މުހައްމަދު ޝިހާބް އަމިއްލަ ޖަމްއިއްޔާއެއް ކަމަށްވާ ސްކިލް ޓްރެއިނިން ސެންޓަރުގެ ޚާއްސަ ހަދިޔާތަކެއް ފުވައްމުލަކު ހާފިޒް އަޙުމަދު ސްކޫލަށް (ހޭޒް) މިއަދު ހަދިޔާ ކޮށްފިއެވެ. މިއަދު ހަވީރު ސްކިލް ޓްރެއިނިން އޮފީހުގައި (މާލޭގައި) މިތަކެތި ހަވާލުކޮށް ދެއްވީ ސްކިލް ޓްރެއިނިން ސެންޓަރުގެ އެއް ފައުންޑަރ މެމްބަރު ދިމްނާ އެވެ. ހާފިޒް އަޙުމަދު ސްކޫލުގެ ފަރާތުން މިތަކެއްޗާއި ހަވާލުވީ އެސްކޫލުގެ ރެއިންބޯ ޔުނިޓްގެ ޓީޗަރު ނިޒުނާ އާދަމް އެވެ.
އޯޓިޒަމް މަހުގެ ގޮތުގައި މި އޭޕްރިލް މަސް ފާހަނގަ ކުރުމާއި ދިމާކޮށް ސްކިލް ޓްރެއިނިން ސެންޓަރުން މިދެއްވި ހަދިޔާއަކީ ހޭޒްގެ ރެއިންބޯ ޔުނިޓްގެ ދަރިވަރުން އުނގެނުމުގެ ތަފާތު ކަންކަމަށް ބޭނުން ކުރާނެ އެކިއެކި އާލަތްތަކެއް ކަމަށް މިކަލް ނޫހަށް މައުލޫމާތު ލިބެއެވެ. މިކަލް ނޫހާއި ވާހަކަ ދައްކަވަމުން ސްކިލް ޓްރެއިނިން ސެންޓަރުގެ ފައުންޑަރ މެންބަރު ދިމްނާ ވިދާޅުވީ އެސެންޓަރުގެ ފަރާތުން ކޮންމެ އަހަރަކު ވެސް އަތޮޅުތަކުގެ ކުދިންނަށް އުނގެނުމުގައި ބޭނުންކުރާނެ ތަކެތި ހޯދައިދިނުމުގެ ގޮތުން އެހީތެރިކަން ފޯރުކޮށް ދެމުން އަންނަ ކަމަށެވެ. އެގޮތުން މިއަހަރު އެފަރާތުން ޚިޔާރު ކުރީ ފުވައްމުލަކު ހޭޒް އަށް އެހީވުމަށް ކަމަށެވެ. މިހަދިޔާއަކީ އެގޮތުން ވެދެވުނު ހަދިޔާއެއް ކަމަށް ވިދާޅުވިއެވެ.
މާލޭގައި ގާއިމު ކުރެވިފައިވާ ސްކިލް ޓްރެއިނިން ސެންޓަރަކީ އެކި ފަރާތްތަކަށް ތަފާތު ޓްރެއިނިން ދެމުން އަންނަ ޖަމްއިއްޔާއެކެވެ. އެގޮތުުން ޚާއްސަ އެހީއަށް ބޭނުންވާ ކުދިންނަށް ވެސް ޓްރެއިނިން ދެމުން އަންނަކަމަށް ދިމްނާ ވިދާޅުވިއެވެ. ކޮންމެ ހަފުތާއަކު އެއްދުވަސް ޚާއްސަ އެހީއަށް ބޭނުންވާ ކުދިންނަށް ހިލޭ ޓްރެއިނިންގ ދިނުމަށް ޚާއްސަ ކުރެވިފައިވާ ކަމަށެވެ. އެސެންޓަރުން އަންނަނީ ޚާއްސަ އެހީއަށް ބޭނުންވާ އެކި ދާއިރާތަކުން އެސެންޓަރުގެ މުވައްޒަފުން ތަމްރީނު ކުރަމުންނެވެ.
“ވީކެންޑް ޓްރެއިނިން ޕްރޮގްރާމުގެ ނަމުގައި” ހަފުތާ ބަންދާއި ދިމާކޮށް އަތޮޅުތަކުގައި ވެސް އެކިއެކި ޓްރެއިން އެސެންޓަރުން ހިންގަމުން ދެއެވެ. އެގޮތުން ފާއިތުވި ހަފުތާގައި، އައްޑޫ އަތޮޅުގައި ވެސް ޓްރެއިނިންގ އެއް ކުރިޔަށް ގެންގޮސްފައިވާ ކަމަށް ދިމްނާ މައުލޫމާތު ދެއްވިއެވެ.
“އަޅުގަޑުމެން ދެބައި މީހުންގެ މެދުގައި މިހާރު ވާހަކަ މިދެކެވުނީ ފުވައްމުލަކުގައި ވެސް އަޅުގަޑުމެންގެ ޓްރެއިނިން ޕްރޮގްރާމެއް ހިންގައިދޭން” ދިމްނާ ވިދާޅުވިއެވެ. އުއްމީދު ކުރެވެނީ ރޯދަމަހުގެ ފަހުން މިޓްރެއިނިން ފުވައްމުލަކުގައި ބޭއްވުމަށް ކަމަށް ވިދާޅުވިއެވެ.
ހޭޒްގެ ރެއިްނބޯ ޔުނިޓުން މިހަދިޔާ ބަލައިގަނެ އެފަރާތުގެ އިސްނެގުމާއެކު ވެދެއްވި މިއެހީއަށް ޝުކުރު އަދާކުރިއެވެ.
ޚިޔާލުތައް