އިބްރާހިމް ލަތީފް ޑރ. އަފުރާޝީމު އަލީ ޝަހީދުކޮށްލުމުގެ ތިން މަސްދުވަސް ކުރިން ދި އިސްލާމް ވެބުސައިޓުގައި ޝާއިއުކޮށްފައިވާ މަޒުމޫނަކީ ހަމައެކަނި އިއްތިފާގެއް ކަމަށް ގަބޫލުނުކުރެވޭ ކަމަށް މަރުތައް ތަގުގީގުކުރުމަށް ރައީސް އުފެއްދެވި ކޮމިޝަނުން ނެރުނު ރިޕޯޓުގައި ބަޔާންކޮށްފިއެވެ. އެރިޕޯޓުގައިވާ ގޮތުން މި މަޒުމޫނު ލިޔެފައިވަނީ މުހައްމަދު ހުސެއިންއެވެ. މުހައްމަދު ހުސެއިން ލިޔުނު މިމަޒުމޫނަކީ ސަމާސާ އަދަބުގެ މަޒުމޫނެކެވެ.
“ރައްޔިތުންގެ މަޖިލީހުގެ މެންބަރަކު މަރާލައިފިނަމަ ، ދިވެހިރާއްޖޭގައި މަރުގެ ހުކުމް ތަމްފީޒުކޮށް، އިސްލާމީ ޝަރީއަތް ގާއިމުކުރުމުގައި މަގުފަހިވެދާނެކަމަށް މަޒުމޫނު ލިއުނު ފަރާތުން މިމަޒުމޫނުގައި ދޭހަކޮށްދޭން މަސައްކަތްކޮށްފައިވާ ކަމަށް” މަރުގެ މައްސަލަތައް ތަހުގީގުކުރާ ކޮމިޝަނުން ގަބޫލުކުރާކަމަށް ލީކުވެފައިވާ އެރިޕޯޓުގައިވެއެވެ.
މިމަޒުމޫނުގައި މުހައްމަދު ހުސެއިން ލިޔެފައިވަނީ އަނެއްކާވެސް ދޫނިރާއްޖޭގެ މަޖިލީސް މެންބަރަކު އިހާނެތި މަރާލާފައި އޮތްވާ ފެނިއްޖެ ކަމަށާއި މިފަހަރު ފެނުނީ ރީދޫ ގަބީލާގެ މެންބަރެއްކަމަށާއި އެކަމާއި ގުޅިގެން މަޖިލިސް ޖަލްސާ ބާއްވާ އިސްލާމީ ހުކުމު ތަންފީޒުކުރުމަށް ނިންމި ވާހަކައެވެ.
މިމަޒުމޫނު މިފަދަ ގޮތަކަށް ޝާއިއުވެފައިވާއިރު އެދުވަސްވަރަކީ އާދަޔާ ޚިލާފަށް ގިނަ މަރުތަކެއް ކުރިއަށްދިޔަ ދުވަސްވަރެކެވެ. މަރާލާފައިވާ މީހުންގެ މައުލޫމާތު އާންމުކުރާ އެމްވީ މާޑާސްގައިވާ ގޮތުން 2001 އިން ފެށިގެން މިހާތަނަށް އެންމެ ގިނަ މީހުން މަރާލާފައިވަނީ 2012 ވަނަ އަހަރުގައެވެ. އެއަހަރު 10 މީހުން މަރާލާފައިވާ ކަމަށް އެމްވީ މާޑާސްގެ މައުލޫމާތުތަކުގައިވެއެވެ. އަދި މުހައްމަދު ހުސެއިންގެ އެމަޒުމޫނު ލިޔުނުކަމަށް ކޮމިޝަނުގެ ލީކުވި ރިޕޯޓުގަިއ ބަޔާންކޮށްފައިވާ ޖުލައި 3 ވަނަ ދުވަހުގެ ދެދުވަސްކުރިން ޖުލައި 1 ވަނަ ދުވަހުވެސް މީހަކު މަރާލާފައިވެއެވެ. އަދި ހަަމަ އެއަހަރު މެއީ 20 ވަނަ ދުވަހާއި މެއީ 30 ވަނަ ދުވަހު ވެސް މީހަކު މަރާލާފައިވެއެވެ. އަދި އެއަހަރު އެޕްރީމް މަހު ދެމީހަކާއި ފެބުރުއަރީ މަހު މީހަކާއި ޖެނުއަރީ މަހު މީހަކާއިއެކު އެއަހަރު އެހާތަނަށް 7 މީހަކު ވަނީ މަރާލެވިފައެވެ. މުހައްމަދު ހުސެއިންގެ ސަމާސާ އަދަބުގެ ލިއުމުގައި ބަޔާންކޮށްފައިވަނީ އެއީ އެހާތަނަށް މަރުވި 5 ވަނަ ދޫނި މަޖިލީހުގެ މެންބަރުކަމަށެވެ.
ޚިޔާލުތައް