އިބްރާހިމް ލަތީފް ލިއުންތެރިންގެ ގުޅުމުގެ ފަރާތުން 2015 ވަނަ އަހަރު ބޭއްވި “ޅެންވެރިޔާ 2016”ގެ އެއްވަނަ ޅެންވެރިއަކަށް ފުވައްމުލަކު ލީކުވިލާ ފަތުހުﷲ ސާލިހު ހޮވިއްޖެއެވެ. މި މުބާރާތުގެ ވަނަތަކަށް އިނާމާއި ސަނަދު ދިނުމަށްޓަކައި ޚާއްސަ ހަފްލާ އެއް ފަހުން ބާއްވާނެ ކަމަށް ލިޔުންތެރިންގެ ގުޅުމުގެ ފަރާތުން ހާމަކުރެއެވެ.
ސްކޫލް ދައުރުގައި 1999 ވަނަ އަހަރު ގްރޭޑް 10 ގައި އުޅުއްވިރު ސްކޫލުން ތައްޔާރު ކުރި ފާރުނޫހަކަށް [ޤުދުރަތުގެ ހަދިޔާ] ގެ ނަމުގައި ފުރަތަމަ ޅެމެއް ހެއްދެވި ފަތުޙުﷲ ޞާލިޙް ފުވައްމުލަކު ބަހުން ގިނަ ޅެންތަކެއް ހެއްދެވުމަށްފަހު ފޭސްބްކް މެދުވެރިކޮށް އާންމުކޮށްފައިވެސް ވެއެވެ. ޅެން ހެއްދެވުމުގެ މަސައްކަތުގެ ތެރެއަށް ބޮޑަށް ވެންނެވުނީ ރިސޯޓެއްގައި މަސައްކަތް ކުރެއްވިއިރު ލިބިވަޑައިގަތް ހުސްވަގުތުގައި ޅެންހެއްދެވުމުގެ މަސައްކަތް ކުރެއްވުމުގެ ސަބަބުން ކަމަށް ފަތުހުﷲ ސާލިހު ވިދާޅުވެއެވެ.
ފަތުޙުﷲ ޅެންވެރިކަމުގެ ކޯހެއްގައި ބައިވެރިވެވަޑައިގެންނެވި ނަމަވެސް ކޯސް ފުރިހަމަ ކުރެއްވޭ ގޮތެއް ނުވެއެވެ. ނަމަވެސް އަމިއްލަ މަސައްކަތްޕުޅުން މިހާރުވަނީ ރަނގަޅު ފެންވަރަކަށް ޅެން ހައްދަވަން ދަސްކުރައްވައިފައެވެ. މިހާތަނަށް 100 އެއްހައި ޅެން ހައްދަވާފައިވާއިރު، ފުވައްމުލަކު ބަހުރުވައިގެ ގިނަ ޅެންތަކެއް ހިމެނެއެވެ. އޭގެތެރޭގައި [ރަށި އާދަތެއު] ގެ ނަމުގައި ފުވައްމުލަކުގެ އާދަކާދަތަކުގެ މައްޗަށް ހައްދަވާފައިވާ 52 ބައިތުގެ ޅެން ވެސް ހިމެނެއެވެ. މީގެ ކުރިން އެއްވެސް މުބާރާތެއްގައި ބައިވެރިވެވަޑައިގެންފައި ނެތް ނަމަވެސް ބައެއް މުބާރާތްތަކުގައި ފަތުޙުﷲ ހައްދަވާފައިވާ ބައެއް މަދަހަ ކުދިން ހުށަހަޅާފައި ވެއެވެ. ޕޮލިސް ފެމެލީ ކުލަބުގެ ލަވަ ހައްދަވާފައިވަނީ ވެސް ފަތުޙުﷲ އެވެ.
ފަތުޙުﷲގެ ބައެއް ޅެންތައް ވަނީ، ލިޔުންތެރިންގެ ގުޅުމުގެ ވެބްސައިޓް (www.liyuntherin.org) އާއި ފޭސްބުކުގައި ޝާއިޢު ކުރައްވައިފައެވެ.
ފޭސްބުކު މެދުވެރިކޮށް ބައެއް ފަރާތްތަކުގެ އެދުމުގެ މަތިން ޅެންވެރިކަމުގެ އިރުޝާދު ދެއްވަމުން ގެންދަވާކަމަށާއި ފަތުޙުﷲ ގެ އިރުޝާދުގެ ދަށުން ޅެންވެރިކަމުގެ ތެރެއަށް ވެންނެވި ބައެއް ބޭފުޅުން ޅެންވެރިކަމުގައި ކުރިޔަށް ވަޑައިގަންނަވަމުން ގެންދަވާކަން އުފަލާއެކު ފާހަގަ ކުރެއްވިއެވެ.
ޅެންވެރިކަމުގެ ފަންނުގައި އިތުރު މަސައްކަތްތައް ކުރެއްވުމަށާއި ބޭނުންވާ ފަރާތްތަކަށް އިރުޝާދު ދެއްވުމުގައި ކުރިޔަށް ވަޑައިގަތުމަށް ފަތުޙުﷲ ހުންނެވީ އަޒުމު ކަނޑައަޅުއްވައިގެންނެވެ.
ޚިޔާލުތައް