ސާއިމް މޫސާ ފުވައްމުލަކު ފެނާއި ނަރުދަމާގެ މަސައްކަތް ބަޔަކާއި ހަވާލުކޮއްފިއެވެ
މިރަށު ރައްޔިތުން ޒަމާންތަކެއް ވަންދެން ދެކެމުން އަންނަ އެއްމެ ބޮޑު އެއްހުވަފެން، ފެނާއި ނަރުދަމާގެ ގާއިމް ކުރުމުގެ އަމަލީ މަސައްކަތް ކުރުމަށް މިއަދު 05 މޭ 2016 ގައި ބަޔަކައި ހަވާލުކޮއްފިއެވެ.
285 މިލިއަން ރުފިޔާގެ މި މަޝްރޫގެ މަސައްކަތް ހަވާލު ކޮއްފައިވަނީ ސްރީލަންކާގެ ކުންފުނި އެއްކަމަށްވާ ސެއިރާ ކުންފުންޏާއިއެވެ. އަމަލީ މަސައްކަތް ފަށާތާ 2 އަހަރު ދުވަހުގެ ތެރޭގައި މި މަސައްކަތް ނިންމުމަށް ހަމަޖެހިފައިވާ އިރު މި މަސައްކަތުގެ އަމަލީ މަސައްކަތް ފެށުމަށް ހަމަޖެހިފައިވަނީ އަންނަ ރަމްޟާން މަހުގެ ފަހުންކަމަށް އެންވާރމެންޓް މިނިސްޓަރ ތޯރިޤް ވިދާޅުވެއެވެ.
ފުވައްމުލަކު ފެނާއި ނަރުދަމާގެ މަޝްރޫގެ ދަށުން ވޯޓާ ސަޕްލައި ނެޓުވޯކެއް މުޅި ރަށުގައި އެޅިގެން ދާނެ ކަމަށާއި އަދި 500 ޕްލާންޓު ދުވާލަކު ހެދޭ ތިން އާރޯ ޕްލާންޓު ރަށުގެ ބެހެއްޓޭނެ. ކަމަށް އެންވާރމެންޓް މިނިސްޓަރ ތޯރިޤް އިބްރާހިމް މިއަދު ވިދާޅުވިއެވެ.
އިތުރަށް މިނިސްޓަރ ވިދާޅުވިގޮތުގައި ފެން ރައްކާކުރުމަށް 720 ޓަނުގެ ވޯޓާ ސްޓޯރޭޖު ޓޭންކް އެޅޭނެ ކަމަށާއި އޭގެ އިތުރުން ދެން އެޅޭނީ ނަރުދަމާއާއި ސުވަރޭޖު ޓްރީޓްމަންޓު ޕްލާންޓް ކަމަށެވެ. އަދި ފުވައްމުލަކު ނަރުދަމާ ވެގެންދާނޯ އެންމެ ފުރިހަމަޔަށް ނަރުދަމާ ނިޒާމް އެޅިގެން ދާނެ އެއް ރަށަށްކަމަށް މިނިސްޓަރ ވިދާޅުވިއެވެ.
މިއަދު ފެނާއި ނަރުދަމާގެ އަމަލީ މަސައްކަތް ސްރީލަންކާގެ ކުންފުޏަކާއި ހަވާލުކުރުމާއި ގުޅިގެން އެންވާރްމެންޓް މިނިސްޓްރީގެ ސްޓޭޓް މިނިސްޓަރ އަބްދުލް މަތީން ވިދާޅުވީ ފުވައްމުލަކު ރައްޔިތުންގެ ޒަމާންވީ އުއްމީދެއްގައި ކުލަޖެހެނީ ކަމަށެވެ. ” ފުވައްމުލަކު ރައްޔިތުންގެ ޒަމާންވީ އުއްމީދެއްގައި ކުލަ ޖެހެނީ.. ފެނާއި ނަރުދަމާ ނިޒާމްގެ އަމަލީ މަސައްކަތް ހަވާލުކުރުމުގެ މުނާސަބާގައި މަރުހަބާ އާއި ތަހުނިޔާ ދައްނަވަން ” މަތީން ވިދާޅުވިއެވެ.
ފުވައްމުލަކު ރައްޔުތުން ނަރުދަމާއަކަށް ބޭނުންވެފައިވާތާ އެތަކެއް އަހަރެއް ވެފައިވާ އިރު ސަރުކާރު ތަކުން ފުވައްމުލަކުގެ ނަރުދަމާގެ ވާހަކަ ބޭނުންކުރަމުންދަނީ ސިޔާސީ ހަތިޔާރެއްގެ ގޮތުގައި ކަމަށް ފުވައްމުލަކު ބައެއް ރައްޔިތުން ތުހުމަތު ކުރައްވައެވެ. ނަމަވެސް ރަށުގެ އެންމެންގެވެސް މިއަދުގެ އުއްމީދަކީ މިމަސައްކަތް ކައިރި މުސްތަޤުބަލެއްގައި ނިމި، ނިޖިސް ފެނުން އެ ރައްޔިތުން މިންޖުވުމެވެ،
ކުރުގޮތަކަށް ފުވައްމުލަކު ފެނާއި ނަރުދަމާ ނިޒާމް ގާއިމްކުރުމަށް ސަރުކާރުތަކުން ކޮއްފައި ހުރި މަސައްކަތްތަށް…
ރައީސް މައުމޫން ވެރިކަން :
• ދިވެހި ސަރުކާރާއި އައިޑީބީގެ ލޯން އެހީގައި ފުވައްމުލަކުގައި ނަރުދަމާ ނިޒާމެއް ގާއިމު ކުރުމަށް 2013 ވަނައަހަރު ހަމަޖެހުނެވެ.
• ފުވައްމުލަކުގައި ނަރުދަމާގެ ނިޒާމެއް ގާއިމުކުރުމަށް ޕާކިސްތާނުގެ ކުންފުންޏަކުން 2003 ވަނަ އަހަރު ސާރވޭތަކެއް ވަނީ ކޮއްފައިއެވެ.
• ފުވައްމުލަކުގައި ނަރުދަމާގެ ނިޒާމެއް ގާއިމުކުރުމަށް 25 ފެބްރުއަރީ 2007 ގައި ވަނީ ސާރވޭކޮއްފައިއެވެ
• ފުވައްމުލަކުގައި ބޯފެނާއި ނަރުދަމާ ނިޒާމް ގާއިމްކުރުމަށް ޑިޓެއިލް ޑިޒައިން ހަދަން މިހާރުވެސް މި މަސައްކަތް ކުރުމަށް ހާވަލުކޮއްފައިވާ ރިޔަން ޕްރައިވެޓް ލިމިޓެޑާއި 24 ޖުލައި 2008 ގައި ވަނީ ހަވާލުކޮއްފައި އެވެ.
ރައީސް ނަޝީދުގެ ވެރިކަން :
• ފުވައްމުލަކުގައި ސާފު ބޯ ފެނާއި ނަރުދަމާ ނިޒާމް ގާއިމް ކުރުމުގެ މަޝްރޫއު ހިންގުވުމުގެ ލައިސަންސް އެމް ޑަބްލިޔު އެސްސީއަށް 23 އެޕްރީލް 2009 ގައި ވަނީ ދީފައެވެ
• ދެކުނު ޕްރޮވިންސުގެ ފެނާއި ނަރުދަމާ މަޝްރޫއުގައި 2010 ވަނަ އަހަރުގެ މާރޗް މަހުގައި ސޮއިކުރެވޭނެކަމަށް ސަދަން ޔޫޓީލިޓީސްއިން 14 މާރޗް 2010 ގައިވަނީ ބުނެފައެވެ.
• ދެކުނު ޕްރޮވިންސުގެ ފެނާއި ނަރުދަމާގެ ހިދުމަތް ފޯރުކޮށް ދޭނީ އެމްޑަބްލިއުއެސްސީންކަމަށް 23 މާރޗް 2010 ގައި އެ ކުންފުނިން ވަނީ ހާމަކޮއްފައިއެވެ.
• ދެކުނު ޕްރޮވިންސަށް ފެނާއި ނަރުދަމާގެ ހިދުމަތް ދިނުމަށް އިނގިރޭސިވިލާތުގެ ކުންފުންޏަކާ އެކު 29 މާރޗް 2010 ގައި ވަނީ ސޮއިކޮއްފައެވެ.
ރައީސް ވަހީދުގެ ވެރިކަން :
• އައްޑު އާއި ފުވައްމުލަކުގެ ފެނާއި ނަރުދަމާ އަދި މަގު ހެދުމުގެ އަމަލީ މަސައްކަތް ޖުލައި މަހު ފެށޭނެކަމަށް 27 މަރޗް 2012 ގައި ސަދަން ޔުޓިލިޓީސް ވަނީ ހަމާކޮއްފައި އެވެ
• ފުވައްމުލަކު ނަރުދަމާ ނިޒާމުގެ އެގްރީމަންޓުގައި އޮކްޓޫބަރު މަހު ސޮއިކުރެވޭ ވަރުވާނެކަމަށް 20 އޯގަސްޓް 2013 ވަނަ ދުވަހު ރައީސް ވަހީދު ވަނީ ވިދާޅުވެފައެވެ.
• ފުވައްމުލަކުގެ ފެނާއި ނަރުދަމާ ގާއިމުކުރަން 11 މިލިއަން ޑޮލަރުގެ ލޯނެއް 04 ނޮވެމްބަރު 2013 ގައި ރައްޔިތުންގެ މަޖްލީހުން ވަނީ ފާސްކޮއްފައި އެވެ .
ރައީސް ޔާމީންގެ ވެރިކަން :
• ފުވައްމުލަކުގެ ފެނާއި ނަރުދަމާގެ ލޯނަށް 26 ނޮވެމްބަރު 2013 ގައި މަޖްލީހުން ވަނީ ހުއްދަދީފައެވެ.
• ފުވައްމުލަކުގައި ފެނާއި ނަރުދަމާ ގާއިމްކުރުމަށް 28 ޖެނުއަރީ 2014 ގައި ކުވެއިތު ފަންޑުން ވަނީ ލޯނު ދީފައެވެ
• ފުވައްމުލަކުގެ ފެނާއި ނަރުދަމާގެ ޑިޒައިނިންގެ މަސައްކަތް ރިޔަން ޕްރައިވެޓް ލިމިޓެޑާއި 03 ފެބުރުއަރީ 2015 ގައި ވަނީ ހަވާލު ކޮއްފައެވެ.
• ނަރުދަމާ ހެދުމަށް ބޭނުންވާ (އީ.އައި.ޢޭ.) ނުވަތަ ތިމާވެއްޓަށް ކުރާނެ ނޭދެވޭ އަސަރުތައް ދެނެގަތުމަށްޓަކައި ހަދަންޖެހޭ ސާރވޭ ހަދައި އޭގެރިޕޯޓް ނިމި އެ ރިޕޯޓްގެ ކޮޕީއެއް 11 އޯގަސްޓް 2015 ގައި ފުވައްމުލަކު އަތޮޅުކައުންސިލް އަށް ލިބިފައިވާކަމަށް 25 އޯގަސްޓް 2015 ގައި އެ ކައުންސިލުން ނެރުނު ނޫސްބަޔާނެއްގައި ވަނީ ހާމަކޮއްފައިއެވެ.
• 05 މޭ 2016 ވަނަ ދުވަހު ފުވައްމުލަކު ފެނާއި ނަރުދަމާގެ އަމަލީ މަސައްކަތް ކުރުމަށް ސްރީލަންކާގެ ކުންފުޏަކާއި ވަނީ ހަވާލުކޮއްފައިއެވެ.
ޚިޔާލުތައް