އިބްރާހިމް ލަތީފް ދިވެހިރާއްޖޭގެ ޖުޑީޝަލް އެކަޑަމީގެ އެކްޓިންގ ޗާންސެލަރގެ މަޤާމަށް، ޏ. ފުވައްމުލަކު، މުރަކަ، ދަޑިމަގު، އަލްއުސްތާޛު އަޙުމަދު މާޖިދު ޢައްޔަން ކުރައްވައިފިއެވެ. އެ އެކަޑަމީގެ އެކްޓިންގ ޗާންސެލަރގެ މަޤާމަށް އަޙުމަދު މާޖިދު ޢައްޔަން ކުރައްވާފައިވަނީ 26 އޭޕްރިލް 2016 ވީ އަންގާރަ ދުވަހު ގައެވެ.
އަޙުމަދު މާޖިދަކީ މޯލްޑިވްސް ކޮލެޖް އޮފް ހަޔަރ އެޑިޔުކޭޝަނުން ޝަރީޢަތާއި ޤާނޫނުގެ ދާއިރާއިން ފުރަތަމަ ޑިގްރީ ޙާޞިލުކުރައްވައި، އިންޓަރނޭޝަނަލް އިސްލާމިކް ޔުނިވަރސިޓީ މެލޭޝިޔާއިން ޝަރީޢަތާއި ޤާނޫނުގެ ދާއިރާއިން މާސްޓަރޒް ޑިގްރީ ޙާޞިލު ކުރައްވައިފައިވާ ބޭފުޅެކެވެ. އޭނާވަނީ ދިވެހިރާއްޖޭގެ ހައިކޯޓާއި، ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަނާއި ދިވެހިރާއްޖޭގެ ސުޕްރީމް ކޯޓުގެ ވަޒީފާތަކުގައި، ޝަރުޢީ ދާއިރާއަށް 6 އަހަރަށް ވުރެ ދިގު މުއްދަތެއްގައި ޚިދުމަތް ކުރައްވައިފައެވެ. އަދި އޭނާއަކީ 2010 ވަނަ އަހަރުން ފެށިގެން، ދިވެހިރާއްޖޭގެ ކޮލެޖުތަކާއި ޔުނިވަރސިޓީތަކުގައި ޝަރީޢަތާއި ޤާނޫނުގެ ޑިގްރީ އަދި ޑިޕްލޮމާ ޕްރޮގްރާމްތަކުގައި ކިޔަވައިދެއްވަމުން ގެންދަވާ ބޭފުޅެކެވެ. މީގެ އިތުރުން ވެސް، އަޙުމަދު މާޖިދުވަނީ ފަނޑިޔާރުންގެ އިންޑަކްޝަން ޕްރޮގްރާމްތަކާއި، ޝަރުޢީ ދާއިރާގެ މުވައްޒަފުންނަށް އަމާޒުކޮށްގެން ހިންގުނު ގިނަ ޕްރޮގްރާމްތަކެއްގައި އިރުޝާދު ދެއްވައިފައެވެ.
ދިވެހިރާއްޖޭގެ ޖުޑީޝަލް އެކަޑަމީގެ އެކްޓިންގ ޗާންސެލަރގެ މަޤާމަށް ޢައްޔަން ކުރެވުމުގެ ކުރީން، އަޙުމަދު މާޖިދު ހުންނެވީ ދިވެހިރާއްޖޭގެ ސުޕްރީމް ކޯޓުގެ ޑެޕިއުޓީ ލީގަލް އޮފިސަރގެ މަޤާމުގައެވެ.
ދިވެހިރާއްޖޭގެ ޖުޑީޝަލް އެކަޑަމީއަކީ ދިވެހިރާއްޖޭގެ ފަނޑިޔާރުންނާއި ޤާނޫނީ ވަކީލުންނާއި ޝަރުޢީ ދާއިރާގެ މުވައްޒަފުންނަށް “ކޮންޓިނުއިންގ ޖުޑީޝަލް އެޑިޔުކޭޝަން” ގެ ޕްރޮގްރާމްތައް އެކުލަވައިލައި ތަންފީޛު ކުރުމުގެ މަސްއޫލިއްޔަތު އަދާ ކުރުމަށް ޓަކައި، ދިވެހިރާއްޖޭގެ ސުޕްރީމް ކޯޓުން އުފައްދަވައިފައި ވާ މުއައްސަސާއެކެވެ. މި މުއައްސަސާ އުފައްދަވައިފައި ވަނީ 31 އޯގަސްޓް 2015 ގައެވެ.
ޚިޔާލުތައް