މުހައްމަދު ޝިހާބް ކޮޕާ އެމެރިކާ 2016 ސެންޓެނާރިއޯ ފުޓުބޯޅަ މުބާރާތުގެ ސެމީ-ފައިނަލްގައި މިއަދު ހެނދުނު ކުޅެވުނު ކޮލަމްބިއާ ޗިލީގެ މެޗު ނިމުނީ 2-0ން ޗިލީ މޮޅުވެގެންނެވެ. ޗިލީގެ މިމޮޅާއެކު މިއަހަރުގެ ފައިނަލް ވެސް ވެގެން މިދަނީ މިދިޔަ އަހަރުގެ ފައިނަލް މެޗާއި އެއްގޮތަށް، ސައުތު އެމެރިކާގެ ވަރުގަދަ ދެބާރު ކަމަށްވާ އާޖެންޓީނާ އާއި ޗިލީގެ ފައިނަލަކަށެވެ. މިދިޔަ އަހަރު ކުޅެވުނު ފައިނަލް މެޗު ޕެނަލްޓީ ޖަހައިގެން ކާމިޔާބުކޮށް ތަށި ހޯދީ ޗިލީންނެވެ. އަދި އެކާމިޔާބީއެއެކު އެޓީމު ވަނީ އަންނަ އަހަރު ރަޝިއާގައި ބާއްވާ ކޮންފެޑެރޭޝަން ކަޕަށް ދެކުނު އެމެރިކާ ސަރަހައްދުން ހޮވިފައެވެ.
މިއަދުގެ މެޗުފެށިގެން މާގިނަ އިރުނުވަނީސް ޗިލީން ވަނީ މެޗުގެ ލީޑް ނަގާފައެވެ. އެޓީމުގެ ޗާލްސް އެރެންގުއިޒް ޖަހައި ދިން ގޯލަކާއެކު މެޗުގެ ކޮންޓްރޯލް އެމީހުން ހޯދިއެވެ. މިމެޗުގައި ޗިލީގެ މިޑްފީލްޑަރ ވިދާލް ދެރީނދޫ ކާޑާއެކު ސަސްޕެންޑް ވެފައި ވުމުން ނުކުޅެއެވެ. އަނިޔާގެ ސަބަބުން މާސެލޯ ޑިއަޒް އަށް ނުކުޅެވުނު އިރު މެޗުގެ ތެރެއިން ލިބުނު އަނިޔާއެއްގެ ސަބަބުން ޕެޑްރޯ ޕަބްލޯ ހާނަންޑެޒް ވަނީ ފުރަތަމަ ހާފުގައި ބާލަން ޖެހިފައެވެ. ނަމަވެސް ޓީމުގެ އެލެކްސް ސަންޗޭޒުގެ މޮޅުކުޅުމާއެކު ޗިލީން ދިޔައީ ކޮލަމްބިއާގެ ގޯލަށް ނުރައްކާ ކުރަމުންނެވެ. ޗިލީގެ ދެވަނަ ލަނޑު ޖެހީ މެޗުގެ 11 ވަނަ މިނިޓްގައި ޖޯސޭ ފުއެންޒެލިޑާއެވެ.
ކެޕްޓަން ހަމޭސް ރޮޑްރިގޭޒް ގެ ކޮލަމްބިއާ ޓީމުން އިދިކޮޅު ގޯލަށް 16 ހަމަލާ ދިން ނަމަވެސް ގޯލެއް ކާމިޔާބުކުރެވޭ ގޮތް ނުވިއެވެ. ޗިލީ އިން އިދިކޮޅު ގޯލަށް ދީފައިވަނީ 9 ހަމަލާއެވެ.
މިމެޗަކީ
ބޮޑު މުބާރާތެއްގައި
ދެހާފު ދޭތެރޭ އެންމެ ގިނަ ވަގުތު ނެގި މެޗަށްވުން އެކަށީގެން ވެއެވެ. އެހެނީ ފުރަތަމަ ހާފު ނިމުމަށް ފަހު ދެވަނަ ހާފު ފެށުމާއި ދޭތެރޭ 2 ގަޑިއިރު ނެގިއެވެ. އެއީ މޫސުން ގޯސްވެ
ދަނޑުގެ ސަރަހައްދުގައި
ތޫފާނެއް އުފެދި ވިދަން ފެށުމުން ސަލާމަތީ ގޮތުން މެޗު ނުފަށާ މަޑުކުރުމަށް މެޗު އޮފިޝަލުން ނިންމުމުންނެވެ.
މިދިގު މެދުކެނޑުން ވެސް ދިމާވީ ކޮލަމްބިއާއަށް އަލުން އެމީހުންގެ ފޯމުގައި ކުޅެގަންނަން އުނދަގޫވި ކަމަކަށެވެ.
ކޮޕާ އެމެރިކާ ފުޓުބޯޅަ މުބާރަތަށް 100 އަހަރު ފުރުމުގެ މުނާސަބަތުގައި ބާއްވަ މިމުބާރާތުގެ ތިން ވަނަ ހޮވާ މެޗުގައި ކޮލަމްބިއާ ބައްދަލުކުރާނީ މުބާރާތް ބޭއްވޭ އެމެރިކާއާއެވެ. މިމެޗު އޮންނާނީ ޖޫން 25 ވާ ހޮނިހިރު ދުވަހު އެވެ.
މުބާރާތުގެ ފައިނަލުގައި އާޖެންޓީނާ އާއި ޗިލީ ބައްދަލުކުރާ މެޗު ކުޅޭނީ އަންނަ އާދީއްތަ ދުވަހު އެވެ. މިމުބާރާތުގެ ގްރޫޕް ސްޓޭޖުގައި އާޖެންޓީނާ އިން ވަނީ 2-1ން ޗިލީ ބަލިކޮށްފައެވެ. ނަމަވެސް ފާއިތުވި އަހަރުގެ ފައިނަލްގައި ޗިލީން ކާމިޔާބު ހޯދީ ޕެނަލްޓީ ޖަހައިގެން އާޖެންޓިނާ ބަލިކޮށްގެންނެވެ.
ޚިޔާލުތައް