އިބްރާހިމް ލަތީފް ވިލާ އެއާގެ ފުލައިމީއިން ފުވައްމުލަކަށާއި އައްޑުއަށް ކުރަމުންއައި ދަތުރުތައް ހުއްޓާލުމަށް ނިންމައި އެކަން އިއުލާންކޮށްފިއެވެ. ފުލައިމީ އިން އިއްޔެ ނެރުނު ބަޔާނެއްގައި ބުނެފައިވަނީ ފުލައިމީ އިން ފުވައްމުލަކާއި އައްޑުއަށް ކުރަމުން އައި ދަތުރުތައް ހުއްޓާލަން ނިންމާފައިވަނީ އަންނަމަހުގެ 10 ވަނަ ދުވަހުން ފެށިގެނެވެ.
ފްލައިމީގެ ދަތުރުތައް ފުވައްމުލަކާއި އައްޑުއަށް ފަށާފައިވަނީ ފެބުރުއަރީ 2013 ގައެވެ. ނަމަވެސް އޭގެ ދެއަހަރު ފަހުން މާޗު 2015 ގައި ދަތުރުތައް ހުއްޓާލިއެވެ. އަދި އޭގެ ފަހުން އަލުން ދަތުރުތައް ފެށުމަށް ވިލާއެއާއިން ތައްޔާރުވިނަމަވެސް އެކަމަށް ހުއްދަނުދިންކަމަށް އެކުންފުނިން ބުނެއެވެ. އެއަށްފަހު ދެވަނަ ފަހަރަށް ހުއްދަލިބިގެން އަލުން ދަތުރުތައް ފަށާފައިވަނީ ނިމިދިޔަ ރިއާސީ އިންތިޚާބަށްފަހު ނޮވެމްބަރު 15 ވަނަ ދުވަހުގައެވެ.
އޭގެ ހަމަސްފަހުން ވިލާއެއާއިން އަނެއްކާވެސް މިވަނީ ދަތުރުތައް ހުއްޓާލަން ނިންމާފައިވާކަން އިއުލާންކޮށްފައެވެ. ،މިފަހަރު ދަތުރުތައް ހުއްޓާލަން ދިމާވީ ކްރޫންނާއި ޕައިލެޓުންގެ ދަތިކަމާ ހުރެ ކަމަށް އެކުންފުނިން ބުންޏެވެ. އަދި މިކަމަށް ހައްލެއް ހޯދުމުގެ ގޮތުން ޕައިލެޓުންނާއި ކެބިން ކްރޫއިން ތަމްރީނު ކުރަމުން އަންނަ ކަމަށް ވެސް ބުންޏެވެ. މުސްތަގުބަލުގައި އަލުން ދަތުރުތައް ފެށޭނެކަމަށް އުއްމީދުކުރައްވާ ކަމަށްވެސް އެކުންފުނިން ބުނެއެވެ.
ޚިޔާލުތައް