށްފައެވެ. ސަބަބަކީ އިސްތިއުނާފް ހުށަހަޅައި ސިވިލް ކޯޓުގެ ހުކުމް ތަންފީޒުކުރުން ފަސްކުރުމުގެ އަމުރެއް ހައިކޯޓުން ހޯދުމަށް ފަހު ވެސް، ވަކިކުރަން ނިންމި ބައެއް އޮފިސަރުން ވަޒީފާގައި ބައިތިއްބައި ޕްރޮމޯޝަން ވެސް ދީފައިވާތީ އާއި ދައުލަތުގެ ސްޓޭންޑަކީ ސިވިލް ކޯޓުގެ ހުކުމް ގޯސްވުން ކަމަށްވީ ނަމަވެސް ދައުލަތުން އަމަލުކޮށްފައިވަނީ އެ ސްޓޭންޑްގެ މަތީގައި ނޫން ކަމަށްވާތީއެވެ. އަދި މިއީ ޝަރީޢަތުގެ ނިޒާމު ނަހަމަ ގޮތުގައި ބޭނުން ހިފުމުގެ އަމަލެއް ކަމަށް ހައިކޯޓުން ދެކެއެވެ.
މައްސަލަ ބެއްލެވި ބެންޗުގައި ހިމެނިވަޑައިގަންނަވާ ދެން އިންނެވި ފަނޑިޔާރު މުހައްމަދު ޝަނީޒު އަބްދުﷲ ވެސް ދައުލަތުން ޝަރީއަތުގެ ނިޒާމު ނަހަމަ ގޮތުގައި ބޭނުންކުރި ކަމަށް ދެކެވަޑައިގަންނަވައެވެ. ނަމަވެސް، އޭނާގެ ރައުޔުގައި އެއީ މުޅި މައްސަލަ ބާތިލްކުރަން ޖެހޭ ސަބަބެއް ނޫން ކަމަށް ވަނީ ފާހަގަކުރައްވާފައެވެ.
ވަޒީފާއިން ވަކިކުރަން ޕޮލިސް ބޯޑުން އޭރު ލަފާ ދިން އޮފިސަރުންނަކީ:
- ސުޕްރިންޓެންޑެންޓް މުހައްމަދު ދާއޫދު
- އެސިސްޓެންޓް ކޮމިޝަނަރު ފަރުހާދު ފިކުރީ
- ޗީފް ސުޕްރިންޓެންޑެންޓް އަހުމަދު ޝުހާދު
- އެސިސްޓެންޓް ޕޮލިސް ކޮމިޝަނަރު މުހައްމަދު ޖަމްޝީދު
- އެސިސްޓެންޓް ކޮމިޝަނަރު އަހުމަދު މުހައްމަދު
- ސުޕްރިންޓެންޑެންޓް އިސްމާއީލް ޝަމީމް
- ޗީފް ސުޕްރިންޓެންޑެންޓް އަބްދުﷲ ޝަރީފްއެވެ.
މީގެ ތެރެއިން ފަރުހާދު ފިކުރީ އާއި އަހްމަދު ޝުހާދު ފިޔަވައި ދެން ތިއްބެވި ފަސް އޮފިސަރުންގެ ފަރާތުން ސިވިލް ކޯޓަށް މައްސަލަ ހުށަހެޅި އެވެ. ނަމަވެސް، އެކަމަށް ކޯޓަށް ގޮތެއް ނުނިންމި އުޅެނިކޮށް އޭގެ ތެރެއިން ދެ އޮފިސަރަކު 2021 ވަނަ އަހަރު ތެރޭ ވަނީ ވަޒީފާއިން ވަކިކޮށްފައެވެ. އެ އޮފިސަރުންނަކީ ކުރީގެ ރައީސް އަބްދުﷲ ޔާމީންގެ ވެރިކަމުގައި އެސިސްޓެންޓު ޕޮލިސް ކޮމިޝަނަރަކަށް ހަމަޖެއްސި މުހައްމަދު ޖަމްޝީދާއި، އެސިސްޓެންޓް ކޮމިޝަނަރު އަހުމަދު މުހައްމަދުއެވެ.
ޖަމްޝީދާއި އަހުމަދު މުހައްމަދު ފިޔަވައި ދެން ތިބި ފުލުހުން އަދިވެސް ފުލުހުންގެ ވަޒީފާގައި ތިބި އިރު، އަބްދުﷲ ޝަރީފް ދާދި ފަހުން ވަނީ އެސިސްޓެންޓް ކޮމިޝަނަރު އޮފް ޕޮލިސްގެ ރޭންކަށް ޕްރޮމޯޓް ކޮށްފައެވެ.
މި މައްސަލަ ކޯޓުގައި އޮއްވައި އޭގެެ ތެރޭގައި ހިމެނޭ ބައެއް އޮފިސަރުންނަށް ޕްރޮމޯޝަން ދިނުމުން، ދައުލަތުގެ އޮތް ނިޔަތާ މެދު އޮފިސަރުންގެ ވަކީލުންގެ ފަރާތުން ސުވާލު ވެސް އުފައްދާފައިވެއެވެ. ހައިކޯޓުގެ މި ނިންމުމާއެކު، ސިވިލް ކޯޓުގެ ހުކުމަށް އަމަލުކުރަން ޖެހޭނެއެވެ.
ޚިޔާލުތައް