އަހުމަދު ނިޖާހް އިއްޔެ ހަވީރު އަރުއްފަންނުގައި ބޭއްވި ހާއްސަ ރަސްމިއްޔާތެއްގައި މޮނިއުމެންޓު ހުޅުއްވާދެއްވީ އިޖުތިމާއީ ގިނަ ހިދުމަތްތަކެއް ކުރެއްވި ފުވައްމުލަކު އަތޮޅު ކައުންސިލްގެ ޑިރެކްޓަރ އަހްމަދު މުހައްމަދު (މީނާޒް) އެވެ. އަދި ބާބަކިއު އޭރިއާ ހުޅުއްވާދެއްވީ ފުވައްމުލަކު އަތޮޅު ކައުންސިލްގެ ނައިބް ރައީސް ހުސައިން ޝާފީ އިބްރާހިމް އެވެ.
އަރުއްފަންނު ނެރުގައި ގެނބިގެން ހިތާމެވެރިގޮތަށް ނިޔާވެފައިވާ ފަރާތްތަކުގެ ހަނދާނުގައި ބަހައްޓާފައިވާ މޮނިއުމެންޓާއި ބާބަކިއު އޭރިއާ ހުޅުވުމުގެ ރަސްމިއްޔާތު ތައާރަފް ކުރުމުގެ ގޮތުން ވާހަކަ ދެއްކެވި ދިގުވާނޑު ކައުންސިލްގެ ނާއިބް ރައީސް ހަސަން މުތީއު ވިދާޅުވީ ދިގުވާނޑު އަވަށާއި އަދި މުޅި ފުވައްމުލަކަށް ހުޅުވާލި މިތަނަކީ އެކައުންސިލުން ބިނާކުރި މިފަދަ ހަތަރުވަނަ ބިނާ ކަމަށެވެ. އަދި އެތަންތަނުން މުޅި ފުވައްމުލަކުގެ ރައްޔިތުންނަށް ހިދުމަތްތަކެއް ލިބިގެންދާނެކަމަށެވެ.
“ދިގުވާނޑު ކައުންސިލް އިންތިހާބުވީ ވައުދުތަކެއް ވުމަށްފަހު، އެވައުދުތައް ފުއްދަމުން މިދަނީ، އަޅުގަނޑުމެންނަށް ދިގުވާނޑު ރައްޔިތުން ކުރި އިތުބާރު ދަމަހައްޓަމުން މިދަނީ، އެގޮތުން މިއަދު މިހުޅުވެނީ ހަތަރުވަނަ ބިނާ، އެގޮތުން މުޅި ފުވައްމުލަކަށް ހިދުމަތް ދެވޭ ގޮތަށް ޕަބްލިކް ލައިބްރަރީއެއްވަނީ ހުޅުވާފައި، ކުޑަކުދިންގެ ޕާކެއްގެ ހިދުމަތް ދެމުން މިގެންދަނީ، ހުކުރު މިސްކިތެއް ބިނާކޮށް ހުޅުވިއްޖެ، މިއަދު މިހުޅުވެނީ ރައްޔިތުން އުފާކޮށް ހިތްހަމަޖައްސާލުމަށާއި އާއިލީ ބައްދަލުވުންތައްބޭއްވޭނެ މާހައުލެއް” ހަސަން މުތީއު ވިދާޅުވިއެވެ.
މިރަސްމިއްޔާތުގައި ފުވައްމުލަކު އަތޮޅު ކައުންސިލްގެ ނައިބް ރައީސް ހުސައިން ޝާފީ އިބްރާހިމް ވިދާޅުވީ ދިގުވާނޑު ކައުންސިލުން ދިގުވާނޑު އަވަށަށާއި މުޅި ފުވައްމުލަކަށްޓަކައި ކުރަމުންދާ މަސައްކަތަށް ފަހުރުވެރިވާކަމަށެވެ. އަދި އެހެންކަމުން ދިގުވާނޑު ކައުންސިލަށް ޝުކުރު ދަންނަވާކަމަށެވެ. ދިގުވާނޑު ކައުންސިލަކީ ފުވައްމުލަކު ނަމޫނާ ކައުންސިލެއް ކަމަށާއި، އަދި ކުރިއަށް އޮތްތަނުގައި އެހެނިހެން ކައުންސިލްތަކުންވެސް މިފަދަ ކަންތައްތަކެއް މުޅި ފުވައްމުލަކަށް ކޮށްދެއްވާނެ ކަމަށް އުންމީދު ކުރާކަމަށެވެ.
“އަވަށު ކައުންސިލްތަކުގެ ބަޖެޓަކީ ވަރަށް ކުޑަ ބަޖެޓެއް، މިފަދަ ކަންތައްތަކަށް ހަރަދު ކުރެވޭނެ ފައިސާއެއް ކައުންސިލްތަކުގެ ބަޖެޓްގައި ނެތް، ނަމަވެސް ދިގުވާނޑު ކައުންސިލްގެ ބޭފުޅުން އެދައްކާދެނީ ހެޔޮއެދޭ ފަރާތްތަކުގެ އެހީތެރިކަމާއި އެކުވެސް މިފަދަ އިޖުތިމާއީ ބިނާތައް ހެދިގެންދާނެކަން” ޝާފީ ވިދާޅުވިއެވެ.
މިރަސްމިއްޔާތުގެ ޝަރަފްވެރި މެހްމާން ފުވައްމުލަކު އަތޮޅު ކައުންސިލްގެ ޑިރެކްޓަރ އަހްމަދު މުހައްމަދު (މީނާޒް) ވިދާޅުވީ މިފަދަ މަސައްކަތްތަކުން އިޖުތިމާއީ ގުޅުން ބަދަހިވެގެންދާނެކަމަށާއި މިފަދަ މަސައްކަތްތަކުން މުޅި ފުވައްމުލަކަށް ކުރިއެރުންތަކެއް ލިބިގެންދާނެކަމަށެވެ. އަދި ފުވައްމުލަކުގެ 2030ގެ ލަނޑުދަނޑިއަކީ “ދުނިޔޭގައިވާ އެންމެ އުފާވެރިތަން” މިލަނޑު ދަނޑި ހާސިލް ކުރުމަށް މިއަދު އިތުރުވެގެން މިދިޔައީ އިތުރު ބޮޅެއް ކަމަށެވެ. އެކަމަށްޓަކައި ދިގުވާނޑު ކައުންސިލަށް ޝުކުރު ދަންނަވާ ކަމަށެވެ. އަދި އަރުއްފަންނު ނެރުގައި ހިނގާފައިވާ ހިތާމަވެރި ހާދިސާއަށް އަލިއަޅުއްވާލައްވައި ވާހަކަ ދެއްކެވިއެވެ.
“ދިގުވާނޑު ކައުންސިލްގެ ބޭފުޅުން ރަށުން ބޭރުގައި މާލޭގައި މާގިނައިން ތިއްބަވާތީވެ، ބައެއް ބޭފުޅުން އެބަ ސުވާލުކުރައްވާ، އެސުވާލުތަކުގެ ޖަވާބު މިއަދު ފެނިގެން މިދަނީ، އެބޭފުޅުން ކުރައްވާ ކޮންމެ ދަތުރެއްގައި އެނބުރި އަންނަނީ ދިގުވާނޑަށް އަދި މުޅި ފުވައްމުލަކު ރައްޔިތުންނަށް މިފަދަ ކޮންމެވެސް ހަދިޔާއެއް ހިފައިގެން، އެބޭފުޅުން އެކި ފަރާތް ފަރާތްތުން މިފަދަ ކަންތައްތަކަށް ސްޕޮންސަރ ހޯއްދަވައިގެން މިމަސައްކަތް މިކުރައްވަނީ، މިއީ ނަމޫނާ ކައުންސިލެއްކަމަށް ބަލާގަންނަން އެބަޖެހޭ” އަހްމަދު މުހައްމަދު ވިދާޅުވިއެވެ.
މިރަސްމިއްޔާތުގައި ދިގުވާނޑު ކައުންސިލްގެ ރައީސް މުހައްމަދު ހާލިސް ޝަރީފް ވިދާޅުވީ މިއަދު ހުޅުވިގެންދާ ބާބަކިއު އޭރިއާ އާއި އަދި މޮނިއުމެންޓްގެ ހުޅުވުމަށްފަހު އެކައުންސިލްގެ މަސައްކަތް ނިމުނީ ނޫން ކަމަށާއި އަދި ގިނަ މިފަދަ މަސައްކަތްތަކެއް އެބަހުރިކަމަށެވެ. އެގޮތުން ކުޑަކުދިންނަށް ފަތަން ދަސްކޮށްދޭ ޕްރޮގުރާމެއް އަންނަ ހަފްތާގައި ފައްޓަވާނެ ކަމަށާއި، އަރުއްފަންނު ނެރު ރައްކާތެރި ތަނަކަށް ހެދުމުގެ މަސައްކަތް މިހާރުވެސް ކުރައްވަމުން ގެންދާކަމަށެވެ. އަރުއްފަންނު ނެރަކީ މޫދަށް އެރި އުޅުމަށް ރައްކާތެރި ތަނަކަށް ހެދުމަށްޓަކައި ކައުންސިލުން އިސްނަގައިގެން މަސައްކަތްތަކެއް ކުރަމުންދާކަމަށް ވެސް ހާލިސް ވިދާޅުވިއެވެ.
“ދިގުވާނޑު ރައްޔިތުންނަށް ދޭން ބޭނުންވާ އުފާވެރި ހަބަރަކީ ދުޅަސިއްހަތެއްގައި ދިގުވާނޑު އަދި ފުވައްމުލަކު ރައްޔިތުން ބޭތިއްބުމަށްޓަކައި އައުޓްޑޯ ޖިމެއް ވަރަށް އަވަހަށް ހުޅުވިގެންދާނެ، އެތަނަށް ބޭނުންވާ ތަކެތި މިހާރުވަނީ ގެނެވިފައި، އެހެންކަމުން ވަރަށް އަވަހަށް އެތަކެތީގެ ބޭނުން ކުރެވޭނެ، މިހާރުމިދަނީ އެތަކެތި އެތުރުމުގެ މަސައްކަތް ކުރަމުން” ހާލިސް ވިދާޅުވިއެވެ.
އަރުއްފަންނުގައި އިއްޔެ ހަވީރު ބޭއްވި ރަސްމިއްޔާތުގައި އަރުއްފަންނު ނެރަށް މޫދަށް އެރި އުޅެނިކޮށް ނިޔާވެފައިވާ ފަރާތްތަކުގެ ހަނދާނުގައި 30 ސިކުންތުގެ ހަމަހިމޭން ސުކޫތެއް ބާއްވާފައިވެއެވެ. އަދި އެފަރާތްތަކުގެ ހަނދާނުގައި ބަހައްޓާފައިވާ މޮނިއުމެންޓްގައި އެބޭފުޅުންގެ ނަންތަކާއި ތާރީހް ލިޔެފައިވެއެވެ.
މީގެ އިތުރުން ދިގުވާނޑު އަވަށުގައި 1000 ގަސް އިންދުމުގެ ޕްރޮގުރާމެއް ފައްޓާފައިވެއެވެ. މިޕްރޮގުރާމް ފައްޓަވާދެއްވީ ދިގުވާނޑު ކައުންސިލް މެމްބަރ އަލީ ޒައިދު އެވެ. އަދި އަރުއްފަންނުގެ ބާބަކިއު އޭރިއާ ރަމްޒީކޮށް ހުޅުވުމުގެ ގޮތުން ބާބަކިއު ސްޓޭންޑަށް ދަނގަޑު ލައްވައިދިނީ ފުވައްމުލަކު އަތޮޅު ކައުންސިލްގެ ޑިރެކްޓަރ އަހްމަދު މުހައްމަދު (މީނާޒް) އާއި ފުވައްމުލަކު އަތޮޅު ކައުންސިލްގެ ނައިބް ރައީސް ހުސައިން ޝާފީ އިބްރާހިމް އެވެ. މީގެ އިތުރުން އެސަރަހައްދުގައި ގާއިމްކޮށްފައިވާ ރާޒުވާ ކުޅޭތަން ހުޅުއްވާދެއްވީ ދިގުވާނޑު ކައުންސިލްގެ ރައީސް މުހައްމަދު ހާލިސް ޝަރީފް އެވެ. ދިގުވާނޑު އަރުއްފަންނު ނެރާއި ދިމާލުގައި ކުއްލި ހާލަތަކަށް ބޭނުންކުރުމަށް ހާއްސަކޮށްފައިވާ ދެ ރިންގުވެސް ބަހައްޓާފައިވެއެވެ.
ދިގުވާނޑު ކައުންސިލަކީ ފުވައްމުލަކުގައި މިހާތަނަށް މިފަދަ އެންމެ ގިނަ މަސައްކަތްތަކެއް ކޮށްފައިވާ ކައުންސިލްކަން ފާހަނގަކޮށްލެވެއެވެ. އެގޮތުން އެކައުންސިލުންވަނީ އެންމެ ޒަމާނީ ފެންވަރަށް ކުޑަކުދިންގެ ޕާކަކާއި ޕަބްލިކް ލައިބްރަރީއެއް ގާއިމްކޮށްފައެވެ. އެތަންތަނުގެ އަގު 10 މިލިއަނަށްވުރެ ބޮޑުވާނެކަމަށް ބެލެވެއެވެ.
ޚިޔާލުތައް