އިބްރާހިމް ލަތީފް އެތެރޭގެ އުދުހުންތަކުގެ އަގު ހެޔޮކުރުމަށް ކުރަންޖެހޭ އެންމެ ފަހުގެ މަޝްވަރާތައް ނިމިއްޖެ ކަމަށް ޓްރާންސްޕޯޓް ވުޒާރާގެ ވަޒީރު އައިޝަތު ނަހުލާ ވިދާޅުވެއްޖެއެވެ. ނަހުލާ މިހެން ވިދާޅުވެފައިވަނީ މިހާރު ނޫހުން ކުރި ސުވާލަކަށް ޖަވާބުދެއްވަމުން ކަމަށް އެނޫހުން ރިޕޯޓް ކުރެއެވެ. ނަހުލާ އިތުރަށް ވިދާޅުވެފައިވަނީ އަގު ހެޔޮ ކުރުން ލަސްވެފައިވަނީ ގިނަ އޮފީސްތަކެއް ގުޅިގެން ކުރަންޖެހޭ ކަމެއްކަމަށްވުމުން ކަމަށާއި އަދި އަގު ހެޔޮ ކުރުމަށްޓަކައި އަގު ލިސްޓް ހެދިފައިވާ ކަމަށާއި އެއަގުތަކުގެ ސަބަބުން އައިލެންޑް އޭވިއޭޝަނަށް ސްބަސިޑީ ދޭން ޖެހިދާނެތީވެ ފިނޭންސް މިނިސްޓްރީއާވެސް މަޝްވަރާ ކުރަންޖެހޭކަމަށް ނަހުލާ އާއި ހަވާލާދީ މިހާރު ނޫހުން ރިޕޯޓްކޮށްފައިވެއެވެ.
ނަމަވެސް، މީގެ 13 ދުވަސް ކުރިން ޓްރާންސްޕޯޓް މިނިސްޓްރީގައި ނޫސްވެރިންގެ ބައްދަލުވުމެއް ބޭއްވުމަށްފަހު މިސަރުކާރުގެ އެންމެ ގިނަބައެއްގެ ޝައުގުވެރިކަން ހޯދާފައިވާ ވަޒީރު އައިޝަތު ނަހުލާ ވަނީ އެތެރޭގެ އުދުހުންތަކުގެ އަގު ހެޔޮކޮށް ދެދުވަހެއްގެ ތެރޭގައި އިއުލާންކުރައްވާނެ ކަމަށް ވިދާޅުވެފައެވެ
“ދަންނަވަން އޮތީ އަޅުގަނޑުމެން ސިވިލް އޭވިއޭޝަން އިން ކުރަން ޖެހޭ މަސައްކަތް ނިމިފައޭ އޮތީ. އަޅުގަނޑުމެންގެ މަސައްކަތްތައް ނިމިފައި އޮތަސް ކަމާބެހޭ އެހެން މިނިސްޓްރީތަކާއި އެހެން ކޮމްޕެނީތަކާއި ވާހަކަ ދެކެވި އިތުރަށް ހެޔޮ ބަދަލެއް ގެނެވޭތޯ އަޅުގަނޑުމެންގެ ވިސްނުން ހުރީ” ނަހުލާ ވިދާޅުވިއެވެ. އެެތެރޭގެ އުދުހުންތަކުގެ އަގުތައް ހެޔޮކޮށް އިއުލާން ކުރިޔަސް އެކަންކަން ތަންފީޒުވުމަށް ދެތިން ހަފްތާ ވަރު ނަގާނެ ކަމަށް މީގެ 13 ދުވަސް ކުރިން ބޭއްވި ނޫސްވެރިންގެ ބައްދަލުވުމުގައި ނަހުލާ ވިދާޅުވިއެވެ.
އެތެރޭގެ އުދުހުންތަކުގެ އަގު ހެޔޮ ކުރުމަކީ ރައީސް އިބްރާހިމް މުހައްމަދު ސޯލިހުގެ ރިޔާސީ ވައުދެކެވެ. އަދި އެއީ ވެރިކަމުގެ ފުރަތަމަ 100 ދުވަހު ކުރައްވަން ނިންމަވާފައިވާ ކަންތައްތަކުގެ ތެރޭގައި ހިމެނޭ ކަމެއްވެސް މެއެވެ.
އެތެރޭގެ އުދުހުންތަކުގެ އަގު ބޮޑުކަމުގެ ޝަކުވާއަކީ ފުވައްމުލަކު ރައްޔިތުން ގިނަ ދުވަސްތަކެއްވަންދެން ކުރަމުން އައިޝަކުވާއެކެވެ. އެޝަކުވާ ކުރަމުންްދިޔައިރު ވެސް އެތެރޭގެ އުދުހުންތަކުގެ ޚިދުމަތްދޭ ދެވަނަ އެއާލައިން ފްލައިމީއަށް ފުވައްމުލަކަށް ދަތުރުކުރުގެ ހުއްދަކުރިން ވަނީ ނުދީފައެވެ. ނަމަވެސް ވެރިކަން ބަދަލުވުމާއިއެކު މިދިޔަ މަސްތެރޭ ފްލައިމީ އިން ވަނީ ފުވައްމުލަކަށް ޚިދުމަތްދޭން ފަށާފައެވެ.
.
ޚިޔާލުތައް