މުހައްމަދު ޝިހާބް ބައިނަލް އަގުވާމީ ޑައުން ސިންޑްރޯމް ދުވަސް ފާހަނގަ ކުރުމުގެ ގޮތުން ބޭއްވި މޮޓޯރ ސައިކަލް ބުރު ވަރަށް ކާމިޔާބު ކަމަށް އެހަރަކާތް އިންތިޒާމު ކުރުމުގައި އިސްކޮށް އުޅުއްވި ހާފިޒު އަހުމަދު ސްކޫލުގެ ޓީޗަރ ނިޒުނާ އާދަމް ވިދާޅުވެއްޖެއެވެ. އިއްޔެ ކުރިއަށް ގެންދިޔަ ހަރަކާތާއި ބެހޭގޮތުން ނިޒުނާ ވިދާޅުވީ ރަށުގެ ގިނަ މުއްސަސާތަކުގެ ވަރަށް ފުރިހަމަ އެއްބާރުލުމެއް މިހަރަކާތަށް ލިބުމަކީ މިހަރަކާތް ކާމިޔާބުވުމުގެ އަސްލު ކަމަށެވެ.
އިއްޔެ ހަވީރު ފުވައްމުލަކުގެ ބައެއް ބޮޑެތި މަގުތަކުގައި ބޭއްވި މޮޓޯސައިކަލް ބުރުގައި ރަށުގެ ގިނަ އަދަދެއްގެ އާއްމުންނާއި ބެލެނިވެރިން ބައިވެރިވިއެވެ. ޚާއްސަކޮށް ރަށުގެ މުއްސަސާތައް ކަމަށްވާ ފުލުހުންނާއި ޏ. އަތޮޅު ހޮސްޕިޓަލް، ދިވެހި ރެޑްކްރެސެންޓް ފުވައްމުލަކު ބްރާންޗް އަދި ރަށުގެ ޕްރީ ސްކޫލްތައް މިސައިކަލް ބުރުގައި ބައިވެރިވެ، ނުކުޅެދުންތެރިކަން ހުންނަ ކުދިންނަށް އާއްމުންގެ ސަމާލުކަން ހޯދައިދިނުމުގައި އެހީތެރިވިކަން ނިޒުނާ ފާހަނގަ ކުރެއްވިއެވެ.
މިސައިކަލް ބުރަށް މަގު ތަނަވަސްކޮށް ދިނުމަށާއި ދިމާވާ ކުއްލި ޙާލަތްތަކުގައި އެހީތެރިކަން ފޯރުކޮށް ދިނުމަށް ފުލުހުންގެ ސައިކަލްތަކާއި ވޭނެއް ތައްޔާރަށް އޮތެވެ. މީގެ އިތުރުން ރެޑްކްރެސެންޓާއި ފުވައްމުލަކު ހޮސްޕިޓަލުން ވެސް ކުއްލި ފަރުވާއަށް ތައްޔާރުވެފައިވާ ޓީމުތައް މިބުރުގައި ހަރަކާތްތެރިވިއެވެ.
ނުކުޅެދުންތެރިކަން ހުންނަ ކުދިންނަކީ ޖަމާއަތުގެ ރައްޓެހިންކަމުގައި ޝިއާރުތައް ފާޅުކުރަމުން ދިޔަ ސައިކަލް ބުރުގެ ފުވައްމުލަކު ބޯޅަދަނޑަށް ނިންމާލީ ބައިވެރިންގެ އަތު ގުޅާލުމަކުންނެވެ. ބައިވެރިންގެ މި އަތުގުޅާލުން ރަމްޒުކޮށްދެނީ، ނުކުޅެދުންތެރިކަން ހުންނަ ކުދިންގެ ކަންކަމުގައި މުޖުތަމިއުގެ ސަމާލުކަން ހޯދުމަށް އެންމެން އެކުގައި މަސައްކަތްކުރުމުގައި ދެމިތިބޭނެކަން ކަމަށް ނިޒުނާ ހާމަކުރެއްވިއެވެ.
ހޭޒްގެ ރެއިންބޯ ޔުނިޓަކީ ނުކުޅެދުންތެރިކަން ހުންނަ ދަރިވަރުންނަށް އުނގަންނައިދޭ ކްލާސްތައް ނިސްބަތްވާ އެސްކޫލުގެ ޚާއްސަ ކްލާސްތަކެކެވެ. ރެއިންބޯ ޔުނިޓަކީ ރަށުގެ ބައެއް ފަރާތްތަކުގެ ދީލަތި އެހީއާއެކު ވަރަށް ފުރިހަމައަށް ޚިދުމަތް ދެމުން ދާ ޔުނިޓެއް ކަމަށް ބެލެނިވެރިއަކު މައުލޫމާތު ދެމުން ބުންޏެވެ. އެގޮތުން ފުވައްމުލަކު ނޫޑަލްހީ ފައިސަލް ނަސީމުގެ ނަން އެ ބެލެނިވެރިޔާ ފާހަނގަ ކުރިއެވެ.
“އަޅުގަޑުގެ ދަރިފުޅަށް، މަގަކުން އަދި އެހެން ތަނަކުން ވެސް ރެއިންބޯ ޔުނިޓްގެ ޓީޗަރެއް ފެނިއްޖެއިޔާ ވާހަކަ ދައްކާލަން ދާން ގާތަށް ބުނާނެ. އަދި އެޓީޗަރަކާ ކޮންމެހެންވެސް ބައްދަލުކުރަން އެދަރިފުޅު ބޭނުންވޭ. ހީވަނީ އެއީ ހަމަ މައިން ހެން. އެހެންވެ އަޅުގަނޑުމެން ހުރިހާ ބެލެނިވެރިން ވެސް އެޓީޗަރުންނާއި ވަރަށް ގާތް ގުޅުމެއް ބާއްވަން” ހޭޒްގެ ރެއިންބޯ ޔުނިޓްގެ ބެލެނިވެރިއަކު ބުންޏެވެ.
ހޭޒްގެ ރެއިންބޯ ޔުނިޓަކީ ޚާއްސަ އެހީއަށް ބޭނުންވާ ދަރިވަރުންނަށް އުނގަންނައި ދިނުމުގައި މުޅި ރާއްޖެއިން ވެސް ފާހަނގަކޮށް ލެވޭ ޔުނިޓެކެވެ.
ގުޅޭ ލިޔުން: ބަައިނަލްއަގުވާމީ ޑައުންސިންޑްރޯމް ދުވަސް ފާހަނގަ ކުރުމަށް މިއަދު ޚާއްސަ ސައިކަލުބުރެއް ބާއްވަނީ
ޚިޔާލުތައް